ಲವ್​ಸ್ಟೋರಿಗೆ ಸಿಕ್ತು ಪವರ್; ಬಿಗ್ ಬಾಸ್ ಸ್ಪರ್ಧಿ ಧನುಶ್ರೀ ಈಗ ನಾಯಕಿ

ಬೆಂಗಳೂರು: ‘ಬಿಗ್ ಬಾಸ್’ ಸೀಸನ್ 8ರ ಸ್ಪರ್ಧಿ ಧನುಶ್ರೀ ಇದೀಗ ‘ಒಂದೊಳ್ಳೆ ಲವ್​ಸ್ಟೋರಿ’ಯ ಹಿಂದೆ ಬಿದ್ದಿದ್ದಾರೆ. ಅಂದರೆ, ಆ ಶೀರ್ಷಿಕೆಯ ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸುವ ಮೂಲಕ ಚಂದನವನಕ್ಕೆ ಪದಾರ್ಪಣೆ ಮಾಡಿದ್ದಾರೆ. ಅವರ ಮೊದಲ ಚಿತ್ರಕ್ಕೆ ನಟ ಪುನೀತ್ ರಾಜಕುಮಾರ್ ಸಹ ಸಾಥ್ ನೀಡಿದ್ದು ವಿಶೇಷ. ಪ್ರವೀಣ್ ಸುತಾರ್ ನಿರ್ದೇಶನದ ‘ಒಂದೊಳ್ಳೆ ಲವ್​ಸ್ಟೋರಿ’ ಸಿನಿಮಾ ಬಹುತೇಕ ಶೂಟಿಂಗ್ ಮುಗಿಸಿ ಚಿತ್ರೀಕರಣೋತ್ತರ ಕೆಲಸದಲ್ಲಿ ನಿರತವಾಗಿದೆ. ಈ ನಡುವೆ ಚಿತ್ರದ ಶೀರ್ಷಿಕೆ ಅನಾವರಣ ಕಾರ್ಯಕ್ರಮ ನೆರವೇರಿದೆ. ಪುನೀತ್ ರಾಜಕುಮಾರ್ ಆಗಮಿಸಿ ಪೋಸ್ಟರ್ ಲಾಂಚ್ ಮಾಡಿ ತಂಡಕ್ಕೆ ಹರಸಿದ್ದಾರೆ.

‘ಚಿತ್ರದ ಶೀರ್ಷಿಕೆಯನ್ನು ಪುನೀತ್ ಅನಾವರಣ ಮಾಡಿರುವುದರಿಂದ ನಮಗೂ ಪವರ್ ಸಿಕ್ಕಂತಾಗಿದೆ. ಶೀರ್ಷಿಕೆ ಹೇಳುವಂತೆ ಇದೊಂದು ತ್ರಿಕೋನ ಪ್ರೇಮಕಥೆಯುಳ್ಳ ಸಿನಿಮಾ. ಅಶ್ವಿನ್ ಈ ಚಿತ್ರದಲ್ಲಿ ನಾಯಕನಾಗಿ ನಟಿಸಿದ್ದಾರೆ. ಮಧ್ಯಮ ವರ್ಗದ ಹುಡುಗನ ಸೋತು ಗೆಲ್ಲುವ ಕಥೆ ಇದು. ಧನುಶ್ರೀ ಅವರದ್ದೂ ಅದೇ ಹಾದಿಯಲ್ಲಿ ಸಾಗುವ ಪಾತ್ರ. ಮಲಯಾಳಂ ಮತ್ತು ತಮಿಳಿನಲ್ಲಿ ಗುರುತಿಸಿಕೊಂಡಿರುವ ಇಂದೂಜಾ ಸಹ ಮತ್ತೋರ್ವ ನಾಯಕಿಯಾದ್ದಾರೆ’ ಎಂಬುದು ನಿರ್ದೇಶಕರ ಮಾತು. ಪಿನಾಕಿನ ಬ್ಯಾನರ್​ನಲ್ಲಿ ಅಶ್ವಿನ್ ಮತ್ತು ನಿರಂಜನ್ ಚಿತ್ರ ನಿರ್ವಣವಾಗಿದ್ದು, ವಿನೋದ್ ಮಂಡ್ಯ ಛಾಯಾಗ್ರಹಣ, ಆಕಾಶ್ ಜಾಧವ್ ಸಂಗೀತ ನೀಡಿದ್ದಾರೆ. ವಿಜೇಂದ್ರ ಜೋಡಿದಾರ ಸಂಭಾಷಣೆ ಬರೆದಿದ್ದಾರೆ.

https://www.vijayavani.net/kapu-siddalingaswami-as-tourism-development-corporation-chair-person/

https://www.vijayavani.net/club-house-became-that-connecting-link/