ಅವರಿಗೆಲ್ಲ ನನ್ನ ಕಣ್ಣೀರು ಕಾಣಲಿಲ್ಲ... ಜಾನಕಿ ಅಜ್ಜಿಯ ಅಂತ್ಯಕ್ರಿಯೆ ಬೆನ್ನಲ್ಲೇ ಆಕ್ರೋಶ ಹೊರಹಾಕಿದ ಮೊಮ್ಮಗಳು ಅಪ್ಸರಾ! S Janaki

ಬೆಂಗಳೂರು: ಗಾನ ಕೋಗಿಲೆ, ದಂತಕಥೆ ಎಸ್. ಜಾನಕಿ ( S Janaki ) ಅವರ ವಿದಾಯ ಇಡೀ ಕಲಾ ಜಗತ್ತನ್ನು ಶೋಕ ಸಾಗರದಲ್ಲಿ ಮುಳುಗಿಸಿದೆ. ಹೃದಯಾಘಾತದಿಂದ ನಿಧನರಾದ ಜಾನಕಮ್ಮ ಅವರ ಅಂತ್ಯಕ್ರಿಯೆಯನ್ನು ಸಕಲ ಸರ್ಕಾರಿ ಗೌರವಗಳೊಂದಿಗೆ ಮೈಸೂರಿನ ಎಚ್​ಡಿ ಕೋಟೆ ತಾಲೂಕಿನ ಕಣಿಯನಹುಂಡಿಯ ಅವರ ಫಾರ್ಮ್‌ಹೌಸ್‌ನಲ್ಲಿ ಭಾನುವಾರ (ಜುಲೈ 12) ನೆರವೇರಿಸಲಾಯಿತು. ಇಂತಹ ದುಃಖದ ಸಂದರ್ಭದಲ್ಲೂ ಸಾಮಾಜಿಕ ಜಾಲತಾಣಗಳಲ್ಲಿ ಅತ್ಯಂತ ಅಮಾನವೀಯ ಚರ್ಚೆಯೊಂದು ಮುನ್ನೆಲೆಗೆ ಬಂದಿದೆ!

ಅಜ್ಜಿಯ ಅಂತಿಮ ವಿಧಿವಿಧಾನಗಳನ್ನು ನೆರವೇರಿಸಿದ ಮೊಮ್ಮಗಳು ಅಪ್ಸರಾ ವೈದ್ಯುಲಾ ಅವರ ಕಣ್ಣಿನಲ್ಲಿ ನೀರಿರಲಿಲ್ಲ ಎಂಬ ಕ್ಷುಲ್ಲಕ ಕಾರಣಕ್ಕೆ ನೆಟ್ಟಿಗರು ಆಕೆಯನ್ನು ಪ್ರಶ್ನಿಸುತ್ತಾ, ಕ್ರೂರವಾಗಿ ಟ್ರೋಲ್ ಮಾಡುತ್ತಿರುವುದು ಈಗ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಏನಿದು ಘಟನೆ? ದುಃಖದ ಸಮಯದಲ್ಲೂ ಆಕೆಯನ್ನು ಜನ ಟಾರ್ಗೆಟ್ ಮಾಡುತ್ತಿರುವುದೇಕೆ ಎಂಬ ಸಂಪೂರ್ಣ ವಿವರ ಇಲ್ಲಿದೆ.

