ನನ್ನ ದೇಹ ತೂಕ 100 KG ತಲುಪಿತ್ತು ಆದ್ರೆ ಥಾಯ್ಲೆಂಡ್​ ಪ್ರವಾಸ ಎಲ್ಲವನ್ನು ಬದಲಿಸಿತು ಎಂದ ಮೋಹನ್​ಲಾಲ್​ ಪುತ್ರಿ! Vismaya Mohanlal

Vismaya Mohanlal : ಮಲಯಾಳಂ ಸಿನಿಮಾ ರಂಗದ ಸೂಪರ್‌ಸ್ಟಾರ್ ಮೋಹನ್‌ಲಾಲ್ ಪುತ್ರಿ ವಿಸ್ಮಯ 'ತುಡುಕ್ಕಮ್​' ಚಿತ್ರದ ಮೂಲಕ ಮಾಲಿವುಡ್​ಗೆ ಪದಾರ್ಪಣೆ ಮಾಡಲು ಸಿದ್ಧರಾಗಿದ್ದಾರೆ. ಈ ಚಿತ್ರವು ಆಗಸ್ಟ್ 7 ರಂದು ತೆರೆಕಾಣಲಿದೆ. ಈ ಸಿನಿಮಾದ ಪ್ರಚಾರದಲ್ಲಿ ತೊಡಗಿರುವ ವಿಸ್ಮಯ, ತಮ್ಮ ಜೀವನದಲ್ಲಿ ಆದ ದೊಡ್ಡ ಬದಲಾವಣೆಯ ಬಗ್ಗೆ ಇತ್ತೀಚೆಗೆ ಮುಕ್ತವಾಗಿ ಮಾತನಾಡಿದ್ದಾರೆ. ಥಾಯ್ಲೆಂಡ್‌ಗೆ ತೆರಳಿದ್ದ ರಜೆಯ ಪ್ರವಾಸವು ತನ್ನ ಜೀವನವನ್ನು ಉತ್ತಮ ರೀತಿಯಲ್ಲಿ ಬದಲಾಯಿಸಿತು ಎಂದು ವಿಸ್ಮಯ ಬಹಿರಂಗಪಡಿಸಿದ್ದಾರೆ. ಎರಡು ವಾರಗಳ ಪ್ರವಾಸವು ಒಂಬತ್ತು ತಿಂಗಳ ಕಾಲದ ವಾಸವಾಗಿ ಬದಲಾಯಿತು ಎಂದು ನಟಿ ತಿಳಿಸಿದ್ದಾರೆ.

ಥಾಯ್ಲೆಂಡ್‌ನಲ್ಲಿ ನಾನು ಉಳಿದುಕೊಂಡಿದ್ದ ಸಮಯದಲ್ಲಿ ಮುಯೇ ಥಾಯ್ (Muay Thai) ಸಮರ ಕಲೆಯ ಪರಿಚಯವಾಯಿತು. ಇದು ದೈಹಿಕ ಫಿಟ್‌ನೆಸ್ ನೀಡುವುದಲ್ಲದೆ ಮಾನಸಿಕ ಸಾಮರ್ಥ್ಯ ಹಾಗೂ ಶಿಸ್ತನ್ನು ಸುಧಾರಿಸಲು ಸಹಾಯ ಮಾಡುತ್ತದೆ ಎಂದು ವಿಸ್ಮಯ ಹೇಳಿದ್ದಾರೆ. ಮುಯೇ ಥಾಯ್ ಥಾಯ್ಲೆಂಡ್‌ನ ರಾಷ್ಟ್ರೀಯ ಕ್ರೀಡೆಯಾಗಿದೆ. ಇದು ಮೊಣಕಾಲುಗಳು ಮತ್ತು ಮೊಣಕೈಗಳನ್ನು ಬಳಸುವುದರಿಂದ ಇದನ್ನು 'ಎಂಟು ಅಂಗಗಳ ಕಲೆ' ಎಂದೂ ಕರೆಯಲಾಗುತ್ತದೆ.

ಇದು ನನ್ನ ಜೀವನದ ಅತ್ಯುತ್ತಮ ಅನುಭವಗಳಲ್ಲಿ ಒಂದಾಗಿದೆ. ಆ ಸಮಯದಲ್ಲಿ ನಾನು ಫಿಟ್ ಆಗಿರಲಿಲ್ಲ. ಫಿಟ್‌ನೆಸ್ ಮತ್ತು ತೂಕ ಎಂಬುದು ಎರಡು ಬೇರೆ ಬೇರೆ ವಿಷಯಗಳು. ಒಬ್ಬ ವ್ಯಕ್ತಿಯು 98 ಕೆಜಿ ತೂಕವಿದ್ದರೂ ಫಿಟ್ ಆಗಿರಬಹುದು. ಆದರೆ ನಾನು ಸುಮಾರು 100 ಕೆಜಿ ಇದ್ದಾಗ ಮೆಟ್ಟಿಲು ಹತ್ತುವುದಕ್ಕೂ ಹೆಣಗಾಡುತ್ತಿದ್ದೆ. ನನಗೆ ತೀವ್ರವಾಗಿ ಉಸಿರಾಟದ ತೊಂದರೆ ಉಂಟಾಗುತ್ತಿತ್ತು. ಆಗಲೇ ನಾನು ಥಾಯ್ಲೆಂಡ್‌ಗೆ ತೆರಳಿದೆ. ಹೊಸದನ್ನು ಪ್ರಯತ್ನಿಸೋಣ ಎಂದುಕೊಂಡೆ. ಹಾಗೆ ನಾನು ಕೊಹ್ ಸಮುಯಿ (Koh Samui) ದ್ವೀಪದಲ್ಲಿರುವ 'ಫಿಟ್ಕೊ' (Fitco) ಎನ್ನುವ ಮುಯೇ ಥಾಯ್ ತರಬೇತಿ ಕೇಂದ್ರಕ್ಕೆ ಸೇರಿಕೊಂಡೆ ಎಂದು ವಿಸ್ಮಯ ಹೇಳಿದ್ದಾರೆ.

