ವಿಜಯ್ ಬರ್ತ್‌ಡೇ ದಿನವೇ ಅನೌನ್ಸ್ ಆಗುತ್ತಾ ಜನನಾಯಗನ್ ರಿಲೀಸ್ ಡೇಟ್...? ಅಭಿಮಾನಿಗಳಲ್ಲಿ ಹೆಚ್ಚಾಯ್ತು ಕುತೂಹಲ! Thalapathy Vijay

ಎಚ್ ವಿನೋತ್ ನಿರ್ದೇಶನದ ಈ ಚಿತ್ರವು ಜನವರಿ 9 ರಂದೇ ಬಿಡುಗಡೆಗೆ ನಿಗದಿಯಾಗಿತ್ತು. ಆದರೆ, ಚಿತ್ರದಲ್ಲಿದ್ದ ಕೆಲವು ರಾಜಕೀಯ ಸಂಭಾಷಣೆಗಳು ಮತ್ತು ಸೂಕ್ಷ್ಮ ಸನ್ನಿವೇಶಗಳ ಕಾರಣದಿಂದಾಗಿ ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ (CBFC) ಚಿತ್ರಕ್ಕೆ ಪ್ರಮಾಣಪತ್ರ ನೀಡಲು ನಿರಾಕರಿಸಿತ್ತು. 

ಆನ್‌ಲೈನ್​ನಲ್ಲಿ ಚಿತ್ರದ ಸೋರಿಕೆಯ ಆಘಾತದ ಹೊರತಾಗಿತೂ ಜನ ನಾಯಗನ್ ಪರದೆಯ ಮೇಲೆ ತಮ್ಮ ನೆಚ್ಚಿನ ನಾಯಕನನ್ನು ಕಣ್ತುಂಬಿಕೊಳ್ಳುವ ಅಭಿಮಾನಿಗಳ ಕ್ರೇಜ್​ ಕಿಂಚಿತ್ತೂ ಕಮ್ಮಿಯಾಗಿಲ್ಲ. ಆದಾಗ್ಯೂ, ಜನ ನಾಯಕನ್​ ಚಿತ್ರದ ಅಧಿಕೃತ ಮತ್ತು ಹೊಸ ಬಿಡುಗಡೆ ದಿನಾಂಕದ ನವೀಕರಣಕ್ಕಾಗಿ ಅಭಿಮಾನಿಗಳು ಈಗಲೂ ಚಾತಕ ಪಕ್ಷಿಯಂತೆ ಕಾಯುತ್ತಿದ್ದಾರೆ.

ವಿಶೇಷವೆಂದರೆ, ಇಂದು ಜೂನ್ 22 ತಮಿಳುನಾಡು ಮುಖ್ಯಮಂತ್ರಿ ದಳಪತಿ ವಿಜಯ್ ಅವರ ಜನ್ಮದಿನ. ಈ ವಿಶೇಷ ದಿನದಂದೇ ಚಿತ್ರತಂಡವು ಸೆನ್ಸಾರ್ ಸಮಸ್ಯೆಗಳನ್ನೆಲ್ಲಾ ಬಗೆಹರಿಸಿ, ಚಿತ್ರದ ಹೊಸ ಅಫಿಷಿಯಲ್ ರಿಲೀಸ್ ಡೇಟ್ ಘೋಷಿಸಬಹುದು ಎಂದು ಅಭಿಮಾನಿಗಳು ಬಲವಾಗಿ ನಂಬಿದ್ದಾರೆ. 

