ಅಬ್ಬರ, ಅದ್ಧೂರಿತನ, ಬಿಲ್ಡಪ್ ಇಲ್ಲದೇ ತುಂಬ ಸರಳವಾದ ಕಥೆಗೆ ಅಲ್ಲಲ್ಲಿ ತಿಳಿ ಹಾಸ್ಯದ ಲೇಪನ ಮಾಡಿ, ಕೆಲವೇ ಪಾತ್ರಗಳೊಂದಿಗೆ ಸರಳವಾಗಿ ಜನರ ಮುಂದೆ ತಂದಿದ್ದಾರೆ ನಿರ್ದೇಶಕ ರಾಹುಲ್. ನನಗೂ ಹೀಗಾಗಿತ್ತಲ್ವಾ ಅಂತ ಹಲವೆಡೆ ಪ್ರೇಕ್ಷಕರು ಅಂದುಕೊಳ್ಳುವಷ್ಟು ಆಪ್ತವಾಗಿ ರುವುದೇ ಚಿತ್ರದ ಪ್ಲಸ್. ಮಿಥುನ್ ಮುಕುಂದನ್ ಅವರ ಸಂಗೀತಕ್ಕಿಂತ ಹಿನ್ನೆಲೆ ಸಂಗೀತ ಚಿತ್ರವನ್ನು ಪ್ರೇಕ್ಷಕರಿಗೆ ಮತ್ತಷ್ಟು ಹತ್ತಿರವಾಗಿಸಿದೆ. ನೋಡಲು ಸುರಸುಂದರನಲ್ಲದ ಮಿಡಲ್ ಕ್ಲಾಸ್ ಹುಡುಗನಿಗೆ ಶ್ರೀಮಂತ ಸುಂದರಿ ಸಿಕ್ಕಾಗ ಆಗುವ ಖುಷಿ, ಆಕೆಯನ್ನು ಕಳೆದುಕೊಳ್ಳುವ ನೋವು ಎರಡೂ ಭರತ್ ಮುಖದಲ್ಲಿ ನೋಡಬಹುದು. ತನಗೇನು ಬೇಕು, ಏನು ಬೇಡ ಎಂಬ ಸ್ಪಷ್ಟತೆ ಇಲ್ಲದೇ ತಳಮಳಕ್ಕೊಳಗಾಗುವ ಪಾತ್ರದಲ್ಲಿ ಸಿರಿ ಕೂಡ ಇಷ್ಟವಾಗುತ್ತಾರೆ. ಅವರಿಬ್ಬರನ್ನೂ ಮೀರಿಸುವ ಹೈಲೈಟ್ಸ್ ಅಂದರೆ ಅಚ್ಯುತ್ ಕುಮಾರ್, ರೇಖಾ ಕೂಡ್ಲಿಗಿ, ಕೃಷ್ಣ ಹೆಬ್ಬಾಳೆ ಹಾಗೂ ಪುಷ್ಪ ಬೆಳವಾಡಿ. ಕೆಲವೆಡೆ ಸಂಭಾಷಣೆ ಇಲ್ಲದೆ ನಟನೆ, ಇನ್ನೂ ಕೆಲವೆಡೆ ಬರೀ ಸಂಭಾಷಣೆಗಳ ಮೂಲಕವೇ ಚಿತ್ರವನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದಿದ್ದಾರೆ.
