ಕಾರು ಅಪಘಾತಕ್ಕೊಳಗಾದ ಗರ್ಭಿಣಿಗೆ ಸಹಾಯ ಮಾಡುವ ಹಿಟ್ಮ್ಯಾನ್ ರಾಣಾಗೆ (ರಾಜವರ್ಧನ್), ಆ ಮಹಿಳೆ, "ಅಣ್ಣಾ, ನಮ್ಮ ಮಗೂಗೆ ನಿಮ್ಮ ಹೆಸರನ್ನಿಡಬೇಕು, ನಿಮ್ಮ ಹೆಸರೇನಣ್ಣಾ?' ಎಂದು ಕೇಳುತ್ತಾಳೆ. ಅದಕ್ಕೆ ರಾಣಾ, "ಯಾರಾದ್ರೂ ಸಾಧನೆ ಮಾಡಿರೋರ ಹೆಸರಿಡು, ಕಾಸಿಗೋಸ್ಕರ ಸಾಯಿಸೋ ಕ್ರಿಮಿನಲ್ ಹೆಸರನ್ನಲ್ಲ' ಅಂತಾನೆ. ಕಾರಣ, ಹೆಣ ಉರುಳಿಸಿ, ಹಣ ಎಣಿಸೋ ಒಬ್ಬ ಹಿಟ್ಮ್ಯಾನ್ ಅರ್ಥಾತ್ ಸುಪಾರಿ ಕಿಲ್ಲರ್ ಈ ರಾಣಾ. ಆತನಿಗೆ ಒಂದು ಮಗುವನ್ನು ಕೊಲ್ಲುವ ಸುಪಾರಿ ಸಿಗುತ್ತದೆ. ಆ ಮಗುವಿನಿಂದಲೇ ರಾಣಾನ ಕಲ್ಲು ಮನಸ್ಸು ಕರಗುತ್ತದೆ. ಕೊಲ್ಲಲು ಬಂದವನೇ ಅದರ ರಕ್ಷಣೆಗಿಳಿಯುತ್ತಾನೆ. ಹಾಗಾದರೆ ಆ ಮಗುವನ್ನು ಕೊಲ್ಲಲು ಸುಪಾರಿ ಕೊಟ್ಟವರು ಯಾರು? ಅದಕ್ಕೆ ಕಾರಣವೇನು? ಅಲ್ಲೊಂದು ಪ್ರೇಮಕಥೆಯಿದೆ, ಸೇಡಿನ ಕಿಚ್ಚಿದೆ, ಚೇಸ್, ಆ್ಯಕ್ಷನ್, ಎಮೋಷನ್ಸ್… ಹೀಗೆ ಹಂತಹಂತವಾಗಿ ತೆರೆದುಕೊಳ್ಳುತ್ತಾ ಸಾಗುತ್ತದೆ.
