ತೆಲುಗಿನ ರಕ್ತಚಂದನ ಕಳ್ಳನಿಗೆ ಕನ್ನಡದ ಧೀರ ಲಾಯರ್​ ಸವಾಲು! ಏನಿದು ಹೊಸ ಟ್ವಿಸ್ಟ್​??

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ಅಲ್ಲು ಅರ್ಜುನ್​, ರಶ್ಮಿಕಾ ಮಂದಣ್ಣ ಅಭಿನಯದ ತೆಲುಗಿನ "ಪುಷ್ಪ 2: ದ ರೂಲ್​' ಇದೇ ಡಿ. 5ರಂದು ತೆರೆಗೆ ಬರಲಿದೆ. ಬಾಕ್ಸಾಫಿಸಿನಲ್ಲಿ ದೊಡ್ಡ ಚಿತ್ರದ ಜತೆ ಕ್ಲ್ಯಾಶ್​ ಆಗಬಾರದು ಎಂಬ ಕಾರಣಕ್ಕೆ ಕೆಲ ಚಿತ್ರಗಳು "ಪುಷ್ಪ 2' ಚಿತ್ರಕ್ಕೂ ಮೊದಲೇ ಬಿಡುಗಡೆ ಮಾಡಲು ಪ್ಲ್ಯಾನ್​ ಮಾಡಿಕೊಂಡಿದ್ದರೆ, ಕೆಲವು ನಂತರ ತೆರೆಗೆ ಬರಲು ಸಿದ್ಧತೆ ನಡೆಸುತ್ತಿವೆ. ಆದರೆ, ಕನ್ನಡದ "ಧೀರ ಭಗತ್​ ರಾಯ್​', ಪುಷ್ಪರಾಜ್​ ಜತೆ ನೇರ ಹಣಾಹಣಿ ನಡೆಸಲು ತೋಳೇರಿಸಿಕೊಂಡಿದ್ದಾನೆ. ಚಿತ್ರವನ್ನು ಡಿ. 6ರಂದು ಬಿಡುಗಡೆ ಮಾಡುವುದಾಗಿ ಚಿತ್ರತಂಡ ಘೋಷಿಸಿದೆ.

ಕರ್ಣನ್​ ಚೊಚ್ಚಲ ಬಾರಿಗೆ ಕಥೆ, ಚಿತ್ರಕಥೆ ಬರೆದು ನಿರ್ದೇಶಿಸಿರುವ "ಧೀರ ಭಗತ್​ ರಾಯ್​' ಕಥೆ 1970ರ ದಶಕದ ಭೂ ಸುಧಾರಣಾ ಕಾಯ್ದೆಯ ಸುತ್ತ ಸಾಗುತ್ತದೆ. ರಂಗಭೂಮಿ ಪ್ರತಿಭೆ ರಾಕೇಶ್​ ದಳವಾಯಿ ನಾಯಕನಾಗಿದ್ದು, ಅವರಿಗೆ ಸುಚರಿತಾ ಜೋಡಿಯಾಗಿದ್ದಾರೆ. ನಿರ್ದೇಶಕ ಕರ್ಣನ್​, ""ಪುಷ್ಪ 2' ರಿಲೀಸ್​ ಸಮಯದಲ್ಲಿ ನಮ್ಮ ಚಿತ್ರವೂ ಬಿಡುಗಡೆಯಾಗುತ್ತಿದೆ. ಥಿಯೇಟರ್​ ಸಮಸ್ಯೆ ಆಗುವುದಿಲ್ಲ ಎಂಬ ಭರವಸೆಯಿದೆ. ಕನ್ನಡಿಗರು ಕನ್ನಡ ಸಿನಿಮಾಗಳ ಕೈ ಹಿಡಿಯುತ್ತಾರೆಂಬ ನಂಬಿಕೆಯೂ ಇದೆ. "ಬಾಹುಬಲಿ' ಮುಂದೆ ನಮ್ಮ "ರಂಗಿತರಂಗ' ಗೆದ್ದಿತ್ತು. ಅದೇ ರೀತಿಯ ಇತಿಹಾಸ ಇದೀಗ ಮರುಕಳಿಸಲಿದೆ' ಎಂದು ಭರವಸೆ ವ್ಯಕ್ತಪಡಿಸಿದರು.

ನಾಯಕ ರಾಕೇಶ್​, "ಅಲ್ಲು ಅರ್ಜುನ್​ ನನ್ನ ೇವರಿಟ್​ ನಟ. ಆದರೂ "ಪುಷ್ಪ 2' ರಿಲೀಸ್​ ಆದ ಮರುದಿನ ನಮ್ಮ ಚಿತ್ರವನ್ನೂ ಬಿಡುಗಡೆ ಮಾಡುತ್ತಿದ್ದೇವೆ' ಎಂದರು. "ಕರ್ನಾಟಕದಲ್ಲಿ "ಪುಷ್ಪ 2' ಚಿತ್ರದಿಂದ ಕನ್ನಡದ "ಧೀರ ಭಗತ್​ ರಾಯ್​'ಗೆ ಸಮಸ್ಯೆ ಎದುರಾದರೆ ಹೋರಾಟಕ್ಕಿಳಿಯುತ್ತೇವೆ' ಎಂದು ಕನ್ನಡ ಪರ ಹೋರಾಟಗಾರ ಭಾಸ್ಕರ್​ ಪ್ರಸಾದ್​ ಎಚ್ಚರಿಕೆ ನೀಡಿದರು. ರಾಕೇಶ್​, ಸುಚರಿತಾ ಜತೆ ಶರತ್​ ಲೋಹಿತಾಶ್ವ, ನೀನಾಸಂ ಅಶ್ವತ್ಥ್​, ಪ್ರವಿಣಗ್​ ಗೌಡ, ಹರಿರಾಮ್​, ಸಂದೇಶ್​. ಸುಧೀರ್​ ತಾರಾಗಣದಲ್ಲಿದ್ದಾರೆ. ಪೂರ್ಣಚಂದ್ರ ತೇಜಸ್ವಿ ಸಂಗೀತ, ಸೆಲ್ವಂ ಜಾನ್​, ವಿಶ್ವ ಸಂಕಲನದಲ್ಲಿ "ಧೀರ್​ ಭಗತ್​ ರಾಯ್​' ಮೂಡಿಬಂದಿದೆ.