ಅಜ್ಜಿಯ ಅಂತಿಮ ಸಂಸ್ಕಾರದ ವೇಳೆ ಕಣ್ಣೀರು ಹಾಕಿಲ್ಲ ಎಂದು ಟ್ರೋಲ್​ ಮಾಡುತ್ತಿರುವ ನೆಟ್ಟಿಗರಿಗೆ ಸಾಮಾಜಿಕ ಜಾಲತಾಣದ ಮೂಲಕ ಸುದೀರ್ಘ ಪೋಸ್ಟ್ ಬರೆದು ಅಪ್ಸರಾ ಅವರು ತಕ್ಕ ಉತ್ತರ ನೀಡಿದ್ದಾರೆ. ನನ್ನ ಅಜ್ಜಿಗೆ ಜಗತ್ತಿನಲ್ಲೇ ಅತ್ಯಂತ ಪ್ರೀತಿಯ ವ್ಯಕ್ತಿಯಾಗಿದ್ದವಳು ನನ್ನ ಅಕ್ಕ ವರ್ಷಾ. ಅವರಿಬ್ಬರ ನಡುವಿನ ಆತ್ಮೀಯತೆ ಮಾತುಗಳಿಗೆ ಮೀರಿದ್ದಾಗಿತ್ತು. ಆದರೆ, ದುರದೃಷ್ಟವಶಾತ್ ನನ್ನ ಅಕ್ಕ 2023ರ ಆಗಸ್ಟ್‌ನಲ್ಲಿ ನಮ್ಮನ್ನು ಅಗಲಿದ್ದಾಳೆ. ನಿಜ ಹೇಳಬೇಕೆಂದರೆ ಇವತ್ತು ನನ್ನ ಜಾಗದಲ್ಲಿ ನಿಂತು ಅಜ್ಜಿಯನ್ನು ನೋಡಿಕೊಳ್ಳಬೇಕಾಗಿದ್ದವಳು ಮತ್ತು ಈ ಎಲ್ಲಾ ಅಂತಿಮ ವಿಧಿವಿಧಾನಗಳನ್ನು ನೆರವೇರಿಸಬೇಕಾಗಿದ್ದವಳು ಅವಳೇ ಹೊರತು ನಾನಲ್ಲ. ಅಕ್ಕನ ಸಾವಿನ ಆ ದೊಡ್ಡ ನೋವಿನಿಂದ ನಮ್ಮ ಕುಟುಂಬ ಇಂದಿಗೂ ಹೊರಬಂದಿಲ್ಲ. ದುಃಖ ಎಂಬುದು ಎಂದಿಗೂ ಮಾಯವಾಗುವುದಿಲ್ಲ, ಬದಲಿಗೆ ಅದನ್ನು ನಮ್ಮ ಜೀವನದುದ್ದಕ್ಕೂ ಹೊತ್ತು ಸಾಗುವುದನ್ನು ನಾವು ಕಲಿಯಬೇಕಷ್ಟೇ ಎಂದು ಬರೆಯುವ ಮೂಲಕ ತಮ್ಮ ಮನದ ವೇದನೆಯನ್ನು ಅಪ್ಸರಾ ಹಂಚಿಕೊಂಡಿದ್ದಾರೆ.

ದಯವಿಟ್ಟು ಕಣ್ಣೀರಿನ ಆಧಾರದ ಮೇಲೆ ನನ್ನ ಅಜ್ಜಿಯ ಮೇಲಿನ ಪ್ರೀತಿಯನ್ನು ಅಳೆಯಬೇಡಿ. ಸಾವನ್ನು ಆಧ್ಯಾತ್ಮಿಕವಾಗಿ ಸ್ವೀಕರಿಸುವುದನ್ನು ಸ್ವತಃ ಅಜ್ಜಿಯೇ ನಮಗೆ ಕಲಿಸಿಕೊಟ್ಟಿದ್ದಾರೆ. ಜೀವ ಹೋದ ತಕ್ಷಣ ಪ್ರೀತಿ ಕೊನೆಯಾಗುವುದಿಲ್ಲ ಎಂಬುದನ್ನು ಅವರು ನಮಗೆ ಅರ್ಥ ಮಾಡಿಸಿದ್ದರು. ಜೀವನದಲ್ಲಿ ಎದುರಾದ ಕಠಿಣ ಸನ್ನಿವೇಶಗಳು ನನ್ನನ್ನು ನಾನು ಅಂದುಕೊಂಡಿದ್ದಕ್ಕಿಂತಲೂ ಹೆಚ್ಚು ಧೈರ್ಯಶಾಲಿಯನ್ನಾಗಿ ಮಾಡಿವೆ. ದುಃಖ ಎನ್ನುವುದು ಯಾವಾಗಲೂ ಜೋರಾಗಿ ಅತ್ತು ತೋರಿಸುವುದಷ್ಟೇ ಅಲ್ಲ, ಕೆಲವು ಬಾರಿ ಅದು ಮೌನವಾಗಿ, ಸ್ಥಿರವಾಗಿ ಹಾಗೂ ಅತ್ಯಂತ ವೈಯಕ್ತಿಕವಾಗಿ ನಮ್ಮೊಳಗೇ ಇರುತ್ತದೆ ಎಂದು ಅಪ್ಸರಾ ಹೇಳಿದ್ದಾರೆ.

