ಸಿಹಿ-ಕಹಿಗಳ ದಾಂಪತ್ಯ: ರಿಷಿ ಕಪೂರ್ ಮತ್ತು ನೀತು ಸಿಂಗ್ ಮದುವೆಯಾಗಿದ್ದು 1980ರಲ್ಲಾದರೂ, ಅದ್ಕಕೂ ಮುನ್ನ ಇಬ್ಬರೂ ಹಲವು ಚಿತ್ರಗಳಲ್ಲಿ ನಟಿಸಿದ್ದರು. ಅವರಿಬ್ಬರೂ ಜತೆಯಾಗಿ ನಟಿಸಿದ ಮೊದಲ ಚಿತ್ರ ಪುಟ್ಟಣ್ಣ ಕಣಗಾಲ್ ನಿರ್ದೇಶನದ ‘ಜಹ್ರೀಲಾ ಇನ್ಸಾನ್’. ಈ ಜೋಡಿ ಜನತೆಗೆ ಇಷ್ಟವಾದ ಕಾರಣ, ಮುಂದೆ ಹಲವು ಚಿತ್ರಗಳಲ್ಲಿ ಇಬ್ಬರೂ ಒಟ್ಟಿಗೆ ನಟಿಸಿದರು. ‘ದೋ ಅಂಜಾನೆ’, ‘ಕಭಿ ಕಭಿ’, ‘ಜಿಂದಾ ದಿಲ್’, ‘ರಫೂ ಚಕ್ಕರ್’, ‘ಅಮರ್ ಅಕ್ಬರ್ ಆಂಟೋನಿ’ ಮುಂತಾದ ಚಿತ್ರಗಳಲ್ಲಿ ಜತೆಯಾಗಿ ನಟಿಸುವಾಗ ಅವರಿಬ್ಬರ ಮಧ್ಯೆ ಪ್ರೀತಿ ಟಿಸಿಲೊಡೆದು ದಾಂಪತ್ಯ ಜೀವನಕ್ಕೆ ಕಾಲಿಡುವಂತಾಯಿತು. ಮದುವೆಯಾಗಿ ಕೆಲವು ವರ್ಷಗಳವರೆಗೂ ಸುಖ ಸಂಸಾರ ನಡೆಸಿದರಾದರೂ, ನಂತರ ಸಾಕಷ್ಟು ಸಮಸ್ಯೆಗಳಾದವು. ಒಂದು ಹಂತದಲ್ಲಿ ಇಬ್ಬರೂ ದೂರಾಗುತ್ತಾರೆ ಎಂಬ ಸುದ್ದಿಗಳು ಕೇಳಿ ಬಂದವು. ಇವೆಲ್ಲವನ್ನೂ ಸುಳ್ಳು ಮಾಡಿದ ರಿಷಿ, ಬದುಕಿರುವವರೆಗೂ ನೀತೂ ಸಿಂಗ್ ಜತೆಗೆ ಸಂಸಾರ ನಡೆಸಿದರು. ಅಷ್ಟೇ ಅಲ್ಲ, ಕೆಲ ವರ್ಷಗಳ ಹಿಂದೆಯೂ ‘ದೋ ದೂನಿ ಚಾರ್’, ‘ಬೇಷರಮ್, ‘ಜಬ್ ತಕ್ ಹೇ ಜಾನ್’ ಮುಂತಾದ ಚಿತ್ರಗಳಲ್ಲಿ ಜತೆಯಾಗಿಯೇ ನಟಿಸಿದರು.
