ಈ ವರ್ಷ ಬಾಕ್ಸ್​ ಆಫೀಸಿನಲ್ಲಿ ಮಕಾಡೆ ಮಲಗಿದ ಸಿನಿಮಾಗಳು; ಮೊದಲನೇ ಸ್ಥಾನದಲ್ಲಿರುವ ಸಿನಿಮಾವನ್ನು ನೀವು ಊಹಿಸಲು ಸಾಧ್ಯವಿಲ್ಲ! | Flop Movies

Flop Movies : ಈಗ ನಾವು ವರ್ಷದ ಕೊನೆಯ ತಿಂಗಳಲ್ಲಿದ್ದು, ಇನ್ನೊಂದು ಹತ್ತು ದಿನ ಕಳೆದರೆ ಹೊಸ ವರ್ಷವನ್ನು ಪ್ರವೇಶಿಸಲಿದ್ದೇವೆ. ಈ ವರ್ಷ ಭಾರತೀಯ ಚಿತ್ರರಂಗದಲ್ಲಿ ಸರಿಸುಮಾರು 1500 ಕ್ಕೂ ಹೆಚ್ಚಿನ ಸಿನಿಮಾಗಳು ತೆರೆಕಂಡಿದ್ದು, ಅದರಲ್ಲಿ ಹತ್ತೋ-ಇಪ್ಪತ್ತೋ ಸಿನಿಮಾಗಳು ಮಾತ್ರ ಪ್ರೇಕ್ಷಕರ ಮನವನ್ನು ಗೆದ್ದಿದ್ದರೆ, ಬೆರಳೆಣಿಕೆಯಷ್ಟು ಸಿನಿಮಾಗಳು ಮನದ ಜತೆಗೆ ಮನಿ(ಹಣ) ಯನ್ನು ಗಳಿಸಿವೆ. ಕಾಕತಾಳೀಯವೋ ಏನೋ ಅತ್ಯಧಿಕ ಬಜೆಟ್​ನೊಂದಿಗೆ ನಿರ್ಮಾಣವಾದ ಸಿನಿಮಾಗಳೇ ಅತೀ ಹೆಚ್ಚು ಪ್ಲಾಪ್​ ಆಗಿದ್ದು, ಹಣ, ಹೆಸರಾಂತ ತಾರಾಗಣ ಇವುಗಳ ಬದಲು ಬಲವಾದ ಚಿತ್ರಕತೆ ಮತ್ತು ಸಹಜ ಅಭಿನಯವುಳ್ಳ ಸಿನಿಮಾಗಳು ಬಾಕ್ಸ್​ ಆಫೀಸನ್ನು ಕೊಳ್ಳೆ ಹೊಡೆದಿವೆ. ಈ ಸಿನಿಮಾದ ಬಜೆಟ್ ಇಷ್ಟು ಕೋಟಿಯಂತೆ! ಖ್ಯಾತನಾಮ ಕಲಾವಿದರ ದಂಡೆ ಇದೆ ಈ ಸಿನಿಮಾ ಚಿತ್ರರಂಗದಲ್ಲಿ ಮೈಲಿಗಲ್ಲನ್ನು ನಿರ್ಮಿಸಲಿದೆ ಎಂದು ಅಂದಾಜಿಸಿದ ಸಿನಿಮಾಗಳೇ ಮಕಾಡೆ ಮಲಗಿವೆ. ಇಂದು ಭಾರಿ ನೀರಿಕ್ಷೆಯೊಂದಿಗೆ ತೆರೆಕಂಡು ಪ್ಲಾಪ್​ ಆದ ಸಿನಿಮಾಗಳ ಬಗ್ಗೆ ತಿಳಿಯೋಣ.

ವಾರ್ 2 ಸಿನಿಮಾವು ಮೂಲತಃ ಹಿಂದಿ ಭಾಷೆಯಲ್ಲಿ ತೆರೆಕಂಡಿತ್ತು. ಇದನ್ನು ಪ್ಯಾನ್​ ಇಂಡಿಯಾ ಸಿನಿಮಾವಾಗಿ ನಿರ್ಮಿಸಲಾಗಿದ್ದು, ಹೃತಿಕ್ ರೋಷನ್ ಮತ್ತು ಜೂನಿಯರ್ ಎನ್.ಟಿ.ಆರ್ ಮುಖ್ಯ ಭೂಮಿಕೆಯಲ್ಲಿ ನಟಿಸಿದ್ದರು. ಬಹು ದೊಡ್ಡ ಮೊತ್ತದ ಬಜೆಟ್​ನಲ್ಲಿ ನಿರ್ಮಾಣವಾದ ಈ ಸಿನಿಮಾ ಹಾಕಿದ ಬಂಡವಾಳವನ್ನು ಸಹ ಗಳಿಸಲು ಸಾಧ್ಯವಾಗಲಿಲ್ಲ. ಸಿನಿಮಾದ ಕಥೆ, ಸ್ಕ್ರಿಪ್ಟ್ ಮತ್ತು ದೃಶ್ಯ ಸಂಯೋಜನೆಗಳು ಪ್ರೇಕ್ಷಕರನ್ನು ಸೆಳೆಯುವಲ್ಲಿ ವಿಫಲವಾದವು.

