ಈ ಚಿತ್ರ ತಾಯಂದಿರಿಗೆ ಯಾಕೆ ಇಷ್ಟ ಆಗುತ್ತದೆ, ಮಕ್ಕಳಿಗೆ ಯಾಕೆ ಆಗಬಹುದು ಎಂದು ಅವರು ಹೇಳಲಿಲ್ಲ. ‘ಅದನ್ನು ಚಿತ್ರಮಂದಿರದಲ್ಲೇ ನೋಡಿ, ಈಗ ಮಾತಾಡಿದರೆ ಬೇಗ ಆಗುತ್ತದೆ’ ಎಂದು ಸುಮ್ಮನಾದರು. ಇಷ್ಟೆಲ್ಲ ಆಗಿದ್ದು, ‘ಮದಗಜ’ ಚಿತ್ರದ ಬಿಡುಗಡೆಯ ಪತ್ರಿಕಾಗೋಷ್ಠಿ ಸಮಯದಲ್ಲಿ. ‘ಕಾಲಿಗೆ ಏಟು ಬಿದ್ದಾಗ, ನನ್ನಿಂದ ಚಿತ್ರೀಕರಣ ನಿಂತಿತು ಎಂಬ ಬೇಸರ ಇತ್ತು. ಹಾಗಾಗಿ, ಯಾವಾಗ ಎರಡನೇ ಲಾಕ್ಡೌನ್ ತೆರವಾಯಿತೋ, ಇನ್ನು ತಡ ಮಾಡಬಾರದು ಎಂದು ಚಿತ್ರೀಕರಣಕ್ಕೆ ನುಗ್ಗಿದೆವು. ಇಷ್ಟು ವರ್ಷಗಳಲ್ಲಿ ನಾನು ಯಾವತ್ತೂ ಆ ತರಹ ಚಿತ್ರೀಕರಣ ಮಾಡಿರಲಿಲ್ಲ. 26 ದಿನಗಳಲ್ಲಿ ಎರಡು ಫೈಟ್, ಎರಡು ಹಾಡು ಮತ್ತು ಹಲವು ಪ್ರಮುಖ ದೃಶ್ಯಗಳ ಚಿತ್ರೀಕರಣ ಮಾಡಿದೆವು. ನಿರ್ಮಾಣ ಸಂಸ್ಥೆಯ ಮತ್ತು ಚಿತ್ರತಂಡದ ಸಹಕಾರವಿಲ್ಲದಿದ್ದರೆ, ಅದು ಖಂಡಿತ ಸಾಧ್ಯವಾಗುತ್ತಿರಲಿಲ್ಲ’ ಎಂದು ನೆನಪಿಸಿಕೊಳ್ಳುತ್ತಾರೆ ಮುರಳಿ. ಇದೊಂದು ಒಳ್ಳೆಯ ಕನ್ನಡ ಚಿತ್ರ ಎನ್ನುವ ಶ್ರೀಮುರಳಿ, ‘ಒಂದೊಳ್ಳೆಯ ತಂಡದಿಂದಾಗಿ ಈ ಚಿತ್ರ ಸಾಧ್ಯವಾಗಿದೆ. ನಿರ್ವಪಕ ಉಮಾಪತಿ ಯಾವತ್ತೂ ಚಿತ್ರಕ್ಕೆ ಕಡಿಮೆ ಮಾಡಲಿಲ್ಲ. ದೊಡ್ಡ ತಾರಾಗಣದ ಚಿತ್ರ ಮಾಡಿದ್ದಾರೆ. ಪ್ರತೀ ದಿನ ಕಲಿಯುವುದಕ್ಕೆ ಸಾಕಷ್ಟು ವಿಷಯ ಸಿಗುತ್ತಿತ್ತು. ಚಿತ್ರದಲ್ಲಿ ಹಲವು ಹೈಲೈಟುಗಳಿವೆ. ಮೊದಲು ಚಿತ್ರ ನೋಡಿ. ಆ ನಂತರ ಮಾತಾಡೋಣ’ ಎಂದು ಪುನಃ ಅಲ್ಲಿಗೇ ವಾಪಸಾದರು.
