'ಗಂಧದ ಗುಡಿ'ಯಲ್ಲಿ ಮಿಂದೆದ್ದ ಅಭಿಮಾನಿಗಳು; ಇಂದು ಎಲ್ಲಾ ಪ್ರದರ್ಶನಗಳು ಫುಲ್​

ಬೆಂಗಳೂರು: ಪುನೀತ್​ ರಾಜಕುಮಾರ್ ಅಭಿನಯದ ಕೊನೆಯ ಚಿತ್ರವಾದ 'ಗಂಧದ ಗುಡಿ' ಇಂದು ರಾಜ್ಯಾದ್ಯಂತ ಬಿಡುಗಡೆಯಾಗಿದ್ದು, ಪ್ರೇಕ್ಷಕರಿಂದ ಅದ್ಭುತ ಸ್ಪಂದನೆ ಸಿಕ್ಕಿದೆ.

ಇದನ್ನೂ ಓದಿ: ರಾಜ್ಯಾದ್ಯಂತ ‘ಗಂಧದಗುಡಿ’ ಅದ್ಧೂರಿ ಬಿಡುಗಡೆ: ಬೆಳ್ಳಿಪರದೆಯಲ್ಲಿ ಅಪ್ಪು ನೋಡಿ ಭಾವುಕರಾದ ಅಭಿಮಾನಿಗಳು

'ಗಂಧದ ಗುಡಿ' ಚಿತ್ರವು ಇಂದು ರಾಜ್ಯಾದ್ಯಂತ 223ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ದೊಡ್ಡ ಬಿಡುಗಡೆ ಕಂಡಿದ್ದು, ಇಂದು ಬೆಳಿಗ್ಗೆಯಿಂದಲೇ ಚಿತ್ರವು ಹೌಸ್​ಫುಲ್​ ಆಗಿವೆ. ಬೆಂಗಳೂರಿನಲ್ಲೇ ನಿನ್ನೆಯಿಂದ ಹಲವು ಪ್ರೀಮಿಯರ್ ಶೋಗಳು ನಡೆದಿವೆ. ನಿನ್ನೆ ಒರಾಯನ್​ ಮಾಲ್​ನಲ್ಲಿ ನಡೆದ ಪ್ರೀಮಿಯರ್​ ಶೋನಲ್ಲಿ ಸುಧಾ ಮೂರ್ತಿ, ರಮ್ಯಾ, ರಕ್ಷಿತ್​ ಶೆಟ್ಟಿ, ದೇವರಾಜ್​, ರಿಷಭ್​ ಶೆಟ್ಟಿ, ಗುರುಕಿರಣ್, ಅಜೇಯ್​ ರಾವ್​​ ಸೇರಿದಂತೆ ಹಲವರು ಚಿತ್ರವನ್ನು ನೋಡಿ ಮೆಚ್ಚಿಕೊಂಡಿದ್ದಾರೆ.

ಇಂದು ಬೆಂಗಳೂರಿನ ನವರಂಗ್​ ಚಿತ್ರಮಂದಿರದಲ್ಲಿ ಬೆಳಗ್ಗೆ 7 ಗಂಟೆಯಿಂದಲೇ 'ಗಂಧದ ಗುಡಿ' ಪ್ರದರ್ಶನ ಪ್ರಾರಂಭವಾಗಿದೆ. ಪುನೀತ್​ ಅಭಿಮಾನಿಗಳಿಂದ ಪ್ರೇಕ್ಷಕರಿಗೆ ಬೆಳಗಿನ ಉಪಹಾರದ ವ್ಯವಸ್ಥೆ ಸಹ ಮಾಡಲಾಗಿತ್ತು.

'777 ಚಾರ್ಲಿ' ಖ್ಯಾತಿಯ ನಟಿ ಸಂಗೀತಾ ಶೃಂಗೇರಿ ಇಂದು ನರ್ತಕಿ ಚಿತ್ರಮಂದಿರದಲ್ಲಿ ಮೂರು ಬಾರಿ ಚಿತ್ರ ವೀಕ್ಷಿಸಿದ್ದಾರೆ. ಪುನೀತ್​ ಅಭಿಮಾನಿಗಳ ಜತೆಗೆ ಸಿನಿಮಾ ವೀಕ್ಷಿಸಿ ಮಾತನಾಡಿದ ಅವರು, ''ಲಕ್ಕಿ ಮ್ಯಾನ್' ಸಿನಿಮಾದಲ್ಲಿ ಅವರನ್ನ ಮೀಟ್ ಮಾಡೋಕ್ಕೆ ಆಗಲಿಲ್ಲ. ಈ ಬಗ್ಗೆ ನನಗೆ ಬಹಳ ಬೇಸರವಿತ್ತು. ಮುಂದೊಂದು ಅವರನ್ನು ಭೇಟಿ ಮಾಡಬೇಕೆಂದುಕೊಂಡಿದ್ದು ಸಾಧ್ಯವಾಗಲೇ ಇಲ್ಲ' ಎಂದು ನೊಂದು ನುಡಿದರು.

ಇದನ್ನೂ ಓದಿ: ಗಂಧದ ಗುಡಿ ನನ್ನ ಹೆಮ್ಮೆ; ಅಪ್ಪು ಜತೆಗಿನ ಟ್ರೆಕಿಂಗ್ ನೆನಪಿಸಿಕೊಂಡ ಅಶ್ವಿನಿ

ಇನ್ನು, ಈ ಚಿತ್ರವನ್ನು ಪುನೀತ್​ ಕುಟುಂಬದವರು ಕಣ್ತುಂಬಿಕೊಂಡಿದ್ದಾರೆ. ಚಿತ್ರ ವೀಕ್ಷಿಸಿ ಮಾತನಾಡಿರುವ ಪುನೀತ್​ ಸಹೋದರ ರಾಘವೇಂದ್ರ ರಾಜಕುಮಾರ್​, 'ಈ ಸಿನಿಮಾ ನೋಡಿದ ಮೇಲೆ ಪುನೀತ್​ ಅಭಿನಯದ ಯಾವ ಸಿನಿಮಾಗಳು ನೆನೆಪು ಬರುತ್ತಿಲ್ಲ. ಮುಂಚೆ 'ಗಂಧದ ಗುಡಿ' ಅಂದರೆ ಡಾ. ರಾಜಕುಮಾರ್ ಚಿತ್ರ ಎನ್ನುತ್ತಿದ್ದರು. ಈಗ 'ಗಂಧದ ಗುಡಿ' ಎಂದರೆ ಪುನೀತ್​ ಅನ್ನಬೇಕು ಎನ್ನುವ ರೀತಿಯಲ್ಲಿದೆ. ಈ ಸಿನಿಮಾ ನನ್ನ ತಮ್ಮನ ಜೊತೆ ಕಾಡಿಗೆ ಹೋಗಿ ಬಂದಂತಿದೆ. ಅವನು ರಾಜಕುಮಾರ್ ಮಗನಾಗಿ ಯಾಕೆ ಹುಟ್ಟಿದ ಅನ್ನೋದು ಗೊತ್ತಾಗಿದೆ. ಅವನು ಸಿನಿಮಾ ಮಾಡಲು ಭೂಮಿಗೆ ಬಂದಿಲ್ಲ. ಜನರಿಗೆ ಒಂದು ಸಂದೇಶ ನೀಡಲು ಬಂದಿದ್ದಾರೆ' ಎಂದು ರಾಘವೇಂದ್ರ ರಾಜಕುಮಾರ್​ ಹೇಳಿದ್ದಾರೆ.

https://www.vijayavani.net/gandhada-gudi-review/