ಬೆಂಗಳೂರು: ‘ಇದು ಸ್ಪೋರ್ಟ್ಸ್ ಚಿತ್ರ ಅಲ್ಲ ...’ ಹಾಗಂತ ಮೊದಲೇ ಹೇಳಿಬಿಟ್ಟರು ನಿರ್ದೇಶಕ ಸತ್ಯಪ್ರಕಾಶ್. ಅವರಿಗೆ ಗೊತ್ತು, ಚಿತ್ರಕ್ಕೆ ‘ಮ್ಯಾನ್ ಆಫ್ ದಿ ಮ್ಯಾಚ್’ ಎಂಬ ಹೆಸರಿಟ್ಟ ಮೇಲೆ, ಇದೊಂದು ಕ್ರೀಡೆಯ ಕುರಿತಾದ ಚಿತ್ರ ಎಂದು ಎಲ್ಲರೂ ತೀರ್ಮಾನಕ್ಕೆ ಬಂದುಬಿಡುತ್ತಾರೆ ಎಂದು. ಹಾಗಾಗಿ, ಇದು ಕ್ರೀಡಾಚಿತ್ರ ಅಲ್ಲ ಎನ್ನುವುದರ ಜತೆಗೆ ತಮ್ಮ ಮಾತಿಗೆ ವಿವರಣೆಯನ್ನೂ ಅವರು ಕೊಟ್ಟರು. ಇದೆಲ್ಲ ಆಗಿದ್ದು ಅವರದೇ ನಿರ್ದೇಶನದ ‘ಮ್ಯಾನ್ ಆಫ್ ದಿ ಮ್ಯಾಚ್’ ಚಿತ್ರದ ಮುಹೂರ್ತ ಸಮಾರಂಭದಲ್ಲಿ. ಆಗಷ್ಟೇ ಹಂಸಲೇಖ, ಧನಂಜಯ, ಉಮಾಪತಿ ಶ್ರೀನಿವಾಸ್ ಗೌಡ ಸೇರಿ ಹಲವು ಗಣ್ಯರು ಮುಹೂರ್ತ ಸಮಾರಂಭಕ್ಕೆ ಬಂದು ಚಿತ್ರತಂಡವನ್ನು ಶುಭಹಾರೈಸಿ ಹೋಗಿದ್ದರು. ಅವರನ್ನು ಬೀಳ್ಕೊಟ್ಟು ಬಂದು ಮಾತಿಗೆ ಕುಳಿತ ಸತ್ಯಪ್ರಕಾಶ್, ‘ಪ್ರತಿದಿನ ಒಬ್ಬೊಬ್ಬರಿಗೆ ಒಂದೊಂದು ಮ್ಯಾಚ್ ಇದ್ದಂತೆ. ದಿನದ ಅಂತ್ಯದಲ್ಲಿ ಸೋಲೋ, ಗೆಲುವೋ ಎಂಬುದು ನಿರ್ಧಾರವಾಗುತ್ತದೆ. ಅದೇ ತರಹ ಇಲ್ಲೂ ಕೆಲವು ಪಾತ್ರಗಳಿಗೆ ಆ ದಿನ ಬಹಳ ಮುಖ್ಯ. ದಿನದ ಅಂತ್ಯದಲ್ಲಿ ಮನುಷ್ಯ ಗೆಲ್ಲುತ್ತಾನೋ, ಅವನ ತತ್ವ ಗೆಲ್ಲುತ್ತದೋ ಎನ್ನುವುದು ಮುಖ್ಯ’ ಎನ್ನುತ್ತಾರೆ ಸತ್ಯಪ್ರಕಾಶ್.
