Out Of Syllabus Review ; ಜೀವನಪಾಠ ಕಲಿಸುವ ಸಿಲಬಸ್​

ಚಿತ್ರ: ಔಟ್​ ಆ್​ ಸಿಲಬಸ್​

ನಿರ್ದೇಶನ: ಪ್ರದಿಪ್​ ದೊಡ್ಡಯ್ಯ

ನಿರ್ಮಾಣ: ಕೆ. ವಿಜಯಕಲಾ ಸುಧಾಕರ್​

ತಾರಾಗಣ: ಪ್ರದಿಪ್​ ದೊಡ್ಡಯ್ಯ, ಹೃತಿಕಾ, ಯೋಗರಾಜ್​ ಭಟ್​, ಮಹಾಂತೇಶ್​, ಜಹಾಂಗೀರ್​, ಅಚ್ಯುತ್​ ಕುಮಾರ್​, ಲಕ್ಷ$್ಮಣ್​ ಮುಂತಾದವರು.

| ಹರ್ಷವರ್ಧನ್​ ಬ್ಯಾಡನೂರು

"ಕಿರಿಕ್​ ಪಾರ್ಟಿ', "ಪದವಿಪೂರ್ವ', "ಹೊಂದಿಸಿ ಬರೆಯಿರಿ', "ಹಾಸ್ಟೆಲ್​ ಹುಡುಗರು ಬೇಕಾಗಿದ್ದಾರೆ', "ಲಾಸ್ಟ್​ ಬೆಂಚರ್ಸ್​'... ಹೀಗೆ ಸ್ಯಾಂಡಲ್​ವುಡ್​ನಲ್ಲಿ ಕಾಲೇಜು ಕಥೆಗಳು ಆಗೊಮ್ಮೆ, ಈಗೊಮ್ಮೆ ಸದ್ದು ಮಾಡುತ್ತಿರುತ್ತವೆ. ಸಾಮಾನ್ಯವಾಗಿ ಕಾಲೇಜು ಹುಡುಗರ ತರಲೆ, ಹದಿಹರೆಯದವರ ತವಕ-ತಲ್ಲಣ, ಕೆಟ್ಟ ಕುತೂಹಲಗಳು, ಆಟ, ಓಟ, ಪಾಠಗಳ ನಡುವಿನ ವೇಗದ ಜೀವನದ ಮೇಲೆ ಕಥೆ ಸಾಗಿದರೂ ಕಾಮಿಡಿ ಎಂಬುದು ಸಾಮಾನ್ಯ ಅಂಶ. ಆದರೆ, ಪ್ರದಿಪ್​ ದೊಡ್ಡಯ್ಯ ನಟಿಸಿ, ನಿರ್ದೇಶಿಸಿರುವ "ಔಟ್​ ಆಫ್​ ಸಿಲಬಸ್​' ಅದೆಲ್ಲವನ್ನೂ ಮೀರಿದ ಕಥೆ ಹೊಂದಿದೆ.

"ಕಾಲೇಜ್​ ಎಂಬುದು ಜೀವನದ ಒಂದು ಚಿಕ್ಕ ಭಾಗವಷ್ಟೇ. ಆದರೆ, ಜೀವನ ಅನ್ನೋದು ಔಟ್​ ಆ್​ ಸಿಲಬಸ್​' ಎಂದು ಕಾಲೇಜು ವೇದಿಕೆಯಲ್ಲಿ ನಿಂತು ವಿದ್ಯಾರ್ಥಿಗಳಿಗೆ ನೀತಿಪಾಠ ಹೇಳುತ್ತಾನೆ ಹಳೆಯ ವಿದ್ಯಾರ್ಥಿ ದೇವ್​ (ಪ್ರದಿಪ್​). ಸಣ್ಣ ವಯಸ್ಸಿನಲ್ಲೇ ಸ್ವಂತ ಕಾಲ ಮೇಲೆ ನಿಂತಿರುವ ಯುವಕನಾತ. ಅದಾಗಲೇ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದ ಆತನ ಕಾರ್ಯಕ್ಷಮತೆಯನ್ನು ಮೆಚ್ಚಿ, ಆ ಕಂಪನಿಯವರೇ ಆತನನ್ನು ಮತ್ತಷ್ಟು ಓದಲು ಫೀಸ್​ ಕಟ್ಟಿ ಕಾಲೇಜಿಗೆ ಕಳುಹಿಸಿರುತ್ತಾರೆ. ಕಾಲೇಜಿನಲ್ಲೂ ಆತನಿಗೆ ಉತ್ತಮ ಹೆಸರಿರುತ್ತದೆ. ಆತನಿಗೆ ಸಹಪಾಠಿ ದಿವ್ಯಾಳ (ಹೃತಿಕಾ) ಮೇಲೆ ಪ್ರೇಮಾಂಕುರವಾಗುತ್ತದೆ. ಓದು ಮುಗಿದ ಬಳಿಕ ದೇವ್​ ಕೆಲಸದ ನಿಮಿತ್ತ ಅಮೆರಿಕಗೆ ಹಾರುತ್ತಾನೆ. ಇತ್ತ ದಿವ್ಯಾ ಒಂಟಿಯಾಗುತ್ತಾಳೆ. ಎರಡು ತೀರಗಳಲ್ಲಿರುವ ಈ ಜೋಡಿಯ ಪ್ರೀತಿ ಮೊಬೈಲ್​ನಲ್ಲಿ ಮುಂದುವರಿಯುತ್ತಿರುತ್ತದೆ. ಆದರೆ, ಎಷ್ಟು ದಿನ? ದೇವ್​ನ ನಂಬಿಕೊಂಡರೆ ಆಗುವುದಿಲ್ಲ ಅಂತ ದಿವ್ಯಾ ಮನೆಯಲ್ಲಿ ನೋಡಿದ ಹುಡುಗನನ್ನು ಮದುವೆಯಾಗಲು ಮುಂದಾಗುತ್ತಾಳೆ. ಮುಂದೆ? ಈ ಜೋಡಿ ಮತ್ತೆ ಒಂದಾಗುತ್ತಾ? ಇಬ್ಬರೂ ಮದುವೆಯಾಗುತ್ತಾರಾ? ಎಂಬುದೇ "ಔಟ್​ ಆಫ್​ ಸಿಲಬಸ್​'.

