Bigg Boss: ಬಿಗ್ ಬಾಸ್ ಮಲಯಾಳಂ ಸೀಸನ್ 8ರ ಇತಿಹಾಸದಲ್ಲೇ ಹಿಂದೆಂದೂ ಕಾಣದ ಅಪರೂಪದ ಹಾಗೂ ಭಾವನಾತ್ಮಕ ಘಟನೆಯೊಂದು ವಾರಾಂತ್ಯದ ಸಂಚಿಕೆಯಲ್ಲಿ ನಡೆದಿರುವುದು ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
ಸೀಸನ್ 8ರಲ್ಲಿ ಸ್ಪರ್ಧಿಯಾಗಿ ದೊಡ್ಮನೆ ಪ್ರವೇಶಿಸಿರುವ ಸೋಷಿಯಲ್ ಮೀಡಿಯಾ ಕಂಟೆಂಟ್ ಕ್ರಿಯೇಟರ್ ನೇಹಾ ಫಾತಿಮಾ ಅವರ ತಂದೆ-ತಾಯಿ ಸ್ವತಃ ವೇದಿಕೆಗೆ ಆಗಮಿಸಿ, ಮಗಳನ್ನು ಈ ಕೂಡಲೇ ಬಿಗ್ ಬಾಸ್ ಮನೆಯಿಂದ ಹೊರಗೆ ಬರುವಂತೆ ಹೇಳಿರುವ ಪ್ರೋಮೋ ಒಂದು ಇದೀಗ ಮಲಯಾಳಂ ಬಿಗ್ಬಾಸ್ ವೀಕ್ಷಕರನ್ನು ಅಕ್ಷರಶಃ ಬೆರಗಾಗಿಸಿದೆ. ಅಷ್ಟಕ್ಕೂ ಆ ಹುಡುಗಿ ಮಾಡಿದ್ದೇನು? ಕಾರ್ಯಕ್ರಮದ ನಿರೂಪಕ, ಹಿರಿಯ ನಟ ಮೋಹನ್ ಲಾಲ್ ಎದುರೇ ಪೋಷಕರು ಕಣ್ಣೀರಿಟ್ಟಿದ್ದೇಕೆ? ಸ್ಪರ್ಧಿ ಮಾಡಿದ ತಪ್ಪಾದರೂ ಏನು? ಎಂಬ ಹಲವರು ಸಾಲು ಸಾಲು ಪ್ರಶ್ನೆಗಳನ್ನು ಮುಂದಿಟ್ಟಿದ್ದಾರೆ.
ಇದೇ ಕಾರಣ?
ವಾರದ ಸಂಚಿಕೆಯಲ್ಲಿ ನೇಹಾ ಫಾತಿಮಾ ತನ್ನ ಸಹ-ಸ್ಪರ್ಧಿ ಸಂತೋಷ್ ರಾಜ್ (ತಾಷಿ)ಗೆ ಪ್ರೀತಿಯ ಪ್ರಸ್ತಾವನೆಯನ್ನು ಮುಂದಿಟ್ಟರು ಎನ್ನಲಾಗಿದ್ದು, ಈ ಬೆಳವಣಿಗೆಯಿಂದ ಪೋಷಕರು ತೀವ್ರ ಅಸಮಾಧಾನಗೊಂಡು ನೇರವಾಗಿ ವಾರಾಂತ್ಯದ ಸಂಚಿಕೆಗೆ ಆಗಮಿಸಿ, ಮಗಳನ್ನು ಬಿಗ್ಬಾಸ್ ಶೋನಿಂದ ಹೊರಬರುವಂತೆ ಕೇಳಿಕೊಂಡಿದ್ದಾರೆ. ಈ ಕುರಿತು ನೇಹಾ ಪೋಷಕರು ಹೇಳಿದ ಮಾತುಗಳಿವು.
