ಥಿಯೇಟರ್​ಗಳು ಜೂ. 1ರಿಂದ ಬಂದ್​! ಟಾಲಿವುಡ್​ನಲ್ಲಿ ತಾರಕಕ್ಕೇರಿದ ಪ್ರದರ್ಶಕರು ಮತ್ತು ನಿರ್ಮಾಪಕರ ನಡುವಿನ ವಾರ್​

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ಸಿನಿಮಾ ನಿರ್ಮಾಣದ ಹೊರೆ, ನಿರ್ಮಾಪಕರಿಗೆ ಬರೆಯಾಗಿ ಪರಿಣಮಿಸಿದೆ. ನಿರ್ಮಾಣ ವೆಚ್ಚ, ಕಲಾವಿದರ ಸಂಭಾವನೆ ಹೆಚ್ಚುತ್ತಿದ್ದು, ಟಿಕೆಟ್​ ಮೇಲಿನದ ದುಪ್ಪಟ್ಟು ತೆರಿಗೆ ನಿರ್ಮಾಪಕರನ್ನು ನಷ್ಟದ ಜತೆಗೆ ಸಂಕಷ್ಟಕ್ಕೆ ದೂಡುತ್ತಿದೆ ಎಂದು ಮಲಯಾಳಂ ಸಿನಿಮಾ ನಿರ್ಮಾಪಕರು ಕಳೆದ ಫೆಬ್ರವರಿಯಲ್ಲಿ ಸಭೆ ನಡೆಸಿದ್ದರು. ಆಗಿನಿಂದಲೂ ಪ್ರತಿ ತಿಂಗಳು ಬಿಡುಗಡೆಯಾಗುತ್ತಿರುವ ಚಿತ್ರಗಳು, ಅವುಗಳ ಬಜೆಟ್​ ಹಾಗೂ ಗಳಿಕೆಯನ್ನು ದಾಖಲೆ ಸಮೇತ ರಿಲೀಸ್​, ನಿರ್ಮಾಪಕರು ನಷ್ಟ ಅನುಭವಿಸುತ್ತಿದ್ದಾರೆ ಎಂದು ಮಾಹಿತಿ ನೀಡುತ್ತಿದ್ದಾರೆ.

ಹಾಗೇ ಕೇರಳ ಸಿನಿಮಾ ನಿರ್ಮಾಪಕರು, ಪ್ರದರ್ಶಕರು, ವಿತರಕರು ಹಾಗೂ ಕಾರ್ಮಿಕರ ಒಕ್ಕೂಟ ಸದಸ್ಯರು ಕೇರಳ ಸಿಎಂ ಪಿಣರಾಯಿ ವಿಜಯನ್​ ಬಳಿ ಮನವಿ ಸಲ್ಲಿಸಲು ತೀರ್ಮಾನಿಸಿದ್ದು, ಜೂ. 1ರಿಂದ ಕೇರಳ ಚಿತ್ರರಂಗ ಬಂದ್​ಗೆ ಕರೆನೀಡಿದ್ದರು. ಇದೀಗ ಈ ಬಂದ್​ ಬಿಸಿ ದಣದ ಮತ್ತೆರಡು ರಾಜ್ಯಗಳಿಗೂ ಮುಟ್ಟಿದೆ!

