ರಕ್ತಸಿಕ್ತ "ಲ್ಯಾಂಡ್​ಲಾರ್ಡ್​'; ಪೋಸ್ಟ್​-ಪ್ರೊಡಕ್ಷನ್​ ಹಂತದಲ್ಲಿ ವಿಜಯ್​, ಜಡೇಶ್​ ಸಿನಿಮಾ

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:

"ಗುರು ಶಿಷ್ಯರು' ನಿರ್ದೇಶಕ ಜಡೇಶ್​ ಕೆ. ಹಂಪಿ ಮತ್ತು "ದುನಿಯಾ' ವಿಜಯ್​ ಕುಮಾರ್​ ಕಾಂಬಿನೇಷನ್​ನಲ್ಲಿ ಮೂಡಿಬರುತ್ತಿರುವ "ಲ್ಯಾಂಡ್​ಲಾರ್ಡ್​' ಚಿತ್ರದ ಬಹುತೇಕ ಚಿತ್ರೀಕರಣ ಪೂರ್ಣಗೊಂಡಿದೆ. ಸದ್ಯ ಡಬ್ಬಿಂಗ್​ ಆರಂಭಿಸಿರುವುದಾಗಿ ಇತ್ತೀಚೆಗೆ ವಿಜಯ್​ ಮಾಹಿತಿ ನೀಡಿದ್ದರು. ಇದೀಗ ವರಮಹಾಲಕ್ಷ್ಮೀ ಹಬ್ಬದ ಪ್ರಯುಕ್ತ ಚಿತ್ರತಂಡ ಹೊಸ ಪೋಸ್ಟರ್​ ಬಿಡುಗಡೆ ಮಾಡಿ ಹೊಸ ವಿಚಾರ ಹಂಚಿಕೊಂಡಿದೆ.

ಹೌದು, "ಲ್ಯಾಂಡ್​ಲಾರ್ಡ್​' ಚಿತ್ರದ ಆಡಿಯೋ ಹಕ್ಕುಗಳನ್ನು ದಾಖಲೆ ಬೆಲೆಗೆ ಆನಂದ್​ ಆಡಿಯೋ ಖರೀಸಿದೆ ಎಂದು ತಂಡ ಹೇಳಿಕೊಂಡಿದೆ. ಹಾಗೆಯೇ, ನಟ ವಿಜಯ್​ರ ಹೊಸ ಪೋಸ್ಟರ್​ ರಿವೀಲ್​ ಮಾಡಿದೆ. ಪೋಸ್ಟರ್​ನಲ್ಲಿ ವಿಜಯ್​ ಕತ್ತಿ ಹಿಡಿದಿದ್ದು, ಇಡೀ ದೇಹ ರಕ್ತಸಿಕ್ತವಾಗಿದೆ. ಅವರ ಹಿಂದೆ ಬೆಂಕಿ ಧಗಧಗಿಸುತ್ತಿದ್ದು, ಅವರತ್ತ ಕೊಡಲಿಗಳು ತೂರಿಬರುತ್ತಿರುವ ಪೋಸ್ಟರ್​ ಚಿತ್ರದ ನಿರೀಕ್ಷೆ ಹೆಚ್ಚಿಸುವಂತಿದೆ.

ಇನ್ನು "ಲ್ಯಾಂಡ್​ಲಾರ್ಡ್​'ನಲ್ಲಿ ವಿಜಯ್​ಗೆ ರಚಿತಾ ರಾಮ್​ ನಾಯಕಿಯಾಗಿದ್ದು, ವಿಜಯ್​ ಪುತ್ರಿ ರಿತನ್ಯಾ ಕೂಡ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿದ್ದಾರೆ. ಉಳಿದಂತೆ ಅಜನೀಶ್​ ಲೋಕನಾಥ್​ ಸಂಗೀತ, ಸ್ವಾಮಿ ಜೆ. ಗೌಡ ಛಾಯಾಗ್ರಹಣ ಚಿತ್ರಕ್ಕಿರಲಿದೆ. ಅಂದುಕೊಂಡಂತಾದರೆ, "ಲ್ಯಾಂಡ್​ಲಾರ್ಡ್​' ದಸರಾ ಅಥವಾ ದೀಪಾವಳಿಗೆ ತೆರೆ ಮೇಲೆ ಬರಲು ಸಿದ್ಧತೆ ನಡೆಸುತ್ತಿದೆ.