‘ಎ ಸುಟೇಬಲ್ ಬಾಯ್ ವೆಬ್​ಸಿರೀಸ್​ನಲ್ಲಿ ಲವ್​ ಜಿಹಾದ್​ಗೆ ಪ್ರೇರಣೆ ನೀಡಲಾಗುತ್ತಿದೆ'; ಬಿಜೆಪಿಯಿಂದ ದೂರು

ಭೋಪಾಲ್: ನೆಟ್​ಫ್ಲಿಕ್ಸ್​ನಲ್ಲಿ ಇತ್ತೀಚೆಗಷ್ಟೇ ಬಿಡುಗಡೆಯಾಗಿದ್ದ ಎ ಸುಟೇಬಲ್ ಬಾಯ್ ಮಿನಿ ವೆಬ್​ ಸಿರೀಸ್​ ಇದೀಗ ಹಲವು ವಿವಾದಕ್ಕೆ ಕಾರಣವಾಗಿದೆ. ಚಿತ್ರದಲ್ಲಿ ಹಿಂದೂಗಳ ಭಾವನಗೆ ದಕ್ಕೆ ತರುವಂತ ದೃಶ್ಯಗಳನ್ನು ಸೇರಿಸಲಾಗಿದೆ ಎಂದು ಆರೋಪಿಸಿ ಬಿಜೆಪಿ ದೂರು ನೀಡಿದೆ.

ಇದನ್ನೂ ಓದಿ: ‘ಆರ್​.ಎಕ್ಸ್​ 100’ ಗೊತ್ತು, ಈ ‘ಆರ್​.ಎಚ್​ 100’ ಏನು?

ಭೋಪಾಲ್​ನ ಬಿಜೆಪಿ ಯುವ ಮೋರ್ಚಾದ ರಾಷ್ಟ್ರೀಯ ಕಾರ್ಯದರ್ಶಿ ಗೌರವ್ ತಿವಾರಿ, ಈ ಸರಣಿಯನ್ನು ಪ್ರಸಾರ ಮಾಡಿದ ನೆಟ್​ಪ್ಲಿಕ್ಸ್ ವಿರುದ್ಧ ರೇವಾ ಠಾಣೆಯಲ್ಲಿ ದೂರು ನೀಡಿದ್ದು, ಎಫ್​ಐಆರ್​ ದಾಖಲಾಗಿದೆ.

ವೆಬ್​ಸಿರೀಸ್​ನಲ್ಲಿ ಐತಿಹಾಸಿಕ ನರ್ಮದ ನದಿಯ ತಟದಲ್ಲಿರುವ ಮಹೇಶ್ವರ ದೇವಸ್ಥಾನದ ಮುಂದೆ ಚುಂಬನದ ದೃಶ್ಯವನ್ನು ಸೇರಿಸಲಾಗಿದೆ. ಮುಸ್ಲಿಂ ಯುವಕ, ಹಿಂದೂ ಮಹಿಳೆಯ ಈ ದೃಶ್ಯ ಲವ್​ ಜಿಹಾದ್​ಗೆ ಪ್ರೇರಣೆ ನೀಡುವಂತಿದೆ. ಈ ಕೂಡಲೇ ಚಿತ್ರದಲ್ಲಿನ ಆ ದೃಶ್ಯವನ್ನು ಕಿತ್ತೆಸೆದು ಕ್ಷಮಾಪಣೆ ಹೇಳಬೇಕೆಂದು ತಿವಾರಿ ದೂರಿನಲ್ಲಿ ನಮೂದಿಸಿದ್ದಾರೆ.

ಇದನ್ನೂ ಓದಿ: ಕಿಯಾರಾಗೆ ಮಿಸ್​ ಆದ ಅವಕಾಶ ಆಲಿಯಾಗೆ ಸಿಕ್ತು!

ಮಧ್ಯ ಪ್ರದೇಶದ ಗೃಹ ಮಂತ್ರಿ ನರೋತ್ತಮ್ ಮಿಶ್ರಾ ಈಗಾಗಲೇ ಈ ಬಗ್ಗೆ ವಿಚಾರಣೆ ನಡೆಸುವಂತೆ ಪೊಲೀಸ್ ಇಲಾಖೆಗೆ ಸೂಚಿಸಿದ್ದು, ನೆಟ್​ಫ್ಲಿಕ್ಸ್​ನ ಮೋನಿಕಾ ಶೆರ್ಗಿಲ್ ಮತ್ತು ಅಂಬಿಕಾ ಖುರಾನಾ ವಿರುದ್ಧ ದೂರು ಸಹ ದಾಖಲಾಗಿದೆ. ಅಂದಹಾಗೆ ವಿಕ್ರಮ್​ ಸೇಟ್​ ಬರೆದ ಎ ಸುಟೇಬಲ್ ಬಾಯ್ ಕಾದಂಬರಿಯನ್ನು ಮೀರಾ ನಾಯರ್ ಮತ್ತು ಶಿಮಿತ್ ಅಮಿನ್​ ನಿರ್ದೇಶನ ಮಾಡಿದ್ದಾರೆ. ಟಬು, ಇಶಾನ್​ ಕಟ್ಟರ್​ ಸೇರಿ ಸಾಕಷ್ಟು ಜನ ಕಲಾವಿದರು ನಟಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/it-is-two-years-without-ambareesh/