ಗೇಮ್ ಚೆಂಜರ್ ಇದು ಮೂಲತಃ ತೆಲಗು ಸಿನಿಮಾವಾಗಿದ್ದು, ಖ್ಯಾತನಟ ರಾಮ್​ಚರಣ್​ ನಾಯಕನಟನಾಗಿ ಅಭಿನಯಿಸಿದ್ದರು. 400-450 ಕೋಟಿ ಬಜೆಟ್​ನಲ್ಲಿ ನಿರ್ಮಾಣವಾದ ಈ ಚಿತ್ರ 130-150 ಕೋಟಿ ಮಾತ್ರ ಗಳಿಸಿಲು ಸಾಧ್ಯವಾಯಿತು. ದೊಡ್ಡ ಮಟ್ಟದ ಹೈಪ್​ಹೊಂದಿದ್ದ ಈ ಸಿನಿಮಾದ ಕಥೆಯಲ್ಲಿ ಸ್ಪಷ್ಟತೆ ಕೊರತೆ ಇದ್ದ ಕಾರಣ ಈ ಸಿನಿಮಾ ಪ್ಲಾಪ್ ಪಟ್ಟಿಯನ್ನು ಸೇರಿದೆ.

ಥಗ್ ಲೈಫ್ ಇದು ಮೂಲತಃ ತಮಿಳು ಭಾಷೆಯಲ್ಲಿ ತೆರೆಕಂಡಿತು. ದಕ್ಷಿಣ ಭಾರತದ ಖ್ಯಾತ ನಟ ಕಮಲ್ ಹಾಸನ್ ಮತ್ತು ದಕ್ಷಿಣ ಭಾರತದ ಖ್ಯಾತ ನಿರ್ದೇಶಕ ಮನಿರತ್ನಂ ಕಾಂಭಿನೇಷನ್​ನಲ್ಲಿ ಮೂಡಿಬಂದ ಈ ಸಿನಿಮಾ ಪ್ರೇಕ್ಷಕರನ್ನು ರಂಜಿಸುವಲ್ಲಿ ವಿಫಲವಾಯಿತು. ಹಾಗೆಯೇ ಕನ್ನಡ ಭಾಷೆಯ ಬಗ್ಗೆ ಮಾತನಾಡಿದಕ್ಕಾಗಿ ಕರ್ನಾಟಕದಲ್ಲಿ ಸಿನಿಮಾ ಬಿಡುಗಡೆಗೆ ನಿರ್ಬಂಧವನ್ನು ಹೇರಲಾಯಿತು.

ಇದನ್ನೂ ಓದಿ : ಈ ವರ್ಷ ಅತಿಹೆಚ್ಚು ಹಣಗಳಿಸಿದ ಟಾಪ್ 10 ಸಿನಿಮಾಗಳು; ಮೊದಲ ಸ್ಥಾನ ಪಡೆದ ಸಿನಿಮಾ ಯಾವುದು ಗೊತ್ತೆ?

ಸಕಂದರ್ ಇದು ಮೂಲತಃ ಹಿಂದಿ ಭಾಷೆಯ ಸಿನಿಮಾವಾಗಿದ್ದು ಬಾಲಿವುಡ್​ನ ಸೂಪರ್ ಸ್ಟಾರ್​ ಸಲ್ಮಾನ್​ ಖಾನ್​ ನಾಯಕ ನಟರಾಗಿ ನಟಿಸಿದ್ದರು. ಇವರೊಟ್ಟಿಗೆ ರಶ್ಮಿಕಾ ಮಂದಣ್ಣ , ಕಾಜಲ್ ಅಗರವಾಲ್​ ಮತ್ತು ಸತ್ಯಜೀತ್ ಸಹ ತೆರೆಹಂಚಿಕೊಂಡಿದ್ದರು. ಆದರೆ ಈ ಸಿನಿಮಾದ ಕಥೆ ಪ್ರೇಕ್ಷಕರ ಮನವನ್ನು ಗೆಲ್ಲುವುದರಲ್ಲಿ ಸೋತಿತು.

ಭಾಗಿ 4 ಇದು ಮೂಲತಃ ಹಿಂದಿ ಭಾಷೆಯ ಸಿನಿಮಾವಾಗಿದೆ. ಈ ಸಿನಿಮಾದಲ್ಲಿ ಟೈಗರ್ ಶ್ರಾಫ್, ಸಂಜಯ್ ದತ್, ಸೌರವ್ ಸಚ್ಚದೇವಾ ಮೊದಲಾದ ದೊಡ್ಡ ತಾರಾಗಣವಿದ್ದರೂ ಸಹ ಕಥೆ, ಸ್ಕ್ರಿಪ್ಟ್ ಮತ್ತು ನಿರ್ದೇಶನ ಬಹಳ ಕಳಪೆಯಾಗಿದ್ದರಿಂದ ಎಷ್ಟೇ ದೊಡ್ಡ ತಾರಾಗಣವನ್ನು ಹೊಂದದ್ದರು ಸಹ ಈ ಸಿನಿಮಾ ಬಾಕ್ಸ್ ಆಫೀಸಿನಲ್ಲಿ ಮಕಾಡೆ ಮಲಗಿತು.(ಏಜನ್ಸೀಸ್).