ಲೈಕ್ಸ್ ಇಲ್ಲ, ಕಾಮೆಂಟ್ಸ್ ಇಲ್ಲ! ಸುನೈನಾ ಇನ್‌ಸ್ಟಾಗ್ರಾಮ್‌ನಿಂದ ಮಾಯವಾದ್ರು ಖಾಲಿದ್... ಅಷ್ಟಕ್ಕೂ ಆಗಿದ್ದೇನು? Actress Sunaina Yella

Actress Sunaina Yella : ತಮಿಳು ನಟಿ ಸುನೈನಾ ಹಾಗೂ ದುಬೈ ಮೂಲದ ಖ್ಯಾತ ಯೂಟ್ಯೂಬರ್ ಖಾಲಿದ್ ಅಲ್ ಅಮೇರಿ ಪರಸ್ಪರ ಬೇರೆಯಾಗಿದ್ದಾರೆ ಎಂಬ ವದಂತಿಗಳು ಹರಿದಾಡುತ್ತಿವೆ.

ಕಳೆದ ಡಿಸೆಂಬರ್‌ನಲ್ಲಿ ಖಾಲಿದ್ ಅವರ ಜನ್ಮದಿನದ ಫೋಟೋಗಳನ್ನು ತಮ್ಮ ಇನ್​ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಳ್ಳುವ ಮೂಲಕ ಇಬ್ಬರೂ ತಮ್ಮ ಪ್ರೀತಿಯನ್ನು ಅಧಿಕೃತವಾಗಿ ಬಹಿರಂಗಪಡಿಸಿದ್ದರು. ಆದರೆ, ಇತ್ತೀಚೆಗೆ ಈ ಜೋಡಿ ಜಾಲತಾಣದಲ್ಲಿ ಪರಸ್ಪರ ಅನ್‌ಫಾಲೋ ಮಾಡಿಕೊಂಡಿರುವುದು ಹಾಗೂ ಒಟ್ಟಿಗಿದ್ದ ಚಿತ್ರಗಳನ್ನು ಡಿಲೀಟ್ ಮಾಡಿರುವುದು ಇವರ ಬ್ರೇಕಪ್ ವದಂತಿಗಳಿಗೆ ಬಲವಾದ ಕಾರಣವಾಗಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಸದಾ ಸಕ್ರಿಯರಾಗಿರುತ್ತಿದ್ದ ಖಾಲಿದ್, ಈ ಹಿಂದೆ ಸುನೈನಾ ಅವರ ಇನ್‌ಸ್ಟಾಗ್ರಾಮ್ ಪೋಸ್ಟ್‌ಗಳಿಗೆ ನಿಯಮಿತವಾಗಿ ಲೈಕ್ ಮತ್ತು ಕಾಮೆಂಟ್ ಮಾಡುತ್ತಿದ್ದರು. ಆದರೆ, ಈಗ ಅವರ ಯಾವುದೇ ಲೈಕ್ ಅಥವಾ ಕಾಮೆಂಟ್‌ಗಳು ಕಾಣಿಸುತ್ತಿಲ್ಲ ಎಂಬುದನ್ನು ಅಭಿಮಾನಿಗಳು ಗಮನಿಸಿದ್ದಾರೆ. ಅಷ್ಟೇ ಅಲ್ಲದೆ, ಕಳೆದ ವರ್ಷ ಇಬ್ಬರೂ ಪರಸ್ಪರ ಉಂಗುರ ಬದಲಾಯಿಸಿಕೊಂಡು ಹಂಚಿಕೊಂಡಿದ್ದ ನಿಶ್ಚಿತಾರ್ಥದ ಫೋಟೋಗಳು ಸೇರಿದಂತೆ ಒಟ್ಟಿಗಿದ್ದ ಎಲ್ಲಾ ಫೋಟೋಗಳನ್ನು ತಮ್ಮ ತಮ್ಮ ಸಾಮಾಜಿಕ ಮಾಧ್ಯಮ ಪುಟಗಳಿಂದ ಈಗ ಸಂಪೂರ್ಣವಾಗಿ ಡಿಲೀಟ್​ ಮಾಡಿದ್ದಾರೆ.

