ಹಾಗಾದರೆ ಕಥೆ ಏನು? ಇಬ್ಬರು ಪ್ರೇಮಿಗಳ ನಡುವೆ ಮುನಿಸು, ಅನುಮಾನ ಭುಗಿಲೆದ್ದಾಗ ಏನೆಲ್ಲ ಘಟಿಸುತ್ತದೆ? ಕೊನೆಗೆ ಅದು ಬಂದು ಎಲ್ಲಿಗೆ ನಿಲ್ಲುತ್ತದೆ ಎಂಬುದೇ ಈ ಸಿನಿಮಾದ ಒಂದೆಳೆ. ಪ್ರೀತಿಗಿಂತ ಸಂಬಂಧವೂ ಮುಖ್ಯ ಎಂಬ ಅಂಶವನ್ನೂ ನಿರ್ದೇಶಕ ಭರತ್ ನಾವುಂದ ಸಿನಿಮಾದಲ್ಲಿ ಬಿತ್ತಿದ್ದಾರೆ. ಅದ್ಯಾವುದೂ ಹೊಸದಲ್ಲದಿದ್ದರೂ ಹಳೆಯದೆಂದು ಅನಿಸುವುದಿಲ್ಲ! ಈ ಹಿಂದಿನ ಎರಡು ಸಿನಿಮಾಗಳಿಗೆ ಹೋಲಿಕೆ ಮಾಡಿದರೆ, ಮನುರಂಜನ್ ಅವರದ್ದು ‘ಮುಗಿಲ್ಪೇಟೆ’ಯಲ್ಲಿ ಮಾಗಿದ ಅಭಿನಯ. ಕೇವಲ ಅದೊಂದಷ್ಟೇ ಅಲ್ಲ ಸಾಹಸ ದೃಶ್ಯಗಳಲ್ಲಿಯೂ ಅವರನ್ನು ರಗಡ್ ಆಗಿ ತೋರಿಸಿದ್ದಾರೆ ಸಾಹಸ ನಿರ್ದೇಶಕ ರವಿವರ್ಮ. ಆಗಾಗ ಒಂದು ಕೋನದಿಂದ ಥೇಟ್ ಅಪ್ಪನಂತೇ ಹಾವಭಾವ ತೋರಿಸುತ್ತಾರೆ ಮನುರಂಜನ್. ಅಪ್ಪನ ಸಿನಿಮಾ ಟೈಟಲ್ಗಳೂ ಪದೇಪದೆ ಕೇಳಿಸುತ್ತವೆ. ಇನ್ನು ನಾಯಕಿ ಖಯಾದು ಲೋಹರ್ ಪಾತ್ರ ಬೇಡಿದ್ದನ್ನು ಅಚ್ಚುಕಟ್ಟಾಗಿ ನೀಡಿದ್ದಾರೆ. ಸಾಧು ಕೋಕಿಲ ಅವರ ಹತ್ತು ಹಲವು ವೇಷಗಳು ನಗು ಉಕ್ಕಿಸುತ್ತವೆ. ಚಿತ್ರದಲ್ಲಿ ರೊಮ್ಯಾಂಟಿಕ್ ಹಾಡಿದ್ದರೂ, ಕುಣಿತಕ್ಕೆ ಆಸ್ಪದ ಇಲ್ಲ. ‘ತಾರೀಫು ಮಾಡಲು ...’ ಹಾಡು ಕಿವಿಗಿಂಪು ನೀಡುವುದರ ಜತೆಗೆ ಅದರ ಮೇಕಿಂಗ್ ಗಮನಸೆಳೆಯುತ್ತದೆ. ಇದೆಲ್ಲವನ್ನು ಹೊರತುಪಡಿಸಿದರೆ, ಚಿತ್ರದಲ್ಲಿ ಮುಗಿಲ್ಪೇಟೆಯೇ ಮಿಸ್ಸಿಂಗ್! ಅದರ ಅಂದ, ಅಲ್ಲಿನ ಸೊಗಡನ್ನೇ ನಿರ್ದೇಶಕರು ಸಿನಿಮಾದಲ್ಲಿ ತೋರಿಸದಿರುವುದು ವಿಪರ್ಯಾಸ.