ಸಾರ್ವಜನಿಕವಾಗಿ ಗುರುತಿಸಿಕೊಂಡಾಗ ನಮ್ಮ ವೈಯಕ್ತಿಕ ಜೀವನದ ಬಗ್ಗೆ ಹರಡುವ ವದಂತಿಗಳು ಹಾಗೂ ಕಟ್ಟುಕಥೆಗಳೊಂದಿಗೆ ಬದುಕುವುದು ಅನಿವಾರ್ಯವಾಗುತ್ತದೆ ಎಂದು ಬೇಸರ ವ್ಯಕ್ತಪಡಿಸಿರುವ ಅಪ್ಸರಾ, ಪರಿಚಯವೇ ಇಲ್ಲದ ನಮ್ಮ ಕುಟುಂಬದ ಬಗ್ಗೆ ಜನರು ತಮಗೆ ಬೇಕಾದಂತೆ ಅಭಿಪ್ರಾಯಗಳನ್ನು ರೂಪಿಸಿಕೊಳ್ಳುವುದನ್ನು ನೋಡುವುದು ನೋವು ತರುತ್ತದೆ ಎಂದು ತಿಳಿಸಿದ್ದಾರೆ. ಮುಂದುವರಿದು, ನನ್ನ ಅಜ್ಜಿ ನಿಜವಾಗಿಯೂ ಎಂತಹ ಅದ್ಭುತ ವ್ಯಕ್ತಿಯಾಗಿದ್ದರು ಎಂಬುದು ಎಲ್ಲರಿಗೂ ತಿಳಿಯಬೇಕೆಂದು ನಾನು ಬಯಸುತ್ತೇನೆ. ಅವರು ಅತ್ಯಂತ ಶಾಂತ ಸ್ವಭಾವದ, ದಯಾಳು ಹಾಗೂ ಯಾರನ್ನೂ ಸುಲಭವಾಗಿ ಜಡ್ಜ್ ಮಾಡದ ಉದಾತ್ತ ಮನಸ್ಸಿನವರಾಗಿದ್ದರು. ಪ್ರತಿಯೊಬ್ಬರಲ್ಲೂ ಒಳ್ಳೆಯದನ್ನೇ ಕಾಣುವ ಗುಣ ಅವರದ್ದಾಗಿತ್ತು ಮತ್ತು ನನ್ನ ಅಕ್ಕ ವರ್ಷಾ ಕೂಡ ಹೂವಿನಂತಹ ಅಜ್ಜಿಯ ಗುಣವನ್ನೇ ಸಂಪೂರ್ಣವಾಗಿ ಹೊಂದಿದ್ದಳು ಎಂದು ಅವರು ಕೃತಜ್ಞತೆಯಿಂದ ಸ್ಮರಿಸಿದ್ದಾರೆ.