ಆಂಧ್ರ, ತೆಲಂಗಾಣದಲ್ಲೂ ಬಂದ್​

ಕೇರಳದಲ್ಲಿ ಚಿತ್ರರಂಗ ಬಂದ್​ಗೆ ಕರೆ ನೀಡಿರುವ ಬೆನ್ನಲ್ಲೇ ಆಂಧ್ರ ಪ್ರದೇಶ ಮತ್ತು ತೆಲಂಗಾಣ ರಾಜ್ಯಗಳಲ್ಲೂ ಜೂ. 1ರಿಂದ ಪ್ರದರ್ಶಕರು ಥಿಯೇಟರ್​ಗಳನ್ನು ಬಂದ್​ ಮಾಡಲು ಕರೆ ನೀಡಿದ್ದಾರೆ. ತೆಲುಗು ರಾಜ್ಯಗಳಲ್ಲಿ ಥಿಯೇಟರ್​ಗಳನ್ನು ವಾರದ ಬಾಡಿಗೆ ವ್ಯವಸ್ಥೆಯಲ್ಲಿ ಸಿನಿಮಾ ಪ್ರದರ್ಶಿಸಲಾಗುತ್ತದೆ. ಆದರೆ, ಮಲ್ಟಿಪ್ಲೆಕ್ಸ್​ಗಳಲ್ಲಿ ಪ್ರತಿ ಶೋನ ಗಳಿಕೆಯನ್ನು ಹಂಚಿಕೊಳ್ಳಲಾಗುತ್ತದೆ. ಇದೀಗ ಮಲ್ಟಿಪ್ಲೆಕ್ಸ್​ಗಳಂತೆಯೇ ಸಿಂಗಲ್​ ಸ್ಕ್ರೀನ್​ಗಳಲ್ಲೂ ಶೇರಿಂಗ್​ ವ್ಯವಸ್ಥೆ ತರಬೇಕು ಎಂಬುದು ತೆಲುಗು ರಾಜ್ಯಗಳ ಪ್ರದರ್ಶಕರ ಬೇಡಿಕೆಯಾಗಿದೆ. ಈ ಹಿನ್ನೆಲೆಯಲ್ಲಿ ಭಾನುವಾರ 60 ಪ್ರದರ್ಶಕರು, ವಿತರಕರು - ನಿರ್ಮಾಪಕರ ಜತೆ ಸಭೆ ನಡೆಸಿದ್ದು, ಒಮ್ಮತ ಮೂಡಿಬಂದಿಲ್ಲ. ಹೀಗಾಗಿ ತೆಲುಗು ರಾಜ್ಯಗಳಲ್ಲಿ ಜೂ. 1ರಿಂದ 1500ಕ್ಕೂ ಅಧಿಕ ಸಿಂಗಲ್​ ಸ್ಕ್ರೀನ್​ ಥಿಯೇಟರ್​ಗಳನ್ನು ಬಂದ್​ ಮಾಡಲು ಮಾಲೀಕರು ತೀರ್ಮಾನಿಸಿದ್ದಾರೆ.

ಸ್ಟಾರ್​ ಚಿತ್ರಗಳಿಗೆ ಹೊಡೆತ

ಈ ವರ್ಷದ ಮೊದಲ ಐದು ತಿಂಗಳಲ್ಲಿ ತೆಲುಗಿನಲ್ಲಿ ವಿಕ್ಟರಿ ವೆಂಕಟೇಶ್​, ನಾನಿ, ಬಾಲಯ್ಯ ಹೊರತುಪಡಿಸಿ ಸ್ಟಾರ್​ ಚಿತ್ರಗಳು ರಿಲೀಸ್​ ಆಗಿಲ್ಲ. ಇದೇ ಜೂ. 5ರಂದು ಮಣಿರತ್ನಂ ನಿರ್ದೇಶನದ ಕಮಲ್​ ಹಾಸನ್​, ತ್ರಿಷಾ, ಸಿಂಬು ನಟಿಸಿರುವ "ಥಗ್​ಲೈಫ್​' ಪ್ಯಾನ್​ ಇಂಡಿಯಾ ತೆರೆಗೆ ಬರಲಿದೆ. ಬಳಿಕ ಪವನ್​ ಕಲ್ಯಾಣ್​ ನಟಿಸಿರುವ "ಹರಿಹರ ವೀರಮಲ್ಲು' (ಜೂ. 12), ಧನುಷ್​, ನಾಗಾರ್ಜುನ, ರಶ್ಮಿಕಾ ಮಂದಣ್ಣ ಅಭಿನಯದ ಪ್ಯಾನ್​ ಇಂಡಿಯಾ "ಕುಬೇರ' (ಜೂ. 20), ವಿಷ್ಣು ಮಂಚು, ಮೋಹನ್​ ಲಾಲ್​, ಅಕ್ಷಯ್​ ಕುಮಾರ್​, ಪ್ರಭಾಸ್​ ನಟಿಸಿರುವ "ಕಣ್ಣಪ್ಪ' (ಜೂ. 27) ಸೇರಿ ಹಲವು ಚಿತ್ರಗಳ ಮೇಲೆ ಈ ಬಂದ್​ ನೇರ ಪರಿಣಾಮ ಬೀರಲಿದೆ.