‘ಒಳ್ಳೇ ಉದ್ದೇಶ ಇದ್ರೆ, ಬೆಂಕಿಯಲ್ಲಿ ನಿಂತಿದ್ರೂ ಮಳೆ ಬಂದು ಕಾಪಾಡುತ್ತೆ. ಕೆಟ್ಟ ಉದ್ದೇಶ ಇದ್ರೆ, ಮಳೇಲಿ ನಿಂತಿದ್ರೂ ಸಿಡಿಲು ಬಂದು ಹೊಡ್ಕೊಂಡ್ ಹೋಗುತ್ತೆ ...’ ಹೀಗೊಂದಿಷ್ಟು ಖಡಕ್ ಡೈಲಾಗ್ಗಳ ಮೂಲಕ, ತೆರೆಮೇಲೆ ಕಾಣಿಸುವ ದೃಶ್ಯ ಸೊಬಗಿನ ಮೂಲಕ, ಹಿನ್ನೆಲೆಯಲ್ಲಿ ತೇಲಿ ಬರುವ ಸಂಗೀತದ ಮೂಲಕ ಕೊನೆಯವರೆಗೂ ನೋಡಿಸಿಕೊಂಡು ಹೋಗುತ್ತದೆ ‘ಮದಗಜ’. ಗಮನದಲ್ಲಿರಲಿ ಎಂದಿನಂತೆ ಇದೊಂದು ರಿವೆಂಜ್ ಸ್ಟೋರಿ. ಅಮ್ಮನ ಕರುಣೆ, ಅಪ್ಪನ ಹತಾಶೆ, ಮಗನ ಸೇಡು ಇಲ್ಲಿಯೂ ಮುಂದುವರಿದಿದೆ. ಆದರೆ, ಅದನ್ನು ತೋರಿಸಿರುವ ರೀತಿ ಕೊಂಚ ವಿಭಿನ್ನವಾಗಿದೆ. ವಾರಾಣಸಿ ಸುಕ್ಷೇತ್ರದ ಮತ್ತೊಂದು ಮಗ್ಗುಲಿನಲ್ಲಿನ ಹೆಣ ಸುಡುವ ಘಾಟ್ಗಳಲ್ಲಿ ಕ್ರೌರ್ಯದ ಮುಖವನ್ನೇ ಹೊದ್ದು, ಅಲ್ಲಿಯೇ ಆಡಿ ಬೆಳೆದ ಸೂರ್ಯನಿಗೆ ರಕ್ತ ಹರಿಸೋದು ಅಂದ್ರೆ ಹೆಣ ಸುಟ್ಟಷ್ಟೇ ಸುಲಭ. ಅಲ್ಲಿನ ಆ ನಂಟು ಕರ್ನಾಟಕದ ಶಿವಗಢಕ್ಕೂ ಅಂಟಿಕೊಂಡಿರುತ್ತದೆ. ಜಮೀನು ವಿಚಾರಕ್ಕೆ ಶಿವಗಢಕ್ಕೂ ನಾಯಕನ ಎಂಟ್ರಿಯಾಗುತ್ತದೆ. ಆ ಬಳಿಕ ಅಲ್ಲಿ ಕಾಣಿಸುವುದೆಲ್ಲವೂ ಅಬ್ಬರ, ಕ್ರೌರ್ಯ, ರಕ್ತದ ಹೊಳೆ, ತಾಯಿಯ ಮಮತೆ ಮತ್ತು ಮನದರಸಿಯ ತುಂಟತನ.