ಈ ಕುರಿತು ಎಕ್ಸ್ (X) ಸೇರಿದಂತೆ ವಿವಿಧ ಸೋಷಿಯಲ್ ಮೀಡಿಯಾ ಪ್ಲಾಟ್‌ಫಾರ್ಮ್‌ಗಳಲ್ಲಿ ಅಭಿಮಾನಿಗಳು ಪೋಸ್ಟರ್​ಗಳನ್ನು ಹಂಚಿಕೊಂಡಿದ್ದು, ಭಾರೀ ವೈರಲ್​ ಆಗಿವೆ. ಬಳಕೆದಾರರೊಬ್ಬರು "ಕೆವಿಎನ್ ಪ್ರೊಡಕ್ಷನ್ಸ್ ನಾಳೆ 'ಜನ ನಾಯಗನ್' ಬಿಡುಗಡೆ ದಿನಾಂಕ ಘೋಷಣೆಯೊಂದಿಗೆ ನಮ್ಮನ್ನು ಅಚ್ಚರಿಗೊಳಿಸಿದರೆ ಏನಾಗುತ್ತದೆ? ಹಾಗೊಂದು ವೇಳೆ ಸಂಭವಿಸಿದರೆ, ಮೇ 10 ರ ನಂತರ ದಳಪತಿ ವಿಜಯ್ ಅಭಿಮಾನಿಗಳಿಗೆ ಇದು ಅತ್ಯುತ್ತಮ ದಿನವಾಗಿರುತ್ತದೆ ಎಂದು ತಮ್ಮ ಉತ್ಸಾಹವನ್ನು ಹಂಚಿಕೊಂಡಿದ್ದಾರೆ.

ಮತ್ತೊಬ್ಬ ಅಭಿಮಾನಿ ಜೂನ್ 21 ರ ಶಾಂತ ಸಂಜೆ... ಯಾವುದೇ ಪ್ರಚಾರವಿಲ್ಲ, ಪೋಸ್ಟರ್‌ಗಳಿಲ್ಲ, ಘೋಷಣೆಗಳಿಲ್ಲ, ಮೊದಲ ನೋಟ ಅಥವಾ ಮೊದಲ ಸಿಂಗಲ್ ಇಲ್ಲ. ಹಲವು ವರ್ಷಗಳ ನಂತರ ಇಂತಹ ಸನ್ನಿವೇಶ ಎದುರಾಗಿದೆ. ಇದನ್ನು ನೋಡುತ್ತಿದ್ದರೆ ಸಿನಿಮಾರಂಗದಲ್ಲಿ ಒಂದು ಸುದೀರ್ಘ ಯುಗದ ಅಂತ್ಯದಂತೆ ಭಾಸವಾಗುತ್ತಿದೆ ಎಂದು ಬರೆದುಕೊಂಡಿದ್ದಾರೆ.

ಏತನ್ಮಧ್ಯೆ, ಜನ ನಾಯಗನ್ ಚಿತ್ರದ ಭಾಗವಾಗಿರುವ ನಟಿ ಮಮಿತಾ ಬೈಜು ಅವರು ತಮ್ಮ ಮತ್ತು ದಳಪತಿ ವಿಜಯ್ ಅವರ ಚಿತ್ರ ಸೋರಿಕೆಯ ಬಗ್ಗೆ ನಿರಾಶೆ ವ್ಯಕ್ತಪಡಿಸಿದ್ದರು. ಈ ಕುರಿತು ತಮ್ಮ ಇನ್​ಸ್ಟಾಗ್ರಾಮ್​ನಲ್ಲಿ ಪ್ರಿಯ ಪ್ರೇಕ್ಷಕರೇ ಪ್ರತಿದಿನ ತಮ್ಮ ಅತ್ಯುತ್ತಮವಾದದ್ದನ್ನು ನೀಡುವ ಅನೇಕ ಜನರ ಕಠಿಣ ಪರಿಶ್ರಮ, ಉತ್ಸಾಹ ಮತ್ತು ಬದ್ಧತೆಯ ಮೂಲಕ ಒಂದು ಚಿತ್ರವು ಜೀವಂತವಾಗುತ್ತದೆ. ಆದಾಗ್ಯೂ, ಚಿತ್ರವು ಅಧಿಕೃತವಾಗಿ ಬಿಡುಗಡೆಯಾದಾಗ ಸರಿಯಾದ ರೀತಿಯಲ್ಲಿ ಕಾಯೋಣ ಮತ್ತು ಆನಂದಿಸೋಣ ಎಂದು ನಟಿ ಬರೆದು ಪೋಸ್ಟ್​ ಹಂಚಿಕೊಂಡಿದ್ದರು (ಏಜೆನ್ಸೀಸ್​).