ಪ್ರಶಾಂತ್​ ಶೆಟ್ಟಿ ಅಂತಿದ್ದ ಹೆಸರು ಬದಲಾಗಿದ್ದೇಕೆ? ರಿಷಬ್​ ಶೆಟ್ಟಿ ಕೊಟ್ಟ ಉತ್ತರ ಇಲ್ಲಿದೆ ನೋಡಿ... Rishab Shetty

ಬೆಂಗಳೂರು: ಈಗ ದೇಶಾದ್ಯಂತ ಎರಡೇ ಎರಡು ಹೆಸರು ಹೆಚ್ಚು ಚಾಲ್ತಿಯಲ್ಲಿವೆ. ಅವುಗಳೆಂದರೆ, ಒಂದು ಕಾಂತಾರಾ ಮತ್ತು ಇನ್ನೊಂದು ರಿಷಬ್​ ಶೆಟ್ಟಿ ( Rishab Shetty ). ಕಾಂತಾರಾ ಮೂಲಕ ರಿಷಬ್​ ಯಶಸ್ಸಿನ ಶಿಖರವನ್ನೇರಿದ್ದಾರೆ. ರಾಷ್ಟ್ರೀಯ ಪ್ರಶಸ್ತಿಯನ್ನೂ ಗೆದ್ದಿದ್ದಾರೆ ಮತ್ತು ಬಾಕ್ಸ್​ ಆಫೀಸ್​ನಲ್ಲಿ ಸುನಾಮಿ ಎಬ್ಬಿಸಿ, ದಾಖಲೆಗಳನ್ನು ನಿರ್ಮಿಸಿದ್ದಾರೆ. ಕಾಂತಾರಾ ಮೂಲಕ ಇಡೀ ಭಾರತೀಯ ಚಿತ್ರರಂಗದ ಸ್ಟಾರ್​ ಆಗಿ ಬೆಳೆದಿದ್ದಾರೆ. ಈಗ ಪ್ರತಿಯೊಬ್ಬ ಸಿನಿಪ್ರಿಯರಿಗೂ ಪರಿಚಿತವಾಗಿರುವ ಹೆಸರು ರಿಷಬ್ ಶೆಟ್ಟಿ. ಆದಾಗ್ಯೂ, ಅದು ಅವರ ನಿಜವಾದ ಹೆಸರಲ್ಲ ಎಂಬುದು ಗಮನಾರ್ಹ.

ಕಾಂತಾರ ಮತ್ತು ಕಾಂತಾರ ಚಾಪ್ಟರ್​ 1 ಸಿನಿಮಾಗಳ ಮೂಲಕ ನಮ್ಮ ಭಾರತೀಯ ಸಂಪ್ರದಾಯಗಳು, ಆಧ್ಯಾತ್ಮಿಕತೆ, ಭಕ್ತಿ, ನಂಬಿಕೆಗಳು ಮತ್ತು ದೈವಿಕ ಶಕ್ತಿಯನ್ನು ಅಚ್ಚುಕಟ್ಟಾಗಿ ತೆರೆಯ ಮೇಲೆ ತಂದಿರುವ ರಿಷಬ್, ಆ ಚಿತ್ರದ ನಾಯಕ ಮಾತ್ರವಲ್ಲ, ಅದ್ಭುತವನ್ನು ಸೃಷ್ಟಿಸಿದಂತಹ ಪ್ರತಿಭಾನ್ವಿತ ನಿರ್ದೇಶಕರೂ ಆಗಿದ್ದಾರೆ.

ಕರಾವಳಿ ಕರ್ನಾಟಕದ ಒಂದು ಸಣ್ಣ ಪಟ್ಟಣದಿಂದ ಬಂದ ರಿಷಬ್​ ಅವರು ನಟ, ನಿರ್ದೇಶಕ ಮತ್ತು ನಿರ್ಮಾಪಕರಾಗಿ ಅದ್ಭುತ ವೃತ್ತಿಜೀವನವನ್ನು ನಿರ್ಮಿಸಿದ್ದಾರೆ. ರಿಷಬ್​ ಶೆಟ್ಟಿ ತಮ್ಮ ಚಲನಚಿತ್ರಗಳ ಮೂಲಕ ಬೋಧಿಸುವ ಆಧ್ಯಾತ್ಮಿಕ ನಂಬಿಕೆಗಳು ಕೇವಲ ವ್ಯಾಪಾರದ ಗಿಮಿಕ್‌ಗಳು ಎಂದು ಭಾವಿಸುವುದು ತಪ್ಪಾಗುತ್ತದೆ. ಅವೆಲ್ಲವೂ ಸ್ವತಃ ರಿಷಬ್ ಅವರೇ​ ನಿಜವಾಗಿಯೂ ನಂಬುವ ಮತ್ತು ಅನುಸರಿಸುವ ವಿಷಯಗಳಾಗಿವೆ. ಅವರ ಸ್ವಂತ ಮನೆಯ ಅಲಂಕಾರದಿಂದ ಹಿಡಿದು, ತಮ್ಮ ಅಡುಗೆಮನೆ ಮತ್ತು ಉಡುಪುಗಳನ್ನು ಧರಿಸುವ ವಿಧಾನದವರೆಗೆ ಅವರಲ್ಲಿರುವ ದೈವ ನಂಬಿಕೆ ಸ್ಪಷ್ಟವಾಗುತ್ತದೆ.

