ದಳಪತಿ ವಿಜಯ್​ ಕೊನೇ ಸಿನಮಾಗೆ ಎದುರಾಯ್ತು ಕಂಟಕ: ಜ.9ಕ್ಕೆ ಬಿಡುಗಡೆ ಆಗೋದು ಡೌಟ್​! ಏನಿದು ಸೆನ್ಸಾರ್​ ಫೈಟ್​? Jana Nayagan

ಚೆನ್ನೈ: ತಮಿಳಿಗ ವೆಟ್ರಿ ಕಳಗಂ ಪಕ್ಷದ ಸಂಸ್ಥಾಪಕ ಹಾಗೂ ಕಾಲಿವುಡ್​ ಸೂಪರ್​ ಸ್ಟಾರ್​ ವಿಜಯ್​ ನಟನೆಯ ಕೊನೆಯ ಸಿನಿಮಾ 'ಜನ ನಾಯಗನ್' ( Jana Nayagan ) ಹೇಳಿದ ದಿನಾಂಕದಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗುವುದು ಅನುಮಾನವಾಗಿದೆ. ಏಕೆಂದರೆ, ಈ ಸಿನಿಮಾ ಇದೀಗ ಸಂಕಷ್ಟದ ಸುಳಿಯಲ್ಲಿ ಸಿಲುಕಿದೆ. ಅಷ್ಟಕ್ಕೂ ಜನ ನಾಯಗನ್​ ಸಿನಿಮಾಗೆ ಏನಾಯಿತು? ಎಂಬ ನಿಮ್ಮ ಪ್ರಶ್ನೆಗೆ ಉತ್ತರ ಇಲ್ಲಿದೆ.

ಎರಡು ವಾರಗಳ ಹಿಂದೆ, ಸೆನ್ಸಾರ್ ಮಂಡಳಿ ಸದಸ್ಯರು 'ಜನ ನಾಯಗನ್' ಸಿನಿಮಾವನ್ನು ವೀಕ್ಷಿಸಿದರು. ಇದಾದ ಮೂರು ದಿನಗಳ ನಂತರ ಸಿನಿಮಾದ ಕೆಲವು ದೃಶ್ಯಗಳನ್ನು ತೆಗೆಯುವಂತೆ ಚಿತ್ರತಂಡಕ್ಕೆ ಸೂಚಿಸಿದರು. ಹೇಳಿದ ದೃಶ್ಯಗಳನ್ನು ತೆಗೆದರೆ ಮಾತ್ರ ಚಿತ್ರಕ್ಕೆ ಯು/ಎ ಪ್ರಮಾಣಪತ್ರ ನೀಡುವುದಾಗಿ ಸೆನ್ಸಾರ್​ ಮಂಡಳಿ ತಿಳಿಸಿತು. ಅದರಂತೆ, ಚಿತ್ರತಂಡವು ಕೂಡ ನಿಯಮಗಳನ್ನು ಪಾಲಿಸಿತು ಮತ್ತು ಸೆನ್ಸಾರ್ ಪ್ರಮಾಣಪತ್ರವು ತಕ್ಷಣ ಸಿಗುತ್ತದೆ ಎಂದು ಭಾವಿಸಿತ್ತು. ಆದರೆ, ಎರಡು ದಿನಗಳ ನಂತರವೂ ಸೆನ್ಸಾರ್‌ನಿಂದ ಯಾವುದೇ ಪ್ರತಿಕ್ರಿಯೆ ಬಾರದ ಕಾರಣ ನಿರ್ಮಾಣ ಕಂಪನಿ ಕೆವಿಎನ್​ ಪ್ರೊಡಕ್ಷನ್​ ಮತ್ತೆ ಸೆನ್ಸಾರ್​ ಮಂಡಳಿಯನ್ನು ಪ್ರಶ್ನಿಸಿತು.

ಚಿತ್ರ ಬಿಡುಗಡೆಗೆ ಕೆಲವೇ ದಿನಗಳ ಮೊದಲು, ಈ ಸಿನಿಮಾದಲ್ಲಿ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತರುವಂತಹ ಸನ್ನಿವೇಶಗಳಿವೆ ಮತ್ತು ಸಶಸ್ತ್ರ ಪಡೆಗಳನ್ನು (Armed Forces) ಆಕ್ಷೇಪಾರ್ಹವಾಗಿ ಚಿತ್ರಿಸಲಾಗಿದೆ ಎಂಬ ದೂರುಗಳು ಕೇಳಿಬಂದವು. ಈ ಹಿನ್ನೆಲೆಯಲ್ಲಿ ಜನ ನಾಯಗನ್​ ಚಿತ್ರವನ್ನು ಮರು ಪರಿಶೀಲಿಸಲು 'ಪರಿಶೀಲನಾ ಸಮಿತಿ'ಗೆ ವರ್ಗಾಯಿಸಿದೆ. ಇದರಿಂದಾಗಿ ಚಿತ್ರಕ್ಕೆ ಸಿಗಬೇಕಿದ್ದ ಅಂತಿಮ ಪ್ರಮಾಣಪತ್ರ ವಿಳಂಬವಾಗಿದೆ. ಈ ಬಗ್ಗೆ ಏನಾದರೂ ಹೇಳಲು ಬಯಸಿದರೆ, ಮುಂಬೈನಲ್ಲಿರುವ ಕಚೇರಿಯನ್ನು ಸಂಪರ್ಕಿಸಬೇಕು ಎಂದು ಜನ ನಾಯಗನ್​ ಚಿತ್ರತಂಡಕ್ಕೆ ಸೆನ್ಸಾರ್​ ಮಂಡಳಿ ತಿಳಿಸಿದೆ.