ಆರಂಭದಲ್ಲಿ ನನಗೆ ಅದು ಇಷ್ಟವಾಗಲಿಲ್ಲ. ತರಬೇತಿಯು ಬಹಳ ಕಠಿಣವಾಗಿತ್ತು. ಆದರೆ, ಕೋವಿಡ್ ಹರಡಿದ ನಂತರ ಎಲ್ಲಾ ಯೋಜನೆಗಳು ಬದಲಾದವು. ನಾನು ಮನೆಗೆ ಹೋಗುವ ಬದಲು ಥಾಯ್ಲೆಂಡ್‌ನಲ್ಲೇ ಉಳಿಯಲು ನಿರ್ಧರಿಸಿದೆ. ಆ ನಂತರವೇ ನಾನು ತರಬೇತಿಯನ್ನು ನಿಜವಾಗಿಯೂ ಆನಂದಿಸಲು ಆರಂಭಿಸಿದೆ.

ಮುಯೇ ಥಾಯ್ ಮಾಡುವಾಗ ಇತರ ಎಲ್ಲಾ ಯೋಚನೆಗಳು ಮನಸ್ಸಿನಿಂದ ಮಾಯವಾಗುತ್ತವೆ. ನಿಮ್ಮ ಸಂಪೂರ್ಣ ಗಮನವು ಆ ಕ್ಷಣದ ಕೆಲಸದ ಮೇಲೆ ಮಾತ್ರ ಇರುತ್ತದೆ. ಇದು ನಿಮ್ಮ ಮನಸ್ಸನ್ನು ಕೂಡ ಬದಲಾಯಿಸುತ್ತದೆ. ನನ್ನ ತರಬೇತುದಾರರು ನನಗೆ 10 ಒದೆಗಳನ್ನು ಮಾಡಲು ಹೇಳಿದರೆ, ನಾನು ಒಂಬತ್ತನೇ ಒದೆಗೆ ನಿಲ್ಲಿಸುತ್ತಿದ್ದೆ. ಆಗ ಅವರು, "ನೀನು ಯಾವಾಗಲೂ ಕಡೆಯ ಒದೆಗೆ ಸ್ವಲ್ಪ ಮುಂಚೆಯೇ ನಿಲ್ಲಿಸುತ್ತಿರುವೆ, ಮತ್ತೊಂದು ಒದೆ ಮಾಡು" ಎಂದು ಹೇಳುತ್ತಿದ್ದರು. ಆ ಬಳಿಕ ಅವರು ನನ್ನಿಂದ ಹೆಚ್ಚುವರಿಯಾಗಿ 30 ಒದೆಗಳನ್ನು ಮಾಡಿಸುತ್ತಿದ್ದರು. ಆ ಅನುಭವವು ನನಗೆ ಬೇರೆ ಪಾಠವೊಂದನ್ನು ಕಲಿಸಿತು. ನಾನು ಆರಂಭಿಸಿದ್ದನ್ನು ಯಾವುದೇ ಕಾರಣಕ್ಕೂ ಪೂರ್ಣಗೊಳಿಸಬೇಕು ಎಂಬುದನ್ನು ಅದು ನನಗೆ ಕಲಿಸಿಕೊಟ್ಟಿತು. ಅದಕ್ಕಾಗಿ ನಾನು ಸದಾ ಕೃತಜ್ಞಳಾಗಿರುತ್ತೇನೆ. ಈಗ ನನಗೆ ಮುಯೇ ಥಾಯ್ ಅಂದರೆ ತುಂಬಾ ಇಷ್ಟ.

ತೂಕ ಇಳಿಸಿಕೊಳ್ಳುವುದು ನನ್ನ ಗುರಿಯೇ ಆಗಿರಲಿಲ್ಲ. ನಾನು ಕೇವಲ ಪ್ರಯಾಣಿಸಲು ಬಯಸಿದ್ದೆ. ಮೊದಲು ಎರಡು ಅಥವಾ ಮೂರು ವಾರಗಳನ್ನು ಅಲ್ಲಿ ಕಳೆಯುತ್ತೇನೆ ಎಂದುಕೊಂಡಿದ್ದೆ. ಆದರೆ ಕೊನೆಗೆ ಅಲ್ಲಿ ಎಂಟು ಅಥವಾ ಒಂಬತ್ತು ತಿಂಗಳುಗಳ ಕಾಲ ಉಳಿಯುವಂತಾಯಿತು. ನಾನು ಥಾಯ್ಲೆಂಡ್‌ ಅನ್ನು ಅತಿಯಾಗಿ ಪ್ರೀತಿಸತೊಡಗಿದೆ. ಅಲ್ಲಿ ನನಗೆ ಅಪಾರ ಸ್ವಾತಂತ್ರ್ಯದ ಅನುಭವವಾಯಿತು. ನಾನು ನನ್ನ ಬೈಕ್ ತೆಗೆದುಕೊಂಡು ಎಲ್ಲಿಗೆ ಬೇಕಾದರೂ ಹೋಗಬಹುದಿತ್ತು. ಆ ಜೀವನಶೈಲಿ ನನಗೆ ತುಂಬಾ ಇಷ್ಟವಾಯಿತು ಎಂದು ವಿಸ್ಮಯ ತಿಳಿಸಿದ್ದಾರೆ, (ಏಜೆನ್ಸೀಸ್​).