ಜನನಾಯಗನ್​ ಸಿನಿಮಾ ತಂಡ ಕೋರ್ಟ್​ ಮೆಟ್ಟಿಲೇರಬಾರದಿತ್ತು...ವಿಜಯ್​ಗೆ ಪವನ್​ ಕಲ್ಯಾಣ್​ ಕೊಟ್ಟ ಸಲಹೆ ಏನು? Pawan kalyan

ಅಮರಾವತಿ: ನಟ ವಿಜಯ್​ ಅವರು ಸಿನಿಮಾ ತೊರೆದು ರಾಜಕೀಯ ಅಖಾಡಕ್ಕೆ ಎಂಟ್ರಿ ಕೊಟ್ಟಿದ್ದಾರೆ. 2026ರ ತಮಿಳುನಾಡು ವಿಧಾನಸಭೆ ಚುನಾವಣೆಗೆ ಭರಪೂರ ಸಿದ್ಧತೆ ನಡೆಸಿಕೊಳ್ಳುತ್ತಿದ್ದಾರೆ. ಇದು ಒಂದು ಕಡೆಯಾದರೆ, ಮತ್ತೊಂದು ಕಡೆ ಅವರ ಕೊನೆಯ ಸಿನಿಮಾ ಜನನಾಯಗನ್​ ರಿಲೀಸ್(Jananayagan Cinema)​ ಆಗದೆ ಇರುವುದು ಅವರನ್ನು ಕಾಡುತ್ತಿರುವ ಗೊಂದಲವಾಗಿದೆ. ಈ ಬಗ್ಗೆ ಆಂಧ್ರಪ್ರದೇಶದ ಡಿಸಿಎಂ ಪವನ್​ ಕಲ್ಯಾಣ್​ ಮಾತನಾಡಿರುವುದು ಅಚ್ಚರಿಗೆ ಕಾರಣವಾಗಿದೆ.

ಜನನಾಯಗನ್​ ಚಿತ್ರದಲ್ಲಿ ಕೆಲವೊಂದು ಕೋಮು ಅಂಶಗಳು ಮತ್ತು ಹಿಂಸಾತ್ಮಕ ದೃಶ್ಯಗಳು ಇರುವ ಹಿನ್ನೆಲೆ ಅವುಗಳನ್ನು ಪರಿಷ್ಕರಿಸುವ ಬಗ್ಗೆ, ಸೆನ್ಸಾರ್​ ಮಂಡಳಿ ಮತ್ತು ಚಿತ್ರತಂಡದ ನಡುವೆ ಹಗ್ಗಜಗ್ಗಾಟ ಮುಂದುವರೆದಿದೆ. ಕೋರ್ಟ್​ ಮೆಟ್ಟಿಲೇರಿದರೂ ಸಹ ಪ್ರಮಾಣ ಪತ್ರ ಸಿಕ್ಕಿಲ್ಲ. ಇದರಿಂದ ಜನವರಿ09ರಂದು ರಿಲೀಸ್ ಆಗಬೇಕಿದ್ದ ಸಿನಿಮಾವನ್ನು ಹಲವಾರು ಬಾರಿ ಮುಂದೂಡುಲಾಗುತ್ತಿದೆ. ಸದ್ಯ ಈ ಪ್ರಕರಣವು ಮದ್ರಾಸ್ ಹೈಕೋರ್ಟ್​ನಲ್ಲಿದೆ.

`ಜನನಾಯಗನ್​ ಸಿನಿಮಾ ರಿಲೀಸ್​ ಬಗ್ಗೆ ಇದ್ದ ಸಮಸ್ಯೆಯನ್ನು ಸೆನ್ಸಾರ್​ ಮಂಡಳಿ ಮಟ್ಟದಲ್ಲಿ ನಿವಾರಿಸಬಹುದಿತ್ತು. ಆದರೆ, ಚಿತ್ರತಂಡ ಹಾಗೆ ಮಾಡಲಿಲ್ಲ. ಕೋರ್ಟ್​ ಮೆಟ್ಟಿಲೇರಿದರು. ತಾವು ಮಾಡಿಕೊಂಡಿರುವ ತಪ್ಪಿಗೆ ಎನ್​ಡಿಎ ಸರ್ಕಾರವನ್ನು ದೂಷಿಸುವುದು ಎಷ್ಟು ಸರಿ ಎಂದು ಉಸ್ತಾದ್​ ಭಗತ್ ಸಿಂಗ್​ (Ustad Bhagath Singh)ಸಿನಿಮಾ ಪ್ರೀ ರಿಲೀಸ್​ ಇವೆಂಟ್​ನಲ್ಲಿ ನಟ ಮತ್ತು ಆಂಧ್ರ ಡಿಸಿಎಂ ಪವನ್​ ಕಲ್ಯಾಣ್​ ಹೇಳಿದರು.