ಜನವರಿ 9 ರಂದು ಸಿನಿಮಾ ಬಿಡುಗಡೆಯಾಗಬೇಕಿದ್ದು, ಇನ್ನೂ ಪ್ರಮಾಣಪತ್ರ ಸಿಗದ ಕಾರಣ ಚಿತ್ರತಂಡ ಆತಂಕಕ್ಕೆ ಒಳಗಾಗಿದೆ. ಹೀಗಾಗಿ, ನಿರ್ಮಾಣ ಕಂಪನಿ, ಸೆನ್ಸಾರ್ ಪ್ರಮಾಣಪತ್ರಕ್ಕಾಗಿ ಮದ್ರಾಸ್​ ಹೈಕೋರ್ಟ್‌ನಲ್ಲಿ ತುರ್ತು ಅರ್ಜಿಯನ್ನು ಸಲ್ಲಿಸಿದೆ. ಸೆನ್ಸಾರ್ ಪ್ರಮಾಣಪತ್ರವನ್ನು ತ್ವರಿತವಾಗಿ ನೀಡಬೇಕು ಆಗ್ರಹಿಸಿದೆ. ಈ ಹಿನ್ನೆಲೆಯಲ್ಲಿ ಇಂದು (ಜನವರಿ 07) ಮದ್ರಾಸ್​ ಹೈಕೊರ್ಟ್​ನಲ್ಲಿ ವಿಚಾರಣೆ ಸಹ ನಡೆಯಿತು. ನಾವು ಸೆನ್ಸಾರ್ ಮಂಡಳಿ ಸೂಚಿಸಿದ ಎಲ್ಲ 27 ಕಟ್‌ಗಳನ್ನು ಮಾಡಿದ್ದೇವೆ. ಸಿನಿಮಾ ಇನ್ನೂ ಸಾರ್ವಜನಿಕವಾಗಿ ಬಿಡುಗಡೆಯೇ ಆಗಿಲ್ಲದಿರುವಾಗ, ಅದರ ವಿರುದ್ಧ ದೂರು ಬಂದಿರುವುದು ಸಂಶಯಾಸ್ಪದವಾಗಿದೆ ಎಂದು ನಿರ್ಮಾಪಕರ ಪರ ವಕೀಲ ಪರಾಸರನ್ ವಾದಿಸಿದ್ದಾರೆ.

ಸೆನ್ಸಾರ್​ ಮಂಡಳಿ ಪರ ವಾದಿಸಿದ ವಕೀಲರು, ಜನ ನಾಯಗನ್ ಚಿತ್ರವನ್ನು ನೋಡಿದ ಸದಸ್ಯರಲ್ಲಿ ಒಬ್ಬರು ಚಿತ್ರದ ಕೆಲವು ದೃಶ್ಯಗಳಿಗೆ ಆಕ್ಷೇಪಣೆಗಳನ್ನು ವ್ಯಕ್ತಪಡಿಸಿದ್ದಾರೆ. ಅವುಗಳನ್ನು ಪರಿಷ್ಕರಣಾ ಸಮಿತಿ ಪರಿಶೀಲಿಸಬೇಕಿದೆ. ಆನಂತರವೇ ಅದು ಮುಂದಿನ ಹಂತಕ್ಕೆ ಹೋಗುತ್ತದೆ. ಹೆಚ್ಚಿನ ಬದಲಾವಣೆಗಳು ಅಗತ್ಯವಿದ್ದರೆ, ಅದನ್ನು ಕಾನೂನಿನ ಪ್ರಕಾರವೇ ಮಾಡಲಾಗುತ್ತದೆ. ನೀವು ನ್ಯಾಯಾಲಯಕ್ಕೆ ಬಂದು ಸಿನಿಮಾವನ್ನು ಮತ್ತೆ ಪರಿಶೀಲಿಸುವ ಅಗತ್ಯವಿಲ್ಲ ಎಂದು ಹೇಳಲು ಸಾಧ್ಯವಿಲ್ಲ. ಸಿಬಿಎಫ್‌ಸಿ ಅಧ್ಯಕ್ಷರು ಈಗಾಗಲೇ ಪ್ರಾದೇಶಿಕ ಕಚೇರಿಗೆ ಚಿತ್ರವನ್ನು ಸದ್ಯಕ್ಕೆ ತಡೆಹಿಡಿಯಬೇಕೆಂದು ತಿಳಿಸಿದ್ದಾರೆ. ಜನವರಿ 05 ರಂದು ನಿರ್ಮಾಪಕರಿಗೂ ಅದೇ ವಿಷಯವನ್ನು ತಿಳಿಸಲಾಯಿತು. ಹೊಸ ಸಮಿತಿಯು ಚಿತ್ರವನ್ನು ಮತ್ತೆ ಪರಿಶೀಲಿಸುತ್ತದೆ. ಅದಕ್ಕಾಗಿ ಇನ್ನೂ 15 ದಿನಗಳು ಬೇಕಾಗುತ್ತದೆ. ಇದಕ್ಕೆ ಒಪ್ಪಿಗೆ ದೊರೆತರೆ, ಹೊಸ ಸಮಿತಿಯನ್ನು ರಚಿಸಲು 20 ದಿನಗಳು ಬೇಕಾಗುತ್ತದೆ ಎಂದರು.

