Kamal Sridevi Review; ಕತ್ತಲೆ ಜಗತ್ತಿನ, ಬೆತ್ತಲೆ ಪ್ರಪಂಚದ ಅನಾವರಣ

ಹರ್ಷವರ್ಧನ್​ ಬ್ಯಾಡನೂರು

ಚಿತ್ರ: ಕಮಲ್​ ಶ್ರೀದೇವಿ

ನಿರ್ದೇಶನ: ವಿ.ಎ. ಸುನಿಲ್​ ಕುಮಾರ್​

ತಾರಾಗಣ: ಸಚಿನ್​ ಚಲುವರಾಯಸ್ವಾಮಿ, ಸಂಗೀತಾ ಭಟ್​, ರಮೇಶ್​ ಇಂದಿರ, ಕಿಶೋರ್​, ರಾು ಶಿವಮೊಗ್ಗ, ಅತಾ ಬೋಪಯ್ಯ ಮತ್ತಿತರರು

ಅದು ಕೆ.ಆರ್​. ಮಾರ್ಕೆಟ್​ನಲ್ಲಿರುವ ಎಂಎಂ ಅರ್ಥಾತ್​ ಮೈಸೂರು ಮಲ್ಲಿಗೆ ಲಾಡ್ಜ್​. ಅದು ಅಡ್ಡದಾರಿ ಹಿಡಿದವರ ಸ್ವರ್ಗ. ವೇಶ್ಯಾವಾಟಿಕೆ, ಇಸ್ಪೀಟು, ಜೂಜಾಡಲು ಬರುವವರೇ ಹೆಚ್ಚು. ಮಧ್ಯವರ್ತಿ ಮಾಮು ಅಲಿಯಾಸ್​ ಮಾರೇನಳ್ಳಿ ಮುನಿಸ್ವಾಮಿ (ರಮೇಶ್​) ದಂಧೆ ನಡೆಸಲು ದೇವಿಕಾಳನ್ನು (ಸಂಗೀತಾ) ಕರೆತರುತ್ತಾನೆ. ಸಂಗೀತಾಗೆ 70 ಸಾವಿರ ರೂಪಾಯಿ ಬೇಕಿರುತ್ತದೆ. ಮೊದಲ ಸಿನಿಮಾನೇ ಸೋತು ಆತ್ಮಹತ್ಯೆ ದಾರಿ ಹಿಡಿದಿರುವ ನಿರ್ದೇಶಕ ಕಮಲ್​ (ಸಚಿನ್​), ಮಂತ್ರವಾದಿ, ಕಾದಂಬರಿಗಾರ್ತಿ ನಿಶಾ (ಅಕ್ಷಿತಾ), 19 ವರ್ಷದ ವಿದ್ಯಾರ್ಥಿ, ಸೆಕ್ಯುರಿಟಿ ಕೆಲಸ ಮಾಡುವ 80 ವರ್ಷದ ಮುದುಕ ಮತ್ತು ಇಬ್ಬರು ರೌಡಿಶೀಟರ್​ಗಳು ಹೀಗೆ ಏಳು ಜನ ಆಕೆಯನ್ನು ಆ ಲಾಡ್ಜ್​ನಲ್ಲಿ ಭೇಟಿಯಾಗುತ್ತಾರೆ. ಅವರು ಬಂದು ಹೋಗುವ ಹೊತ್ತಿಗೆ ದೇವಿಕಾ ಹೆಣವಾಗಿರುತ್ತಾಳೆ. ಹಾಗಾದರೆ ಅದು ಕೊಲೆಯೋ? ಆತ್ಮಹತ್ಯೆಯೋ? ಈ ದೇವಿಕಾ ಯಾರು? ಆಕೆಗೆ ಹಣದ ಅವಶ್ಯಕತೆ ಯಾಕಿರುತ್ತೆ? ವೇಶ್ಯಾವಾಟಿಕೆಯನ್ನೇಕೆ ಆಯ್ಕೆ ಮಾಡಿಕೊಂಡಿರುತ್ತಾಳೆ? ಕೊಲೆಗಾರ ಯಾರು? ಇಂತಹ ಇನ್ನೂ ಅನೇಕ ಪ್ರಶ್ನೆಗಳಿಗೆ ಸಿನಿಮಾದಲ್ಲಿ ಉತ್ತರವಿದೆ.