ಈ ಎಲ್ಲಾ ಬೆಳವಣಿಗೆಗಳು ಇವರ ನಡುವಿನ ಮುನಿಸು ಅಥವಾ ಬ್ರೇಕಪ್ ವದಂತಿಗಳಿಗೆ ಮತ್ತಷ್ಟು ಪುಷ್ಟಿ ನೀಡಿದೆಯಾದರೂ, ಈ ಜೋಡಿ ಮಾತ್ರ ಈ ಘಟನೆಯ ಬಗ್ಗೆ ಇದುವರೆಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ.

ಮಲಯಾಳಿ ಪ್ರೇಕ್ಷಕರಿಗೆ ಅತ್ಯಂತ ಪರಿಚಿತರಾಗಿರುವ ಯುಎಇ ಮೂಲದ ಖ್ಯಾತ ಬ್ಲಾಗರ್ ಜೋಡಿ ಖಾಲಿದ್ ಅಲ್ ಅಮೇರಿ ಮತ್ತು ಸಲಮಾ ಮೊಹಮ್ಮದ್ ಫೆಬ್ರವರಿ 2024ರಲ್ಲಿ ಅಧಿಕೃತವಾಗಿ ವಿಚ್ಛೇದನ ಪಡೆದಿದ್ದರು. ಇದರ ನಂತರವಷ್ಟೇ ಖಾಲಿದ್ ಅವರು ನಟಿ ಸುನೈನಾ ಅವರೊಂದಿಗೆ ಪ್ರೀತಿಯಲ್ಲಿ ಬಿದ್ದಿದ್ದರು. ಇತ್ತೀಚೆಗೆ ಸೂಪರ್‌ಸ್ಟಾರ್ ಮಮ್ಮುಟ್ಟಿ ಅವರು ತಮ್ಮ 'ಟರ್ಬೋ' ಚಿತ್ರದ ಪ್ರಚಾರದ ಅಂಗವಾಗಿ ಖಾಲಿದ್ ಅವರ ಯೂಟ್ಯೂಬ್ ಚಾನೆಲ್‌ಗೆ ವಿಶೇಷ ಸಂದರ್ಶನವೊಂದನ್ನು ನೀಡಿದ್ದರು. ಈ ಸಂದರ್ಶನದ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿ ಮಲಯಾಳಿ ಪ್ರೇಕ್ಷಕರ ನಡುವೆ ಭಾರಿ ಜನಪ್ರಿಯತೆ ಗಳಿಸಿದ್ದವು.

ನಟಿ ಸುನೈನಾ ಕೇರಳದಲ್ಲೂ ಸಹ ಅಪಾರ ಸಂಖ್ಯೆಯ ಅಭಿಮಾನಿಗಳನ್ನು ಹೊಂದಿದ್ದು, 'ಮಾಸಿಲಾಮಣಿ', 'ಕಾದಲಿಲ್ ಬಿದ್ದೇನ್', 'ನೀರ್‌ಪರಾವೈ' ಮತ್ತು ಸೂಪರ್‌ಹಿಟ್ ಚಿತ್ರ 'ತೆರಿ' ಸೇರಿದಂತೆ ಹಲವು ಜನಪ್ರಿಯ ಸಿನಿಮಾಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದಾರೆ. ತಮಿಳು ಚಿತ್ರರಂಗದಲ್ಲಿ ಹೆಚ್ಚು ಸಕ್ರಿಯರಾಗಿರುವ ಇವರು, ಇದೀಗ ಖಾಲಿದ್​ ಜತೆಗೆ ಬ್ರೇಕಪ್​ ಮಾಡಿಕೊಳ್ಳುವ ಮೂಲಕ ಸುದ್ದಿಯಲ್ಲಿದ್ದಾರೆ, (ಏಜೆನ್ಸೀಸ್​).