ಜನ ನಾಯಗನ್ ನಿರ್ಮಾಣ ಕಂಪನಿಯಾದ ಕೆವಿನ್ ಪ್ರೊಡಕ್ಷನ್ಸ್‌ನ ವಕೀಲ ಪರಾಸರನ್ ಮಾತನಾಡಿ, ಈ ಚಿತ್ರಕ್ಕೆ ಸಂಬಂಧಿಸಿದ ಯಾವುದೇ ವಿಷಯವನ್ನು 'ಇ-ಸಿನಿ ಪ್ರಮಾಣ್' ಪೋರ್ಟಲ್ ಮೂಲಕ ವರದಿ ಮಾಡಬೇಕು. ಆದರೆ, ಸೆನ್ಸಾರ್‌ ಮಂಡಳಿ ಸದಸ್ಯರು ಆ ರೀತಿ ವರ್ತಿಸಲಿಲ್ಲ. ಅವರು ತಮ್ಮ ಅಧಿಕಾರ ವ್ಯಾಪ್ತಿಗೆ ಬಾರದ ಕೆಲವನ್ನು ಮಾಡುತ್ತಿದ್ದಾರೆ. ಸದಸ್ಯರಲ್ಲಿ ಒಬ್ಬರಿಗೆ ಮಾತ್ರ ಆಕ್ಷೇಪಣೆಗಳಿದ್ದವು. ಉಳಿದವರಿಗೆ ಯಾವುದೇ ಸಮಸ್ಯೆ ಇಲ್ಲ. ಇಲ್ಲಿಗೆ ಒಪ್ಪಿಗೆ ಅನುಪಾತವು 4:1 ಇದೆ. ಹೀಗಿರುವಾಗ ಸಿನಿಮಾವನ್ನು ಮತ್ತೆ ಪರಿಶೀಲನೆಗೆ ಹೇಗೆ ಕಳುಹಿಸಬಹುದು? ಸೆನ್ಸಾರ್ ಮಂಡಳಿಯು ಕಾನೂನಿನ ಪ್ರಕಾರ ತನ್ನ ಕರ್ತವ್ಯಗಳನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿದೆ ಎಂದು ಪರಾಸರನ್ ವಾದಿಸಿದರು. ಇದಕ್ಕೆ ಪ್ರತಿವಾದ ಮಂಡಿಸಿದ ಸಾಲಿಸಿಟರ್ ಜನರಲ್, ಚಿತ್ರವನ್ನು ಮತ್ತೊಮ್ಮೆ ಪರಿಶೀಲಿಸಲು ಯಾರೂ ಹೇಳಿಲ್ಲ ಮತ್ತು ಅಧ್ಯಕ್ಷರು ನಿರ್ಧಾರ ತೆಗೆದುಕೊಳ್ಳುವ ಅಧಿಕಾರವನ್ನು ಹೊಂದಿದ್ದಾರೆ ಎಂದರು.

ವಾದಗಳನ್ನು ಆಲಿಸಿದ ನ್ಯಾಯಮೂರ್ತಿ ಆಶಾ, ತೀರ್ಪನ್ನು ಕಾಯ್ದಿರಿಸಿದ್ದಾರೆ. ಜನವರಿ 9 ರಂದು ಅಂತಿಮ ಆದೇಶ ಪ್ರಕಟವಾಗಲಿದೆ. ಚಿತ್ರತಂಡದ ಪರವಾಗಿ ಈ ತೀರ್ಪು ಬಂದರೂ ಅದೇ ದಿನ ಪ್ರದರ್ಶನಗಳು ನಡೆಯುತ್ತವೆಯೇ ಎಂಬ ಅನುಮಾನ ಇದೆ. ಒಂದು ವೇಳೆ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವಂತೆ ಚಿತ್ರವನ್ನು 14ನೇ ತಾರೀಖಿಗೆ ಮುಂದೂಡಲಾಗಿದೆಯೇ? ಎಂಬ ಪ್ರಶ್ನೆಗೆ ಉತ್ತರ ಸಿಗಬೇಕೆಂದರೆ, 9ನೇ ತಾರೀಖಿನವರೆಗೂ ಕಾದು ನೋಡಬೇಕಿದೆ, (ಏಜೆನ್ಸೀಸ್​).