ವೈದಿಕ ಮಂತ್ರಘೋಷಗಳ ನಡುವೆ ಅಜ್ಜಿಯ ಚಿತೆಗೆ ಕೊಳ್ಳಿ ಇಡುವ ಮೂಲಕ ಮೊಮ್ಮಗಳು ಅಪ್ಸರಾ ವೈದ್ಯುಲಾ ಅವರು ಅಂತಿಮ ವಿಧಿವಿಧಾನಗಳನ್ನು ನೆರವೇರಿಸಿದರು. ಸಾಂಪ್ರದಾಯಿಕವಾಗಿ ಪುರುಷರಿಗಷ್ಟೇ ಸೀಮಿತವಾಗಿದ್ದ ಈ ಅಂತ್ಯಕ್ರಿಯೆಯ ವಿಧಿವಿಧಾನಗಳ ಧಾರ್ಮಿಕ ನಿಯಮವನ್ನು ಬದಿಗೊತ್ತಿ, ಹೆಗಲ ಮೇಲೆ ಮಣ್ಣಿನ ಮಡಕೆ ಹೊತ್ತು ಚಿತೆಯ ಸುತ್ತ ಪ್ರದಕ್ಷಿಣೆ ಹಾಕುವ ಮೂಲಕ ಅಪ್ಸರಾ ಅಜ್ಜಿಯ ಕೊನೆಯ ಆಚರಣೆಗಳನ್ನು ಪೂರ್ಣಗೊಳಿಸಿದರು. ಅಂದಹಾಗೆ, ಅಪ್ಸರಾ ಅವರು ಜಾನಕಮ್ಮ ಅವರ ಪುತ್ರ ಹಾಗೂ ಇದೇ ವರ್ಷದ ಜನವರಿ 22 ರಂದು ನಿಧನರಾದ ಮುರಳಿ ಕೃಷ್ಣ ಅವರ ಪುತ್ರಿಯಾಗಿದ್ದಾರೆ. ಕಣಿಯನಹುಂಡಿಗೆ ಕೊಂಡೊಯ್ಯುವ ಮುನ್ನ ಸಾರ್ವಜನಿಕರ ದರ್ಶನಕ್ಕಾಗಿ ಜಾನಕಿ ಅವರ ಪಾರ್ಥಿವ ಶರೀರವನ್ನು ಮೈಸೂರಿನ ಮಹಾರಾಜ ಕಾಲೇಜು ಮೈದಾನದಲ್ಲಿ ಇರಿಸಲಾಗಿತ್ತು, ಈ ವೇಳೆ ಕನ್ನಡ ಸೇರಿದಂತೆ ದಕ್ಷಿಣ ಭಾರತದ ಚಿತ್ರರಂಗದ ನಟ ನಟಿಯರು, ಹಿನ್ನೆಲೆ ಗಾಯಕರು ಹಾಗೂ ಸಾವಿರಾರು ಅಭಿಮಾನಿಗಳು ಅಂತಿಮ ನಮನ ಸಲ್ಲಿಸಿದರು.

ಆಂಧ್ರಪ್ರದೇಶದ ಗುಂಟೂರು ಜಿಲ್ಲೆಯ ಪಲ್ಲಪಟ್ಲದಲ್ಲಿ 1938ರ ಏಪ್ರಿಲ್ 23 ರಂದು ಜನಿಸಿದ ಎಸ್. ಜಾನಕಿ ಅವರು, ಆನಂತರ ಮೈಸೂರನ್ನು ತಮ್ಮ ನೆಚ್ಚಿನ ನೆಲೆಯಾಗಿಸಿಕೊಂಡಿದ್ದರು. ಅವರ ಆಸೆಯಂತೆಯೇ ಅವರ ಕೊನೆಯ ವಿಧಿವಿಧಾನಗಳನ್ನು ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿಯೇ ನೆರವೇರಿಸಲಾಯಿತು. ತಮ್ಮ 19ನೇ ವಯಸ್ಸಿನಲ್ಲಿ ತಮಿಳಿನ 'ವಿಧಿಹಿನ್ ವಿಲಾಯಾಟ್ಟು' (1957) ಚಿತ್ರದ ಮೂಲಕ ಗಾಯನ ಯಾತ್ರೆ ಆರಂಭಿಸಿದ ಜಾನಕಮ್ಮ, ಆರು ದಶಕಗಳಿಗೂ ಹೆಚ್ಚು ಕಾಲದ ಸುದೀರ್ಘ ವೃತ್ತಿಜೀವನದಲ್ಲಿ ಕನ್ನಡ, ತಮಿಳು, ತೆಲುಗು, ಮಲಯಾಳಂ, ಹಿಂದಿ ಸೇರಿದಂತೆ ಸುಮಾರು 20 ಭಾರತೀಯ ಭಾಷೆಗಳಲ್ಲಿ 48,000ಕ್ಕೂ ಹೆಚ್ಚು ಹಾಡುಗಳನ್ನು ಹಾಡಿ ಅಪ್ರತಿಮ ದಾಖಲೆ ಬರೆದಿದ್ದಾರೆ. ದಕ್ಷಿಣ ಭಾರತದ ಎಲ್ಲಾ ಭಾಷೆಗಳಲ್ಲಿ ಜನಪ್ರಿಯರಾಗಿದ್ದರೂ, ಅವರು ಕನ್ನಡದಲ್ಲೇ ಅತಿ ಹೆಚ್ಚು ಹಾಡುಗಳನ್ನು ಹಾಡಿದ್ದಾರೆ. ಅದರಲ್ಲೂ ಪಿ. ಬಿ. ಶ್ರೀನಿವಾಸ್, ಎಸ್. ಪಿ. ಬಾಲಸುಬ್ರಹ್ಮಣ್ಯಂ ಹಾಗೂ ಡಾ. ರಾಜ್‌ಕುಮಾರ್ ಅವರೊಂದಿಗೆ ಅವರು ಹಾಡಿದ ಯುಗಳ ಗೀತೆಗಳು ಇಂದಿಗೂ ಸದಾ ಹಸಿರಾಗಿವೆ.

