ಇನ್ನು, ಹಲವು ವರ್ಷಗಳಿಂದ ಅಂತಾರಾಷ್ಟ್ರೀಯ ಚಿತ್ರೋತ್ಸವ ನಡೆಯುತ್ತಿದ್ದರೂ, ಉದ್ಘಾಟನಾ ಸಮಾರಂಭದಲ್ಲಿ ಭಾಗವಹಿಸುವ ಮತ್ತು ದೀಪ ಹಚ್ಚುವ ಮೂಲಕ ಕಾರ್ಯಕಮವನ್ನು ಉದ್ಘಾಟಿಸುವ ಅವಕಾಶ ಕನ್ನಡದ ಯಾರಿಗೂ ಸಿಕ್ಕಿರಲಿಲ್ಲ. ಈ ಬಾರಿ ಅಂಥದ್ದೊಂದು ಅವಕಾಶ ಸುದೀಪ್ ಅವರಿಗೆ ಸಿಕ್ಕಿದ್ದು, ಕನ್ನಡದ ಮಟ್ಟಿಗಿದು ಹೆಮ್ಮೆಯ ಸಂಗತಿ. ಇದಲ್ಲದೇ ಕನ್ನಡದ ಮೊದಲ ಚಿತ್ರವಾಗಿ ವಿಕ್ರಾಂತ್ ರೋಣ ಟೈಟಲ್ ಬುರ್ಜ್ ಖಲೀಫಾ ಮೇಲೆ ಅನಾವರಣವಾಗಲಿದೆ. ಇವೆಲ್ಲದರ ಜತೆಗೆ ಕನ್ನಡ ಚಿತ್ರಗಳು ಇತ್ತೀಚಿನ ದಿನಗಳಲ್ಲಿ ಅತೀ ಹೆಚ್ಚು ಸಂಖ್ಯೆಯಲ್ಲಿ ಪರಭಾಷೆಗಳಿಗೆ ಡಬ್ ಆಗುತ್ತಿವೆ. ‘ಕಬ್ಜ’, ‘ಪೊಗರು’, ‘ಮದಗಜ’, ‘ವಿಕ್ರಾಂತ್ ರೋಣ’, ‘ರಾಬರ್ಟ್’, ‘ಯುವರತ್ನ’, ‘ಏಕ್ ಲವ್ ಯಾ’ ಸೇರಿದಂತೆ ಹಲವು ಚಿತ್ರಗಳು ಕನ್ನಡವಲ್ಲದೆ ಬೇರೆ ಭಾಷೆಗಳಿಗೆ ಡಬ್ ಆಗಿ ಬಿಡುಗಡೆಯಾಗುತ್ತಿರುವುದು ಕನ್ನಡ ಚಿತ್ರಗಳ ಮಾರುಕಟ್ಟೆಯನ್ನು ಇನ್ನಷ್ಟು ವಿಸ್ತರಿಸಿದೆ.