2025ರ ಸೆಪ್ಟೆಂಬರ್​ನಲ್ಲಿ ಓಜಿ ಸಿನಿಮಾ ರಿಲೀಸ್ ಆಗಿತ್ತು. ನನ್ನ ಈ ಚಿತ್ರ ರಿಲೀಸ್​ ಆಗುವ ಮುನ್ನ ನಿರ್ದೇಶಕರು ಮತ್ತು ನಿರ್ಮಾಪಕರು ನನ್ನ ಬಳಿಗೆ ಬಂದು. ನೀವು ಎನ್​ಡಿಎ ಸರ್ಕಾರದ ಭಾಗವಾಗಿದ್ದೀರಿ. ಹೀಗಾಗಿ ಸೆನ್ಸಾರ್​ ಮಂಡಳಿಯಿಂದ `ಎ' ಪ್ರಮಾಣ ಪತ್ರ ಪಡೆಯೋದು ಸುಲಭ ಎಂದು ಹೇಳಿದರು. ಆಗ ನಾನು ಅದು ಹೇಗೆ ಸಾಧ್ಯ? ಚಿತ್ರದಲ್ಲಿ ಹಿಂಸಾತ್ಮಕ ದೃಶ್ಯ ತಂದು ಪ್ರಮಾಣ ಪತ್ರ ಸಿಗೋ ಬಗ್ಗೆ ಹೇಗೆ ಭರವಸೆ ಇಟ್ಟುಕೊಳ್ಳುತ್ತೀರಿ. ನಿಯಮ ಎಂದರೆ ಎಲ್ಲರಿಗೂ ಒಂದೆನೇ ಎಂದು ಹೇಳಿದೆ.

`ಸಿನಿಮಾ ರಿಲೀಸ್​ಗಾಗಿ ಎ ಪ್ರಮಾಣ ಪತ್ರ ಪಡೆಯಲು ನಾನು ನನ್ನ ಪ್ರಭಾವ ಬೀರಿದರೂ ಸಹ ಆಡಳಿತ ಮತ್ತು ಸೆನ್ಸಾರ್ ಶಿಪ್​ ಸಂಪರ್ಕಿಸಲು ಸಾಧ್ಯವಾಗೋದಿಲ್ಲ. ಉಸ್ತಾದ್ ಭಗತ್​ ಸಿಂಗ್​ ಸಿನಿಮಾದಲ್ಲಿಯೂ ಹಾಡೊಂದನ್ನು ಬದಲಾಯಿಸಲು ಸೂಚನೆ ಕೊಟ್ಟಾಗ ಅದರ ಪಾಲನೆ ಮಾಡಲೇ ಬೇಕಾಯಿತು' ಎಂದು ಹೇಳಿದರು.

`ಏನೇ ಆಗಲಿ ಜನನಾಯಗನ್​ ಸಿನಿಮಾ ಪರಿಷ್ಕರಣೆ ಬಗ್ಗೆ ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ(CBFC) ಸೂಚನೆ ಕೊಟ್ಟರೆ, ಅದನ್ನು ಪಾಲಿಸುವುದು ಬಿಟ್ಟು ಬೇರೆ ಮಾರ್ಗವಿಲ್ಲ. ಇವರು ಕೋರ್ಟ್​ಗೆ ಹೋಗಬಾರದಿತ್ತು. ಇಲ್ಲದಿದ್ದರೇ ಅದು ಬೇರೆಯೇ ಕತೆಯಾಗಿರುತ್ತಿತ್ತು' ಎಂದು ಡಿಸಿಎಂ ಪವನ್​ ಕಲ್ಯಾಣ್​ ಹೇಳಿದರು.

ಎಚ್​ ವಿನೋದ್​​ ಅವರು ನಿರ್ದೇಶಿರುವ ಜನನಾಯಗನ್​ ಸಿನಿಮಾದಲ್ಲಿ ವಿಜಯ್​ ಅವರು ನಟಿಸಿದ್ದಾರೆ. ಇದು ಅವರ 69ನೇ ಸಿನಿಮಾ ಅಲ್ಲದೇ, ಕೊನೆಯ ಸಿನಿಮಾವಾಗಿದೆ. ಕೆವಿಎನ್​ ಪ್ರೊಡಕ್ಷನ್​ ಅಡಿ ನಿರ್ಮಾಣವಾಗಿರುವ ಈ ಸಿನಿಮಾದಲ್ಲಿ ಪೂಜಾ ಹೆಗ್ಡೆ, ಮಮಿತಾ ಬೈಜು, ಬಾಬಿ ಡಿಯೋಲ್, ಪ್ರಕಾಶ್​ ರಾಜ್​, ಪ್ರಿಯಾಮಣಿ ಸೇರಿದಂತೆ ಘಟಾನುಘಟಿ ನಾಯಕ-ನಟಿಯರಿದ್ದಾರೆ. ಇನ್ನು ಅನಿರುದ್ಧ್ ರವಿಚಂದರ್​ ಅವರ ಸಂಗೀತ ಈ ಸಿನಿಮಾದಲ್ಲಿ ಮೂಡಿಬಂದಿದೆ, (ಏಜನ್ಸೀಸ್).