ಇದು ಬಪ್ಪಿ ಲಹರಿ ಅವರ ಒಂದು ಭಾಗವಷ್ಟೇ. ಬಹುಶಃ ಇಷ್ಟೇ ಆಗಿದ್ದರೆ, ಅವರು ಹೆಚ್ಚು ಸುದ್ದಿಯಾಗುತ್ತಿರಲಿಲ್ಲ, ಜನಪ್ರಿಯರೂ ಆಗುತ್ತಿರಲಿಲ್ಲ. ಬಪ್ಪಿದಾ ಎಂದೇ ಪ್ರೀತಿಯಿಂದ ಕರೆಸಿಕೊಳ್ಳುತ್ತಿದ್ದ ಬಪ್ಪಿ ಲಹರಿ ಜನಪ್ರಿಯರಾಗಿದ್ದು ಅವರ ಸಂಗೀತದಿಂದ. ಅದರಲ್ಲೂ ಡಿಸ್ಕೋ ಶೈಲಿಯ ಸಂಗೀತದಿಂದ. ಅವರಿಗೂ ಮುನ್ನ ಬಾಲಿವುಡ್ನಲ್ಲಿ ಶಂಕರ್ ಜೈಕಿಶನ್, ಆರ್.ಡಿ. ಬರ್ಮನ್ ಮುಂತಾದವರು ಪಾಶ್ಚಿಮಾತ್ಯ ಸಂಗೀತವನ್ನು ಪರಿಚಯಿಸಿದ್ದರು. ಆದರೆ, ಪಾಶ್ಚಿಮಾತ್ಯ ದೇಶಗಳಲ್ಲಿ ಅಸ್ತಿತ್ವದಲ್ಲಿದ್ದ ಡಿಸ್ಕೋ ಸಂಗೀತವನ್ನು ಭಾರತದಲ್ಲಿ ಜನಪ್ರಿಯಗೊಳಿಸಿದವರು ಬಪ್ಪಿದಾ ಎಂದರೆ ತಪ್ಪಿಲ್ಲ. ಹಾಗೆ ನೋಡಿದರೆ, ಬಪ್ಪಿ ಲಹರಿ ಅವರಿಗೆ ಜನಪ್ರಿಯತೆ ತಂದುಕೊಟ್ಟಿದ್ದೂ ಡಿಸ್ಕೋ ಸಂಗೀತವೇ. 1973ರಲ್ಲಿ ಬಿಡುಗಡೆಯಾದ ‘ನನ್ಹಾ ಶಿಕಾರಿ’ ಎಂಬ ಚಿತ್ರದ ಮೂಲಕ ಅವರು ಸಂಗೀತ ನಿರ್ದೇಶಕರಾದರೂ, ಜನಪ್ರಿಯರಾಗುವುದಕ್ಕೆ ಹಲವು ವರ್ಷಗಳ ಕಾಲ ಕಾಯಬೇಕಾಯಿತು. ಹಲವು ಚಿತ್ರಗಳಿಗೆ ಸಂಗೀತ ಸಂಯೋಜಿಸ ಬೇಕಾಯಿತು. ಆದರೆ, ಯಾವ ಚಿತ್ರವೂ ಅವರಿಗೆ ದೊಡ್ಡ ಯಶಸ್ಸು ನೀಡಲಿಲ್ಲ. ಈ ಸಂದರ್ಭದಲ್ಲಿ ಬಂದಿದ್ದೇ ‘ಡಿಸ್ಕೋ ಡ್ಯಾನ್ಸರ್’. ಮಿಥುನ್ ಚಕ್ರವರ್ತಿ ಅಭಿನಯದ ಈ ಚಿತ್ರಕ್ಕಾಗಿ ಬಪ್ಪಿದಾ ಸಂಯೋಜಿಸಿದ ‘ಐ ಆಮ್ ಎ ಡಿಸ್ಕೋ ಡ್ಯಾನ್ಸರ್ ...’, ‘ಜಿಮ್ಮಿ ಜಿಮ್ಮಿ ಜಮ್ಮಿ ಆಜಾ ...’ ಮುಂತಾದ ಡಿಸ್ಕೋ ಹಾಡುಗಳು ಅದೆಷ್ಟು ಜನಪ್ರಿಯವಾಯಿತೆಂದರೆ, ಆ ನಂತರ ಅವರೆಂದೂ ಹಿಂದಿರುಗಿ ನೋಡಲಿಲ್ಲ. ಅಲ್ಲಿಂದ ‘ನಮಕ್ ಹಲಾಲ್’, ‘ಶರಾಬಿ’, ‘ಹಿಮ್ಮತ್ವಾಲಾ’ ಸೇರಿ ಮುಂದಿನ 10 ವರ್ಷಗಳಲ್ಲಿ ಹಲವು ಚಿತ್ರಗಳಿಗೆ ಸಂಗೀತ ಸಂಯೋಜಿಸಿದರು. ‘ಪಗ್ ಘುಂಘುರು ಬಾಂಧ್’, ‘ರಾತ್ ಬಾಕಿ ಬಾತ್ ಬಾಕಿ’, ‘ಜವಾ-ನೆ-ಜಾನೆಮನ್’, ‘ದೇ ದೇ ಪ್ಯಾರ್ ದೇ’, ‘ಪ್ಯಾರ್ ಬಿನಾ ಚೈನ್ ಕಹಾ ರೇ’, ‘ಇಂಥಹ ಹೋ ಗಯೀ ಮೇರೆ ಪ್ಯಾರ್ ಕೀ’, ‘ನೈನೋ ಮೇ ಸಪ್ನಾ’ ಮುಂತಾದ ಹಲವು ಸೂಪರ್ ಹಿಟ್ ಹಾಡುಗಳನ್ನು ನೀಡಿದರು. ಕ್ರಮೇಣ 90ರ ದಶಕದ ಕೊನೆಯ ಹೊತ್ತಿಗೆ ಜನರ ಅಭಿರುಚಿ ಬದಲಾಗುತ್ತಿದ್ದಂತೆಯೇ, ಹೊಸಹೊಸ ಸಂಗೀತ ನಿರ್ದೇಶಕರು ಬರುತ್ತಿದ್ದಂತೆ ಬಪ್ಪಿ ಲಹರಿ ಮಂಕಾದರು.