ಚೊಚ್ಚಲ ನಿರ್ದೇಶನದಲ್ಲಿಯೇ ಸರಳ, ಸುಂದರ ಕಾಲೇಜ್​ ಲವ್​ಸ್ಟೋರಿ ಹೇಳುವ ಪ್ರಯತ್ನ ಮಾಡಿದ್ದಾರೆ ಪ್ರದಿಪ್​. ನಿಧಾನವೆನಿಸಿದರೂ ಸ್ವಲ್ಪ ತಾಳ್ಮೆ ತೋರಿಸಿದರೆ, ಅಚ್ಚುಕಟ್ಟಾಗಿ ನೋಡಿಸಿಕೊಂಡು ಹೋಗುತ್ತದೆ. ಜತೆಗೆ ವಿದ್ಯಾರ್ಥಿಗಳಿಗಾಗಿಯೇ ಅಲ್ಲಲ್ಲಿ ಉತ್ತಮ ಸಂದೇಶಗಳಿವೆ. ಚಿತ್ರಕಥೆ ಮತ್ತಷ್ಟು ಗಟ್ಟಿಯಾಗಿದ್ದರೆ, ಪ್ರೇಕ್ಷಕರಿಗೆ ಕಥೆ ಇನ್ನಷ್ಟು ಹತ್ತಿರವಾಗುತ್ತಿತ್ತು. ಕ್ಲೆಮ್ಯಾಕ್ಸ್​ ಟ್ವಿಸ್ಟ್​ ಚಿತ್ರದ ಹೈಲೈಟ್​. ನಟನೆಯಲ್ಲಿ ಪ್ರದಿಪ್​ ಗಮನ ಸೆಳೆಯುತ್ತಾರೆ. ಗೊಂದಲಗಳ ಗೂಡಿನಲ್ಲಿ ಸಿಲುಕಿರುವ ದಿವ್ಯಾ ಪಾತ್ರದಲ್ಲಿ ಹೃತಿಕಾ ಇಷ್ಟವಾಗುತ್ತಾರೆ. ಜಹಾಂಗೀರ್​, ಯೋಗರಾಜ್​ ಭಟ್​, ಮಹಾಂತೇಶ್​ ಮತ್ತು ಲಕ್ಷ್ಮಣ್​ ಅಲ್ಲಲ್ಲಿ ನಗಿಸುತ್ತಾರೆ. ಹಾಡುಗಳು ಇಂಪಾಗಿ ಕೇಳಿಸುತ್ತವೆ. ಕಾಲೇಜು ವಿದ್ಯಾರ್ಥಿಗಳು ರಿಲೇಟ್​ ಮಾಡಿಕೊಳ್ಳಬಹುದಾದ, ಪ್ರೀತಿಸುವ ಜೋಡಿಗಳು ಕಲಿಯಬಹುದಾದ ಹಲವು ಅಂಶಗಳು ಚಿತ್ರದಲ್ಲಿವೆ. ಹೀಗಾಗಿ "ಔಟ್​ ಆಫ್​ ಸಿಲಬಸ್​' ಒಮ್ಮೆ ನೋಡಲಡ್ಡಿಯಿಲ್ಲ.