ಈ ಬಾರಿ ಕಣದಲ್ಲಿ ಹಿಂದಿಯಿಂದ 'ಚಪಾಕ್', 'ಶಕುಂತಲಾ ದೇವಿ', 'ಚಲಾಂಗ್', 'ಗುಲಾಬೋ ಸಿತಾಬೋ', 'ದಿ ಸ್ಕೈ ಈಸ್ ಪಿಂಕ್', 'ಬುಲ್ಬುಲ್' ಮುಂತಾದ ಚಿತ್ರಗಳು ಸ್ಪರ್ಧೆಯಲ್ಲಿದ್ದವು. ಅವೆಲ್ಲವನ್ನು ಹಿಂದಿಕ್ಕಿ, 'ಜಲ್ಲಿಕಟ್ಟು' ಆಯ್ಕೆಯಾಗಿತ್ತು. ನಟಿ ಕಂಗನಾ ರಣಾವತ್ ಸಹ ಈ ಚಿತ್ರವನ್ನು ಪ್ರೋತ್ಸಾಹಿಸುವ ಭರದಲ್ಲಿ ಬಾಲಿವುಡ್ ಚಿತ್ರಗಳು ಮತ್ತು ಅಲ್ಲಿನ ಜನರ ಕಾಲೆಳೆದಿದ್ದರು. ಈ ಕುರಿತು ಟ್ವೀಟ್ ಮಾಡಿದ್ದ ಅವರು, 'ಬುಲ್ಲಿವುಡ್ನ ಗ್ಯಾಂಗ್ಗಳಿಗೆ ಜನ ಮಂಗಳಾರತಿ ಎತ್ತಿದ್ದು ಕೊನೆಗೂ ಒಂದಿಷ್ಟು ಫಲ ಕೊಡುತ್ತಿದೆ. ಭಾರತೀಯ ಸಿನಿಮಾಗಳೆಂದರೆ ಕೇವಲ ನಾಲ್ಕು ಕುಟುಂಬಗಳಿಗೆ ಸಂಬಂಧಿಸಿದ್ದಲ್ಲ. ಮೂವಿ ಮಾಫಿಯಾದವರು ಮನೆಯಲ್ಲಿ ಅಡಗಿ ಕುಳಿತು, ಆಯ್ಕೆ ಸಮಿತಿಯ ಸದಸ್ಯರಿಗೆ ಕೆಲಸ ಮಾಡುವುದಕ್ಕೆ ಬಿಟ್ಟಿರುವುದು ಬಹಳ ಸಂತೋಷದ ವಿಷಯ. 'ಜಲ್ಲಿಕಟ್ಟು' ತಂಡದವರಿಗೆ ಶುಭಾಶಯಗಳು' ಎಂದು ಅವರು ಬರೆದುಕೊಂಡಿದ್ದರು.
