ಕೆ.ಆರ್​.ಮಾರ್ಕೆಟ್​ನಲ್ಲಿ ಕಮಲ್​ ಶ್ರೀದೇವಿ; ಸಚಿನ್​, ಸಂಗೀತಾ, ಅಕ್ಷಿತಾ ವಿಭಿನ್ನ ಫೋಟೋಶೂಟ್​

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ಸಿನಿಮಾ ಪ್ರಚಾರಕ್ಕಾಗಿ ತಂಡಗಳು ನಾನಾ ಐಡಿಯಾ ಮಾಡುವುದು ಸಾಮಾನ್ಯ. ಏಕೆಂದರೆ, ಇವತ್ತಿನ ಆನ್​ಲೈನ್​ ದುನಿಯಾದಲ್ಲಿ ಅದೆಷ್ಟು ಪ್ರಮೋಷನ್​ ಮಾಡಿದರೂ ಕಡಿಮೆಯೇ ಎನ್ನುವಂತಹ ಪರಿಸ್ಥಿತಿ ಇದೆ. ಹೀಗಾಗಿಯೇ ಕೃಷಿ ಸಚಿವ ಚಲವರಾಯಸ್ವಾಮಿ ಪುತ್ರ ಸಚಿನ್​ ನಾಯಕನಾಗಿರುವ, ಸಂಗೀತಾ ಭಟ್​, ಅತಾ ಬೋಪಯ್ಯ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿರುವ "ಕಮಲ್​ ಶ್ರಿದೇವಿ' ಚಿತ್ರತಂಡ, ಸಿನಿಮಾ ಪ್ರಚಾರಕ್ಕಾಗಿ ಭಿನ್ನ, ವಿಭಿನ್ನ ಪ್ಲಾನ್​ ಮಾಡಿಕೊಂಡಿದೆ.

ಇತ್ತೀಚೆಗಷ್ಟೆ ಚಿತ್ರದ ಶೂಟಿಂಗ್​ ಪೂರ್ಣಗೊಳಿಸಿ, ಕುಂಬಳಕಾಯಿ ಒಡೆದ ಚಿತ್ರತಂಡ ಸದ್ಯ ಪೋಸ್ಟ್​-ಪ್ರೊಡಕ್ಷನ್​ನಲ್ಲಿ ಬಿಜಿಯಾಗಿದೆ. ಅದರ ನಡುವೆಯೇ ಪ್ರಚಾರಕ್ಕೂ ಚಾಲನೆ ನೀಡಿದ್ದು, ಮೊದಲ ಹಂತದಲ್ಲಿ ಸಚಿನ್​, ಸಂಗೀತಾ ಮತ್ತು ಅತಾ ಕೆ.ಆರ್​. ಮಾರುಕಟ್ಟೆಯ ವಿವಿಧ ಹಿನ್ನೆಲೆಯಲ್ಲಿ ಚಿತ್ರದ ಪಾತ್ರಗಳ ಗೆಟಪ್​ನಲ್ಲಿಯೇ ವಿಭಿನ್ನವಾಗಿ ಫೋಟೋಶೂಟ್​ ಮಾಡಿಸಿದ್ದಾರೆ.

ಹೂ ಮಾರ್ಕೆಟ್​, ಹಣ್ಣು-ತರಕಾರಿ ಅಂಗಡಿಗಳು, ಮಾರುಕಟ್ಟೆ ಕಟ್ಟಡದ ಮೇಲೆ, ಕೋಟೆ ಬೀದಿಯಲ್ಲಿ ಮಂಗಳಮುಖಿಯರ ಜತೆ, ಕವಡೆ ಶಾಸ್ತ್ರ ಕೇಳುತ್ತಾ, ಖಾಸಗಿ ಬಸ್​ ನಿಲ್ದಾಣದಲ್ಲಿ, ಬಸ್​ ಒಳಗೆ... ಹೀಗೆ "ಕಮಲ್​ ಶ್ರೀದೇವಿ' ಟೀಮ್​ ಕೆ.ಆರ್​. ಮಾರ್ಕೆಟ್​ನ ಹಲವೆಡೆ ಸುತ್ತು ಹಾಕಿದೆ. ಬಿ.ಎ. ಸುನೀಲ್​ ಕುಮಾರ್​ ನಿರ್ದೇಶಿಸುತ್ತಿರುವ ಈ ಚಿತ್ರವನ್ನು ಸ್ವರ್ಣಾಂಬಿಕಾ ಪಿಕ್ಚರ್ಸ್​ ಬ್ಯಾನರ್​ನಲ್ಲಿ ಬಿ.ಕೆ. ಧನಲಕ್ಷಿ$್ಮ ನಿರ್ಮಿಸುತ್ತಿದ್ದು ನಟ ರಾಜವರ್ಧನ್​ ಸಹ ನಿರ್ಮಾಪಕನಾಗಿ ಜತೆಯಾಗಿದ್ದಾರೆ.

ಚಿತ್ರಕ್ಕೂ, ಮಾರ್ಕೆಟ್​ಗೂ ಏನು ಸಂಬಂಧ?

ಅಂದಹಾಗೆ, ಮಾರ್ಕೆಟ್​ನಲ್ಲಿ ಫೋಟೋಶೂಟ್​ ಮಾಡಿದ್ದರ ಬಗ್ಗೆ ನಾಯಕ ಸಚಿನ್​, "ಚಿತ್ರಕ್ಕೂ, ಫೋಟೋಶೂಟ್​ಗೂ ತುಂಬ ಹತ್ತಿರದ ಸಂಬಂಧವಿದೆ. ಈ ಫೋಟೋಶೂಟ್​ ಮೂಲಕ ಮೂರೂ ಪಾತ್ರಗಳ ಬಗ್ಗೆ ಕ್ಲೂ ಕೊಟ್ಟಿದ್ದೇವೆ' ಎನ್ನುತ್ತಾರೆ. ಅವರ ಜತೆ ಧ್ವನಿಗೂಡಿಸುವ ನಾಯಕಿ ಸಂಗೀತಾ ಭಟ್​, "ಮಾರ್ಕೆಟ್​ನಲ್ಲಿ ಫೋಟೋಶೂಟ್​ ಮಾಡಿದ ಅನುಭವ ವಿಶೇಷವಾಗಿತ್ತು. ಸಾಮಾನ್ಯ ಜನರ ನಡುವೆ ಶೂಟಿಂಗ್​ ಮಾಡುವಾಗ ಅವರು ನಮ್ಮನ್ನು ನೋಡಿ ಅವರು ನೀಡುತ್ತಿದ್ದ ಪ್ರತಿಕ್ರಿಯೆ ತುಂಬ ಪಾಸಿಟಿವ್​ ಫೀಲ್​ ನೀಡಿತು' ಎಂದು ಸಂತಸ ಹಂಚಿಕೊಳ್ಳುತ್ತಾರೆ.