ಬೆಂಗಳೂರು: ‘ನನಗೆ ನೀವು, ನಿಮಗೆ ನಾನು. ಇನ್ನು ಮುಂದೆ ಉದ್ಯಮದ ಯಾರ ಹುಟ್ಟುಹಬ್ಬ, ಸಿನಿಮಾ, ಸ್ನೇಹ, ಕಾರ್ಯಕ್ರಮ, ಭೇಟಿ, ಹರಟೆ ನನ್ನಿಂದ ಇರುವುದಿಲ್ಲ. ಮುಂದೆ ಸಿನಿಮಾ, ಜೀ ವಾಹಿನಿ ಕಾರ್ಯಕ್ರಮಕ್ಕೆ ಮೀಸಲು ಈ ಬದುಕು. ಕಾರಣ ತುಂಬ ತಾಮಸವಾಗಿದೆ ನಮ್ಮ ರಂಗ. ದೊಡ್ಡವರು ಬದುಕಿರುವಾಗಲೇ ಅಪಮಾನಿಸಿ, ದೊಡ್ಡವರಾಗುವ ಹುನ್ನಾರ ಪುರುಷರ ಸಾಮ್ರಾಜ್ಯ ಆಗಿದೆ ರಂಗ ...’- ಹಾಗೆಂದು ಟ್ವೀಟ್ ಮೂಲಕ ತಮ್ಮ ಬೇಸರವನ್ನು ಹೊರಹಾಕಿದ್ದಾರೆ ಹಿರಿಯ ನಟ ಜಗ್ಗೇಶ್. ಕಾರಣ, ದರ್ಶನ್ ಅಭಿಮಾನಿಗಳು ಇತ್ತೀಚೆಗೆ ಅವರಿಗೆ ಘೇರಾವ್ ಮಾಡುವುದರ ಜತೆಗೆ ಕ್ಷಮೆ ಕೇಳುವಂತೆ ಪಟ್ಟು ಹಿಡಿದಿದ್ದರು. ಇದರಿಂದ ನೊಂದಿರುವ ಜಗ್ಗೇಶ್, ಈ ವಿಷಯವಾಗಿ ಮಂಗಳವಾರ ಬೆಳಗ್ಗೆ ವಿಡಿಯೋ ಬಿಡುಗಡೆ ಮಾಡಿದ್ದಾರೆ. ‘ನನ್ನನ್ನು ಯಾರೂ ಘೇರಾವ್ ಮಾಡಿಲ್ಲ. ಯಾರೂ ನನ್ನ ಮೈ ಮುಟ್ಟುವುದಕ್ಕೆ ಸಾಧ್ಯವಿಲ್ಲ. ನಾನು ಒಬ್ಬ ದೀಕ್ಷೆ ಆಗಿರುವ ವ್ಯಕ್ತಿ. ನಾನಾಯಿತು, ನನ್ನ ಕುಟುಂಬವಾಯಿತು, ಕೆಲಸವಾಯಿತು ಅಂತಿರುವ ಮನುಷ್ಯ. ಅವಕಾಶ ಇದ್ದರೆ ಬಂದು ನಟನೆ ಮಾಡಿ ಹೋಗುತ್ತೀನಿ. ನನ್ನನ್ನು ಪ್ರೀತಿಸುವ ಕೋಟ್ಯಂತರ ಆತ್ಮಗಳಿವೆ. ನನ್ನ ಪಾಡಿಗೆ ನನ್ನನ್ನು ಕನ್ನಡದ ಕೆಲಸ ಮಾಡುವುದಕ್ಕೆ ಬಿಡಿ’ ಎಂದು ಅವರು ಹೇಳಿದ್ದಾರೆ.