ಕೇವಲ ಭಾರತೀಯ ಭಾಷೆಗಳಲ್ಲದೆ ಇಂಗ್ಲಿಷ್, ಜಪಾನೀಸ್, ಜರ್ಮನ್ ಮತ್ತು ಸಿಂಹಳ ಭಾಷೆಗಳಲ್ಲೂ ಧ್ವನಿಯಾಗಿದ್ದ ಜಾನಕಮ್ಮ ಅವರನ್ನು ಅಭಿಮಾನಿಗಳು ಮತ್ತು ಶಿಷ್ಯರು ಅತ್ಯಂತ ಪ್ರೀತಿಯಿಂದ 'ಜಾನಕಿ ಅಮ್ಮ' ಹಾಗೂ 'ಗಾನ ಕೋಗಿಲೆ' ಎಂದು ಕರೆಯುತ್ತಿದ್ದರು. ಇವರ ಅಪೂರ್ವ ಗಾಯನ ಸೇವೆಗೆ 4 ರಾಷ್ಟ್ರ ಪ್ರಶಸ್ತಿಗಳು ಹಾಗೂ 33 ರಾಜ್ಯ ಚಲನಚಿತ್ರ ಪ್ರಶಸ್ತಿಗಳು ಒಲಿದು ಬಂದಿವೆ. ಇದರೊಂದಿಗೆ ಮೈಸೂರು ವಿಶ್ವವಿದ್ಯಾಲಯದಿಂದ ಗೌರವ ಡಾಕ್ಟರೇಟ್, ತಮಿಳುನಾಡು ಸರ್ಕಾರದ ಕಲೈಮಾಮಣಿ ಪ್ರಶಸ್ತಿ ಹಾಗೂ ಕರ್ನಾಟಕ ಸರ್ಕಾರದ ರಾಜ್ಯೋತ್ಸವ ಪ್ರಶಸ್ತಿಗೂ ಅವರು ಭಾಜನರಾಗಿದ್ದರು. ಆದರೆ, ಸಂಗೀತ ಕ್ಷೇತ್ರಕ್ಕೆ ತಾವು ನೀಡಿದ ಕೊಡುಗೆಗೆ ದೇಶದ ಅತ್ಯುನ್ನತ ನಾಗರಿಕ ಪ್ರಶಸ್ತಿಯಾದ 'ಭಾರತ ರತ್ನ' ಸಿಗಬೇಕಿತ್ತು ಎಂದು ನಂಬಿದ್ದ ಜಾನಕಮ್ಮ ಅವರು, ತಮಗೆ ಅತ್ಯಂತ ತಡವಾಗಿ ಘೋಷಿಸಲಾಯಿತು ಎಂಬ ಕಾರಣಕ್ಕೆ 2013 ರಲ್ಲಿ ಕೇಂದ್ರ ಸರ್ಕಾರ ನೀಡಿದ್ದ 'ಪದ್ಮಭೂಷಣ' ಪ್ರಶಸ್ತಿಯನ್ನು ನಯವಾಗಿಯೇ ತಿರಸ್ಕರಿಸಿದರು, (ಏಜೆನ್ಸೀಸ್​).