ಈ ಕುರಿತು ಮಾಹಿತಿ ನೀಡಿರುವ ನಿರ್ಮಾಪಕ ವಿಜಯ್ ಕುಮಾರ್ ಕಿರಗಂದೂರು, ‘ಭಾರತದಲ್ಲಿ 9500 ಚಿತ್ರಮಂದಿರಗಳಿದ್ದು, ಈ ಪೈಕಿ ಐದು ಸಾವಿರಕ್ಕೂ ಹೆಚ್ಚು ಪರದೆಗಳಲ್ಲಿ ಚಿತ್ರ ಬಿಡುಗಡೆಯಾಗಲಿದೆ. ಕರ್ನಾಟಕದಲ್ಲೇ 500ಕ್ಕೂ ಹೆಚ್ಚು ಪರದೆಗಳಲ್ಲಿ ಚಿತ್ರ ಬಿಡುಗಡೆಯಾಗುತ್ತಿದೆ. ಅಮೆರಿಕಾದಲ್ಲಿ ಟಿಕೆಟ್ಗಳು ದೊಡ್ಡ ಸಂಖ್ಯೆಯಲ್ಲಿ ಬುಕ್ ಆಗಿದ್ದು, ತೆಲುಗು ಮಾತನಾಡುವ ಜನಸಂಖ್ಯೆ ಜಾಸ್ತಿ ಇರುವುದರಿಂದ, ತೆಲುಗು ಅವತರಣಿಕೆಗೆ ಬೇಡಿಕೆ ಹೆಚ್ಚಿದೆ. ಈಗಾಗಲೇ ತಮಿಳು, ಹಿಂದಿ ಭಾಷೆಗಳಲ್ಲಿ ಬೇರೆ ಚಿತ್ರಗಳಿಂದ ಸ್ಪರ್ಧೆ ಇರುವುದರಿಂದ, ಅಡ್ವಾನ್ಸ್ ಬುಕಿಂಗ್ ಪ್ರಾರಂಭವಾಗಿದೆ. ಕನ್ನಡ ಮತ್ತು ತೆಲುಗಿನಲ್ಲಿ ಇಂದಿನಿಂದ ಪ್ರಾರಂಭವಾಗಲಿದೆ. ತಡರಾತ್ರಿಯ ಪ್ರದರ್ಶನಗಳು ಇರುವುದಿಲ್ಲ. ಕೆಲವು ಕಡೆ ಬೆಳಗಿನ ಜಾವದ ಪ್ರದರ್ಶನಗಳಿರುತ್ತವೆ’ ಎನ್ನುತ್ತಾರೆ. ‘ಕೆಜಿಎಫ್ 2’ ನಂತರ ‘ಕೆಜಿಎಫ್ 3’ ಮಾಡುವ ಯೋಚನೆ ಏನಾದರೂ ಇದೆಯಾ ಎಂದರೆ, ಏ. 14ರ ನಂತರ ನೋಡೋಣ ಎನ್ನುತ್ತಾರೆ ನಿರ್ದೇಶಕ ಪ್ರಶಾಂತ್ ನೀಲ್. ‘‘ಅವೆಂಜರ್ಸ್’ ತರಹವೇ ‘ಕೆಜಿಎಫ್’ ಸರಣಿಗೂ ಬ್ರಾಂಡ್ ವ್ಯಾಲ್ಯೂ ಇದೆ. ಚಿತ್ರವನ್ನು ಮುಂದುವರಿಸುವುದಕ್ಕೆ ಸಾಧ್ಯವೇ ಇಲ್ಲ ಎಂದು ಹೇಳುವುದು ಕಷ್ಟ. ಆದರೆ, ಸದ್ಯಕ್ಕೆ ಚಿತ್ರವನ್ನು ಮುಂದುವರಿಸುವ ಯೋಚನೆ ಇಲ್ಲ. ‘ಕೆಜಿಎಫ್ 2’ ಯಶಸ್ವಿಯಾದರೆ ಮುಂದೆ ನೋಡೋಣ’ ಎನ್ನುತ್ತಾರೆ.
