ಸೆಟ್ಟೇರಿತು ಪುಷ್ಪ-2; ಅಲ್ಲು ಅರ್ಜುನ್ ಅನುಪಸ್ಥಿತಿಯಲ್ಲಿ ಚಿತ್ರದ ಮುಹೂರ್ತ

ಕಳೆದ ವರ್ಷ ದಕ್ಷಿಣದಿಂದ ದಂಡೆತ್ತಿ ಹೋಗಿ ಬಾಲಿವುಡ್ ಬಾಕ್ಸ್-ಆಫೀಸ್​ನಲ್ಲಿ ಬಿರುಗಾಳಿ ಎಬ್ಬಿಸಿದ್ದ ಚಿತ್ರ ‘ಪುಷ್ಪ 1 - ದಿ ರೈಸ್’. ತೆಲುಗು, ಕನ್ನಡ, ಹಿಂದಿ, ತಮಿಳು ಹಾಗೂ ಮಲಯಾಳಂ ಭಾಷೆಗಳಲ್ಲಿ ಚಿತ್ರ ತೆರೆಗೆ ಬಂದಿತ್ತು. ಅದರಲ್ಲಿ ಹಿಂದಿ ಭಾಷೆಯೊಂದರಲ್ಲೇ ನೂರು ಕೋಟಿಗೂ ಹೆಚ್ಚು ಗಳಿಕೆ ಆಗುವ ಮೂಲಕ ಚಿತ್ರ ಸೂಪರ್ ಹಿಟ್ ಆಗಿತ್ತು. ಆ ಯಶಸ್ಸಿನ ಬಳಿಕ ಚಿತ್ರದ ಸೀಕ್ವಲ್ ಬಗ್ಗೆ ಸಾಕಷ್ಟು ಕುತೂಹಲವಿತ್ತು. ಆದರೆ, ಕಾರಣಾಂತರಗಳಿಂದ ಚಿತ್ರ ಸೆಟ್ಟೇರುವುದು ತಡವಾಗಿ, ಇದೀಗ ಸೋಮವಾರ ಸರಳ ಪೂಜೆಯ ಮೂಲಕ ಸಿನಿಮಾ ಸೆಟ್ಟೇರಿದೆ. ನಾಯಕ ನಟ ಅಲ್ಲು ಅರ್ಜುನ್ ಗೈರಿನ ನಡುವೆಯೇ ‘ಪುಷ್ಪ 2 - ದಿ ರೂಲ್’ ಸೆಟ್ಟೇರಿದೆ.

‘ಪುಷ್ಪ 2’ ಚಿತ್ರವನ್ನು ದೊಡ್ಡ ಬಜೆಟ್​ನಲ್ಲಿ ನಿರ್ವಿುಸುವುದಕ್ಕೆ ಮೈತ್ರಿ ಮೂವಿ ಮೇಕರ್ಸ್ ಮುಂದಾಗಿದ್ದು, ನಿರ್ದೇಶಕ ಸುಕುಮಾರ್ ಸಾಕಷ್ಟು ತಯಾರಿ ಮಾಡಿಕೊಂಡಿದ್ದಾರೆ. ಸದ್ಯ ಸೀಕ್ವಲ್​ನಲ್ಲಿ್ಲ ಅಲ್ಲು ಅರ್ಜುನ್, ರಶ್ಮಿಕಾ ಮಂದಣ್ಣ, ಫಹದ್ ಫಾಸಿಲ್ ಜತೆಗೆ ದಕ್ಷಿಣ ಭಾರತದ ಹಾಗೂ ಬಾಲಿವುಡ್​ನ ದಿಗ್ಗಜರು ನಟಿಸುವ ನಿರೀಕ್ಷೆಯಿದೆ. ಸೋಮವಾರ ಪೂಜೆಯಷ್ಟೇ ನೆರವೇರಿದ್ದು, ಚಿತ್ರೀಕರಣ ಯಾವಾಗ ಪ್ರಾರಂಭ ಎನ್ನುವುದರ ಬಗ್ಗೆ ಚಿತ್ರತಂಡ ಇನ್ನಷ್ಟೇ ಮಾಹಿತಿ ನೀಡಬೇಕಿದೆ. -ಏಜೆನ್ಸೀಸ್

ಅಮೆರಿಕಾದಲ್ಲಿ ಅಲ್ಲು ಅರ್ಜುನ್: ‘ಪುಷ್ಪ 2’ ಚಿತ್ರದ ಮುಹೂರ್ತಕ್ಕೆ ನಾಯಕ ಅಲ್ಲು ಅರ್ಜುನ್ ಗೈರಾಗುವುದಕ್ಕೂ ಕಾರಣವಿದೆ. ನ್ಯೂಯಾರ್ಕ್​ನಲ್ಲಿ ಭಾರತದ 75ನೇ ಸ್ವಾತಂತ್ರ್ಯ ದಿನಾಚರಣೆಯ ಅಂಗವಾಗಿ ಇಂಡಿಯಾ ಡೇ ಪೆರೇಡ್​ನಲ್ಲಿ ಅವರು ಅತಿಥಿಯಾಗಿದ್ದರು. ಭಾನುವಾರ ನಡೆದ ಮೆರವಣಿಗೆಯಲ್ಲಿ ಅಲ್ಲು ಅರ್ಜುನ್ ಗ್ರ್ಯಾಂಡ್​ ಮಾರ್ಷಲ್ ಆಗಿದ್ದರು. ಮ್ಯಾಡಿಸನ್ ಅವೆನ್ಯೂ ಮಾರ್ಗದುದ್ದಕ್ಕೂ ನಡೆದ ಈ ಮೆರವಣಿಗೆಯಲ್ಲಿ ಐದು ಲಕ್ಷಕ್ಕೂ ಅಧಿಕ ಜನ ಸೇರಿದ್ದರು.

https://www.vijayavani.net/no-entry-in-electoral-roll-shall-be-deleted-on-the-ground-of-non-submission-of-aadhar/

https://www.vijayavani.net/does-goi-introduced-new-guidelines-about-whatsapp-messages/