ಬೇರೆಯವರ ಜತೆಗೆ ಹೋಲಿಸಿಕೊಳ್ಳಬೇಡಿ: ಎಲ್ಲಕ್ಕಿಂತ ಮುಖ್ಯವಾಗಿ ಬದಲಾಗುವುದಕ್ಕೆ ಮನಸ್ಥಿತಿ ಬೇಕು ಎಂಬುದು ಸುದೀಪ್ ನಂಬಿಕೆ. ‘ಎಲ್ಲರೂ ಮಾಡುವ ಒಂದು ದೊಡ್ಡ ತಪ್ಪು ಎಂದರೆ, ಬೇರೆಯವರ ಜತೆಗೆ ಹೋಲಿಸಿಕೊಳ್ಳುವುದು. ಮೊದಲು ನಾವು ನಮ್ಮ ಜತೆಗೆ ಹೋಲಿಸಿಕೊಳ್ಳಬೇಕು. ಹಿಂದೆ ನಾವು ಏನಾಗಿದ್ದೆವು, ಆ ದಿನಗಳಿಗೆ ಹೋಲಿಸಿದರೆ ಈಗ ಹೇಗಿದ್ದೇವೆ, ಈಗೆಷ್ಟು ಯಶಸ್ವಿಯಾಗಿದ್ದೇವೆ ಎಂದು ಕಂಪೇರ್ ಮಾಡಿಕೊಂಡರೆ, ಖುಷಿಯಾಗಬೇಕು. ನಾವು ಈಗೇನಾಗಿದ್ದೇವೋ, ಅದಕ್ಕೆ ತೃಪ್ತಿ ಇರಬೇಕು. ತೃಪ್ತಿ ಇಲ್ಲದಿದ್ದರೆ, ಕೊರಗುತ್ತಲೇ ಇರುತ್ತೇವೆ. ನಾನು ‘ತಾಯವ್ವ’ ಚಿತ್ರದಲ್ಲಿ ನಟಿಸುವಾಗ, ಮುಂದೊಂದು ದಿನ ನಾನು ಹೀಗಾಗಬಹುದು ಎಂದು ಯಾವತ್ತೂ ಅಂದುಕೊಂಡಿರಲಿಲ್ಲ. ಇಷ್ಟು ದಿನ ಬರುತ್ತೀನಿ ಎಂದು ಯೋಚಿಸಿರಲಿಲ್ಲ. ಅಂದಿಗೆ ಹೋಲಿಸಿದರೆ, ಇಂದು ತುಂಬ ಗಳಿಸಿದ್ದೀನೆ. 24 ವರ್ಷಗಳಲ್ಲಿ ಹಲವಾರು ಸಿನಿಮಾಗಳಲ್ಲಿ ನಟಿಸಿದ್ದೇನೆ. ದೊಡ್ಡದೊಡ್ಡ ಹೀರೋಗಳ ಜತೆಗೆ ಅಭಿನಯಿಸಿದ್ದೇನೆ. ಆ ಬಗ್ಗೆ ತೃಪ್ತಿ ಇದೆ. ಇನ್ನೂ ಬೇಕು ಅಂತ ಕೊರಗಿದರೆ, ನಾವು ಏನು ಬೆಳೆದ ಹಾಗಾಯ್ತು. ನಾವು ಪ್ರಬುದ್ಧರಾಗೋದು ವಯಸ್ಸಿನಿಂದಲ್ಲ, ಇಂತಹ ಯೋಚನೆಗಳಿಂದ. ಹಾಗಾಗಿ ನೀವು ಏನು ಗಳಿಸಿದ್ದೀರೋ ಅದರಲ್ಲಿ ಖುಷಿಪಡಿ’ ಎಂದು ಹೇಳಲು ಸುದೀಪ್ ಮರೆಯುವುದಿಲ್ಲ.
