ವಿಶ್ವ ಪರಿಸರ ದಿನಾಚರಣೆ ಅಂದ ತಕ್ಷಣ ಬರೀ ಗಿಡಮರಗಳನ್ನಷ್ಟೆ ನೆಡುವುದಲ್ಲ. ನಮ್ಮ ನಿತ್ಯ ಜೀವನದಲ್ಲೂ ಹಲವು ರೀತಿಯಲ್ಲಿ ಪರಿಸರಕ್ಕೆ ಅಳಿಲು ಸೇವೆ ಮಾಡುವ ಅವಕಾಶ ನಮ್ಮೆಲ್ಲರಿಗೂ ಸಿಗುತ್ತದೆ. ಪ್ಲಾಸ್ಟಿಕ್ ನೀರಿನ ಬಾಟಲ್ ಖರೀದಿಸುವ ಬದಲು, ಜತೆಯಲ್ಲಿಯೆ ಒಂದು ಸ್ಟೀಲ್ ಬಾಟಲ್ ಇಟ್ಟುಕೊಳ್ಳಿ. ಓಡಾಟಕ್ಕೆ ದ್ವಿಚಕ್ರ ವಾಹನ ಬಳಸುವ ಬದಲು ಸಾರ್ವಜನಿಕ ಸಾರಿಗೆ ಉಪಯೊಗಿಸುವುದು ತುಂಬ ಒಳ್ಳೆಯದು. ನಾನೇ ಎಷ್ಟೊ ಸಲ ನಮ್ಮ ಮನೆ ಬಳಿಯ ಮೆಟ್ರೊದಿಂದ ಮುಖಕ್ಕೆ ಸ್ಕಾರ್ಫ್ ಕಟ್ಟಿಕೊಂಡು ಮಾಲ್ಗೆ ಹೋಗಿದ್ದೇನೆ. ವಾರಾಂತ್ಯದಲ್ಲಿ ವಾಹನ ಬದಿಗಿಟ್ಟು, ಸೈಕಲ್ ಸವಾರಿ ಹೋಗುವುದನ್ನು ರೂಢಿಸಿಕೊಂಡರೆ ದೇಹಕ್ಕೂ ಒಳ್ಳೆಯದು, ಜೇಬಿಗೂ ಉಳಿತಾಯ. ಇದೆಲ್ಲ ಒಂದೆಡೆಯಾದರೆ ಐಟಿ-ಬಿಟಿ ಕಂಪನಿಗಳು ಮುಂದಾಳತ್ವ ವಹಿಸಿಕೊಂಡು, ವಾರದ ಎರಡು ದಿನ ಕೆರೆ ಹೂಳೆತ್ತುವುದು, ಕೆರೆ ಅಭಿವೃದ್ಧಿ ಕೆಲಸಗಳಲ್ಲಿ ಭಾಗವಹಿಸುವುದರಿಂದಲೂ ಪರಿಸರಕ್ಕೆ ಸೇವೆ ಸಲ್ಲಿದಂತಾಗುತ್ತದೆ. ಹೀಗೆ ಇನ್ನೂ ಸಾಕಷ್ಟು ಅವಕಾಶಗಳು ನಮ್ಮ ಕಣ್ಣ ಮುಂದಿವೆ. ಅವೆಲ್ಲವನ್ನು ಸರಿಯಾದ ರೀತಿಯಲ್ಲಿ ಬಳಸಿಕೊಂಡಿದ್ದೆ ಆದಲ್ಲಿ, ನಮ್ಮ ಕೈಯಿಂದ ಪರಿಸರಕ್ಕೆ ಸಣ್ಣ ಕೊಡುಗೆ ಕೊಟ್ಟಂತಾಗುತ್ತದೆ.| ಸೋನು ಗೌಡ