"ಗಜರಾಮ'ದಲ್ಲಿ ಆ್ಯಕ್ಷನ್​ ಕಥೆ ಹೇಳಿದ್ದ ನಿರ್ದೇಶಕ ಸುನಿಲ್​ ಕುಮಾರ್​, "ಕಮಲ್​ ಶ್ರೀದೇವಿ' ಮೂಲಕ ಒಂದೊಳ್ಳೆ ಥ್ರಿಲ್ಲರ್​ ನಿರೂಪಿಸಿದ್ದಾರೆ. ಕೇವಲ 122 ನಿಮಿಷಗಳ ಸಿನಿಮಾ ಎಲ್ಲೂ ಬೋರ್​ ಆಗದಂತೆ ನೋಡಿಸಿಕೊಂಡು ಹೋಗುತ್ತದೆ. ಕ್ಲೆಮ್ಯಾಕ್ಸ್​ವರೆಗೂ ಕೊಲೆಗಾರ ಯಾರು ಎಂಬು ಪ್ರಶ್ನೆಗೆ ಉತ್ತರ ನೀಡದೇ, ಪ್ರೇಕ್ಷಕರಲ್ಲಿ ಒಂದು ಕುತೂಹಲ ಸೃಷ್ಟಿಸಿರುವುದು ಚಿತ್ರಕ್ಕೆ ಪ್ಲಸ್​ ಆಗಿದೆ. ಅದಕ್ಕೆ ತಕ್ಕಂತೆ ಪಿಂಪ್​ ಮಾಮು ಪಾತ್ರದಲ್ಲಿ ರಮೇಶ್​ ಇಂದಿರ ಮತ್ತು ದೇವಿಕಾ ಆಗಿ ಸಂಗೀತಾ ಭಟ್​ ಚಿತ್ರದ ಹೈಲೈಟ್​. ಅವರು ತಮ್ಮ ಪಾರ್ಮೆನ್ಸ್​ ಮೂಲಕವೇ ಚಿತ್ರವನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದಿದ್ದಾರೆ. ಚಿತ್ರದ ಕಥಾವಸ್ತು ರಾ ಆಗಿರುವ ಕಾರಣ ಪೋಲಿ ಸಂಭಾಷಣೆ ಮತ್ತು ಬೋಲ್ಡ್​ ಸನ್ನಿವೇಶಗಳಿವೆ. "ದಂಧೆ ಕೆಟ್ಟದಾಗಿರಬಹುದು, ಆದರೆ ಮನಸ್ಸು ಶುದ್ಧವಾಗಿದೆ', "ಸುಖ ಪಡೋಕೆ ಅಂತ ಬಂದ ಡೈರೆಕ್ಟರ್​, ಕಷ್ಟ ಹೇಳ್ಕೋತಿದಾನೆ'... ಹೀಗೆ ಹಲವು ಒನ್​ಲೈನರ್​ಗಳಿವೆ. ಎಂದಿನಂತೆ ಖಾಕಿಯಲ್ಲಿ ಕಿಶೋರ್​ ಗಮನ ಸೆಳೆಯುತ್ತಾರೆ. ಉಳಿದಂತೆ ಸಚಿನ್​, ಅತಾ, ಮಿತ್ರ, ರಾಘು ಶಿವಮೊಗ್ಗ ಸೇರಿ ಇತರರು ಅಚ್ಚುಕಟ್ಟಾಗಿ ಪಾತ್ರಗಳನ್ನು ನಿಭಾಯಿಸಿದ್ದಾರೆ. ಕೀರ್ತನ್​ ಹಿನ್ನೆಲೆ ಸಂಗೀತ ಮತ್ತು ನಾಗೇಶ್​ ಛಾಯಾಗ್ರಹಣ ಚಿತ್ರಕ್ಕೆ ಪೂರಕವಾಗಿವೆ. ಒಂದೊಳ್ಳೆ ಥ್ರಿಲ್ಲರ್​ ಡ್ರಾಮಾ ನೋಡಲಿಚ್ಛಿಸುವವರಿಗೆ "ಕಮಲ್​ ಶ್ರೀದೇವಿ' ಈ ವಾರದ ಉತ್ತಮ ಆಯ್ಕೆ ಎನ್ನಬಹುದು.