ವ್ಯಾವಹಾರಿಕ ಒಪ್ಪಂದ ಸರಿಹೊಂದಲಿಲ್ಲ ಅಷ್ಟೇ: ‘ಲವ್ ಮಾಕ್ಟೇಲ್’ ಸಿನಿಮಾದಿಂದ ನನಗೆ ಸಂಭಾವನೆ ರೂಪದಲ್ಲಿ ಸಿಕ್ಕಿದ್ದು ಕೇವಲ 12 ಲಕ್ಷ ಮಾತ್ರ ಎಂದು ರಘು ದೀಕ್ಷಿತ್ ಹೇಳಿಕೊಂಡಿದ್ದರು. ಈ ವಿಚಾರಕ್ಕೆ ಸಂಬಂಧಿಸಿದಂತೆ ಕೃಷ್ಣ ಪ್ರತಿಕ್ರಿಯೆ ನೀಡಿದ್ದಾರೆ. ‘ಚಿತ್ರಕ್ಕೆ ಸಂಗೀತ ಸಂಯೋಜಿಸುವುದಕ್ಕೆ 10 ಲಕ್ಷ ಸಂಭಾವನೆ ಕೇಳಿದ್ದರು. ಚಿತ್ರ ಗೆದ್ದು ಹೆಚ್ಚು ದುಡ್ಡು ಬಂದರೆ, ಇನ್ನೂ ನಾಲ್ಕು ಲಕ್ಷ ಕೊಡಿ ಎಂದಿದ್ದರು. ಅವರು ಹೇಳಿದ ಮೊತ್ತವನ್ನು ಕೊಡುವುದರ ಜತೆಗೆ, ಆಡಿಯೋ ಹಕ್ಕುಗಳನ್ನು ಉಚಿತವಾಗಿ ನೀಡಿದ್ದೇವೆ. ಹಾಡುಗಳು ರಘು ದೀಕ್ಷಿತ್ ಮ್ಯೂಸಿಕ್ ಚಾನಲ್ನಲ್ಲಿ ಬಿಡುಗಡೆಯಾಗಿ, ಅದರಿಂದಲೇ ಅವರಿಗೆ 30 ಲಕ್ಷ ರೂ.ಗಳವರೆಗೂ ಬಂದಿದೆ. ಅದಾದ ಬಳಿಕ ಸೀಕ್ವೆಲ್ ಶುರುವಾದಾಗ 20 ಲಕ್ಷ ರೂ. ಕೇಳಿದರು. ಈ ಸಂಭಾವನೆ ಕೊಡುವುದಕ್ಕೆ ಯಾವುದೇ ಸಮಸ್ಯೆ ಇರಲಿಲ್ಲ. ಇದರ ಜತೆಗೆ ಅವರು ಉಚಿತವಾಗಿ ಆಡಿಯೋ ಹಕ್ಕುಗಳನ್ನೂ ಕೇಳಿದರು. ಈಗ ಆ ಆಡಿಯೋಕ್ಕೆ 32 ಲಕ್ಷ ರೂ ಮೌಲ್ಯ. ಸಂಭಾವನೆ ಪ್ಲಸ್ ಹಕ್ಕುಗಳ ಮೊತ್ತವನ್ನು ಸೇರಿಸಿದರೆ, 50 ಲಕ್ಷ ಕೊಟ್ಟಂತಾಗುತ್ತದೆ. ಎರಡರಲ್ಲಿ ಒಂದನ್ನು ಬಿಡುವುದಕ್ಕೆ ಕೇಳಿದೆ. ಆದರೆ, ಅವರು ಒಪ್ಪಲಿಲ್ಲ. ಎರಡೂ ಬೇಕೆಂದರು. ವ್ಯಾವಹಾರಿಕವಾಗಿ ಸರಿಹೊಂದದಿದ್ದರಿಂದ ಅವರನ್ನು ಬಿಟ್ಟು, ನಕುಲ್ ಅಭಯಂಕರ್ ಅವರನ್ನು ಆಯ್ಕೆ ಮಾಡಲಾಯಿತು’ ಎನ್ನುತ್ತಾರೆ.
