ಈ ಮೊದಲೆಲ್ಲ ಅಪ್ಪ ಆಫೀಸ್ಗೆ ಹೋಗ್ತಿದ್ರು, ಮನೆಯಲ್ಲಿ ಪ್ರತಿ ಭಾನುವಾರವಷ್ಟೇ ಫ್ಯಾಮಿಲಿ ಡೇ ಅಂತ ಇರುತ್ತಿತ್ತು. ಅದನ್ನು ಹೊರತುಪಡಿಸಿದರೆ ನಮ್ಮ ಪಾಡಿಗೆ ನಾವಿರುತ್ತಿದ್ದೇವು. ಆದರೆ, ಲಾಕ್ಡೌನ್ ಜಾರಿಯಾಗಿದ್ದರಿಂದ ಪ್ರತಿ ದಿನವೂ ಕುಟುಂಬದೊಂದಿಗೆ ಕಳೆಯುತ್ತಿದ್ದೇವೆ. ಲಾಕ್ಡೌನ್ನ ಸಾಕಷ್ಟು ಸಮಯವನ್ನು ಇಡೀ ಕುಟುಂಬದ ಜತೆಗೆ ಲೂಡೋ ಆಡುವ ಮೂಲಕ ಕಳೆದಿದ್ದೇನೆ. ಇದೆಲ್ಲದಕ್ಕಿಂತ ಹೆಚ್ಚಾಗಿ ಅಪ್ಪನ ಜತೆ ವರ್ಕೌಟ್ ಸಹ ಶುರು ಮಾಡಿದ್ದೆ. ನನಗೂ ಸಹ ಸಾಕಷ್ಟು ವಿಷಯಗಳಲ್ಲಿ ಅಪ್ಪ ಟ್ರೈನ್ ಮಾಡಿದ್ದಾರೆ. ಈ ಲಾಕ್ಡೌನ್ ಅವಧಿಯಲ್ಲಿ, ಅಪ್ಪನಿಂದ ನಾನು ಕಲಿತ ಬಹುಮುಖ್ಯವಾದ ಅಂಶ ಏನೆಂದರೆ, ತಾಳ್ಮೆ. ಅಪ್ಪ ಸದಾ ಯಾವಾಗಲೂ ತುಂಬ ಕೂಲ್ ವ್ಯಕ್ತಿ. ಯಾರದ್ರೂ ಏನೇ ಹೇಳುತ್ತಿದ್ದರೆ ಅದನ್ನು ತುಂಬ ತಾಳ್ಮೆಯಿಂದ ಕೇಳುತ್ತಾರೆ. ಯಾವತ್ತೂ ಅಹಂ ತೋರಿಸಿದವರಲ್ಲ. ಅದರಲ್ಲೂ ಮನೆಯವರೊಂದಿಗೆ ಯಾವತ್ತೂ ಅಹಂ ಇಟ್ಟುಕೊಳ್ಳಬಾರದೆಂದು ಹೇಳಿಕೊಟ್ಟಿದ್ದಾರೆ. ಮೊದಲೆಲ್ಲ ಜಗಳ ಮಾಡಿ ಮಾತನಾಡುವುದನ್ನೇ ಬಿಟ್ಟು ಬಿಡುತ್ತಿದ್ದೆ. ಈಗ ಜಗಳವಾದರೆ ನಾನೇ ಎಲ್ಲರಿಗಿಂತ ಮೊದಲು ರಾಜಿ ಆಗಿಬಿಡುತ್ತೇನೆ.