ಪ್ರಸ್ತುತ ಕಾಂತಾರ ಚಾಪ್ಟರ್​ 1ರ ಯಶಸ್ಸನ್ನು ವಿನಮ್ರವಾಗಿ ಸ್ವೀಕರಿಸಿ ಆನಂದಿಸುತ್ತಿರುವ ರಿಷಬ್​, ತಮ್ಮ ಹೆಸರು ಬದಲಾವಣೆಯ ಹಿಂದೆ ಜ್ಯೋತಿಷ್ಯದ ಪ್ರಭಾವವಿದೆ ಎಂದು ನಂಬುತ್ತಾರೆ. ದೀಪಾವಳಿ ಹಬ್ಬದ ಹಿನ್ನೆಲೆಯಲ್ಲಿ ಜೀ ಕನ್ನಡದಲ್ಲಿ ಮೂಡಿಬಂದ ವೀಕೆಂಡ್​ ವಿತ್​ ರಮೇಶ್​ ವಿಶೇಷ ಸಂಚಿಕೆಯಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ ರಿಷಬ್ ಶೆಟ್ಟಿ ಅವರೇ ಇದನ್ನು ಬಹಿರಂಗಪಡಿಸಿದ್ದಾರೆ.

ಇದನ್ನೂ ಓದಿ: ಮೊದಲ ಪ್ರೀತಿ ಪರಿಶುದ್ಧವೇ? ಬ್ರೇಕಪ್ ನೋವು ಅನುಭವಿಸಿದ್ದೀರಾ? ರಶ್ಮಿಕಾ ಮಂದಣ್ಣ ಕೊಟ್ಟ ಉತ್ತರ ವೈರಲ್​…. Rashmika Mandanna

ನಾನು ನನ್ನ ಹೆಸರನ್ನು ಏಕೆ ಬದಲಾಯಿಸಿದೆ ಎಂಬುದರ ಹಿಂದೆ ಒಂದು ಕಥೆ ಇದೆ. ನನ್ನ ನಿಜವಾದ ಹೆಸರು ಪ್ರಶಾಂತ್ ಶೆಟ್ಟಿ. ನಾನು ಅದೇ ಹೆಸರಿನೊಂದಿಗೆ ಚಿತ್ರರಂಗಕ್ಕೆ ಪ್ರವೇಶಿಸಿದೆ. ಆದಾಗ್ಯೂ, ಚಿತ್ರರಂಗದ ಆರಂಭಿಕ ದಿನಗಳಲ್ಲಿ, ನನಗೆ ಯಾವುದೇ ಯಶಸ್ಸು ಅಥವಾ ಚಲನಚಿತ್ರಗಳು ಸಿಗಲಿಲ್ಲ. ಅದೇ ಸಮಯದಲ್ಲಿ, ನನ್ನ ತಂದೆ, ಹೆಸರು ಬದಲಾಯಿಸಲು ಸೂಚಿಸಿದರು. ಆ ರೀತಿ ಮಾಡಿದರೆ ಯಶಸ್ಸು ಮತ್ತು ಉತ್ತಮ ಅವಕಾಶಗಳು ಬರುತ್ತವೆ ಎಂದರು. ಉದ್ಯಮಕ್ಕೆ ಬಂದ ನಂತರ ಅನೇಕ ಸ್ಟಾರ್​ ಕಲಾವಿದರು ತಮ್ಮ ಹೆಸರನ್ನು ಬದಲಾಯಿಸಿಕೊಂಡಿದ್ದಾರೆ ಎಂದು ಹೇಳಿದರು. ನಾನು ಕೂಡ ಅದೇ ರೀತಿ ಮಾಡಲು ನಿರ್ಧಾರ ಮಾಡಿದೆ ಎಂದು ರಿಷಬ್ ಶೆಟ್ಟಿ ಹೇಳಿದ್ದಾರೆ.

ಹೆಸರು ಬದಲಾವಣೆಯು ನನ್ನ ವೃತ್ತಿಜೀವನದಲ್ಲಿ ಉತ್ತಮ ಯಶಸ್ಸನ್ನು ತರುತ್ತದೆ ಎಂದು ನನ್ನ ತಂದೆ ಬಲವಾಗಿ ನಂಬಿದ್ದರು. ಆದ್ದರಿಂದ, ಪ್ರಶಾಂತ್​ ಶೆಟ್ಟಿ ಅಂತಿದ್ದ ಹೆಸರನ್ನು ರಿಷಬ್​ ಎಂದು ಬದಲಾಯಿಸಲು ಸೂಚನೆ ನೀಡಿದರು. ತಂದೆಯ ಮಾತಿನಂತೆ ಹೆಸರು ಬದಲಿಸಿಕೊಂಡೆ ಎಂದು ರಿಷಬ್​ ಹೇಳಿದ್ದಾರೆ. ಮತ್ತೊಂದು ಕುತೂಹಲಕಾರಿ ಸಂಗತಿಯೆಂದರೆ ರಿಷಬ್​ ಅವರ ತಂದೆ ಸ್ವತಃ ಜ್ಯೋತಿಷಿ. ಆದಾಗ್ಯೂ, ರಿಷಬ್​ ಅವರಲ್ಲಿರುವ ಪ್ರತಿಭೆ ಮತ್ತು ಸಾಮರ್ಥ್ಯಗಳ ಜೊತೆಗೆ ಹೆಸರು ಬದಲಾವಣೆಯು ಅವರನ್ನು ಉನ್ನತ ಸ್ಥಾನಕ್ಕೆ ಕೊಂಡೊಯ್ದಿದೆ ಎಂದು ರಿಷಬ್​ ಶೆಟ್ಟಿ ನಂಬುತ್ತಾರೆ ಅನ್ನೋದರಲ್ಲಿ ಯಾವುದೇ ಸಂದೇಹವಿಲ್ಲ. (ಏಜೆನ್ಸೀಸ್​)

https://www.vijayavani.net/father-and-daughter-love-this-viral-video-will-bring-tears-to-anyones-eyes

https://www.vijayavani.net/people-with-this-zodiac-signs-never-trust-anyone-is-this-your-zodiac-sign-too