10ನೇ ತರಗತಿ ಓದುತ್ತಿದ್ದಾಗ ಮನೆಯಲ್ಲಿ ಆರ್ಥಿಕ ಸಮಸ್ಯೆ ಎದುರಾಗಿತ್ತು. ಅಕ್ಕಂದಿರ ಮದುವೆ ಸೇರಿ ಅನೇಕ ಜವಾಬ್ದಾರಿಗಳಿದ್ದವು. ಆಗಾಗ ಗಲಾಟೆಗಳೂ ನಡೆಯುತ್ತಿದ್ದವು. ಓದುವ ಕಡೆಗೆ ಆಸಕ್ತಿ ಇಲ್ಲದ ನಾನು, ಮನೆ ಬಿಟ್ಟು ಬೆಂಗಳೂರಿಗೆ ಬಂದೆ. ಯಶವಂತಪುರದ ಗೋಪಾಲ್ ಥಿಯೇಟರ್ನಲ್ಲಿ ಕೆಲಸ ಮಾಡಿದೆ. ಟಿಕೆಟ್ ಕೊಡುವುದು, ಪಾಪ್ಕಾರ್ನ್ ಮಾರುವುದು ... ಹೀಗೆ ಒಂದು ವರ್ಷ ಕೆಲಸ ಮಾಡಿದೆ. ಬಳಿಕ ಬಸ್ ತೊಳೆಯುವ ಕೆಲಸ, ಪೀಣ್ಯದ ಗಾರ್ವೆಂಟ್ಸ್ನಲ್ಲಿ ಆಫೀಸ್ ಬಾಯ್, ಚೌಟ್ರಿಗಳಲ್ಲಿ ಹೂವಿನ ಅಲಂಕಾರ ... ಹೀಗೆ ಹಲವು ಕೆಲಸಗಳನ್ನು ಮಾಡಿ ಅಮ್ಮನ ಜತೆ ಮತ್ತೆ ಊರಿಗೆ ಹೋದೆ. ನೇತಾಜಿ ಸಂಘ ಸೇರಿಕೊಂಡೆ. ಮಂಡ್ಯದ ಜನರೂ ಜತೆಯಾದರು. ಜನದನಿ ಮೂಲಕ ಬೀದಿ ನಾಟಕಗಳಲ್ಲಿ ಭಾಗವಹಿಸಿ ನೀನಾಸಂನಲ್ಲಿ ಎರಡು ವರ್ಷ ನಟನೆ ಕಲಿತೆ. ಎಲ್ಲೆ ಹೋದರೂ ಸಂತೋಷ ಕಳೆದುಕೊಂಡು ಬದುಕಲಿಲ್ಲ.
