ಮತ್ತೆ ಭಾಗ್ಯವಂತರು; ಹೊಸ ತಂತ್ರಜ್ಞಾನದಲ್ಲಿ ಹಳೆಯ ಚಿತ್ರ..

ಡಾ. ರಾಜಕುಮಾರ್ ಅವರ ಯಶಸ್ವಿ ಚಿತ್ರಗಳಲ್ಲಿ ‘ಭಾಗ್ಯವಂತರು’ ಸಹ ಒಂದು. ದ್ವಾರಕೀಶ್ ನಿರ್ವಣದ, ಭಾರ್ಗವ ನಿರ್ದೇಶನದ ಈ ಚಿತ್ರ ಆ ಕಾಲಕ್ಕೆ ಸೂಪರ್ ಹಿಟ್ ಆಗಿತ್ತು. ಈಗ ‘ಭಾಗ್ಯವಂತರು’ ಚಿತ್ರ ನವೆಂಬರ್​ನಲ್ಲಿ ಹೊಸ ತಂತ್ರಜ್ಞಾನದೊಂದಿಗೆ ಬಿಡುಗಡೆಯಾಗುತ್ತಿದೆ. ಚಿತ್ರಕ್ಕೆ ಡಿಐ ಮಾಡಿಸಿ, 7.1 ಸೌಂಡ್​ನಲ್ಲಿ ಬಿಡುಗಡೆ ಮಾಡಲಾಗುತ್ತಿದೆ. ಈ ಹಿಂದೆ ರಾಜಕುಮಾರ್ ಅವರ ‘ಆಪರೇಷನ್ ಡೈಮಂಡ್ ರಾಕೆಟ್’, ‘ನಾನೊಬ್ಬ ಕಳ್ಳ’, ‘ದಾರಿ ತಪ್ಪಿದ ಮಗ’ ಚಿತ್ರಗಳನ್ನು ಹೊಸ ತಂತ್ರಜ್ಞಾನದಲ್ಲಿ ಬಿಡುಗಡೆ ಮಾಡಿದ್ದ ಮುನಿರಾಜು, ಈ ಚಿತ್ರವನ್ನೂ ಬಿಡುಗಡೆ ಮಾಡುತ್ತಿದ್ದಾರೆ.

ಈ ಚಿತ್ರದ ಕುರಿತು ಮಾತನಾಡುವ ಹಿರಿಯ ನಿರ್ದೇಶಕ ಭಾರ್ಗವ, ‘ನನ್ನ ಮೊದಲ ನಿರ್ದೇಶನದ ಚಿತ್ರ ‘ಭಾಗ್ಯವಂತರು’. ದ್ವಾರಕೀಶ್ ಈ ಚಿತ್ರದ ನಿರ್ವಪಕರು. ನಾನು ಆಗಲೇ ರಾಜಕುಮಾರ್ ನಟಿಸಿದ್ದ ‘ಬಬ್ರುವಾಹನ’, ‘ನಾ ನಿನ್ನ ಮರೆಯಲಾರೆ’, ‘ಜಗ ಮೆಚ್ಚಿದ ಮಗ’ ಸೇರಿ ಕೆಲವು ಚಿತ್ರಗಳಿಗೆ ಸಹ ನಿರ್ದೇಶನ ಮಾಡಿದ್ದೆ. ಹಾಗಾಗಿ ರಾಜ್ ಅವರಿಗೆ ನನ್ನ ಮೇಲೆ ವಿಶೇಷ ಪ್ರೀತಿ . ದ್ವಾರಕೀಶ್ ಮತ್ತು ರಾಜಕುಮಾರ್ ಇಬ್ಬರೂ ನೀವೆ ಈ ಚಿತ್ರ ನಿರ್ದೇಶನ ಮಾಡಿ ಎಂದರು. 44 ವರ್ಷಗಳ ಹಿಂದೆ ಈ ಚಿತ್ರ ಮಾಡಿದಾಗ, ಅದು ದೊಡ್ಡ ಯಶಸ್ಸು ಕಾಣಬಹುದು, ಜನ ಇಷ್ಟೊಂದು ಇಷ್ಟಪಡಬಹುದು ಎಂದು ನಿರೀಕ್ಷಿಸಿರಲಿಲ್ಲ’ ಎನ್ನುತ್ತಾರೆ.

ಮುನಿರಾಜುಗೆ 1978ರಿಂದ ಕನ್ನಡ ಚಿತ್ರರಂಗದೊಂದಿಗೆ ನಂಟಂತೆ. ‘18 ವರ್ಷಗಳ ಕಾಲ ವಜ್ರೇಶ್ವರಿ ಸಂಸ್ಥೆಯಲ್ಲಿ ಕೆಲಸ ಮಾಡಿದ್ದೇನೆ. ಪಾರ್ವತಮ್ಮ ರಾಜಕುಮಾರ್ ನನ್ನನ್ನು ಚಿತ್ರಮಂದಿರದ ಆರ್​ಪಿಯಾಗಿ ನೇಮಕ ಮಾಡಿ ಯಳಂದೂರಿಗೆ ಕಳುಹಿಸಿದ್ದರು. ಅಲ್ಲಿಂದ ಅವರ ಕುಟುಂಬದ ಜತೆಗೆ ಒಡನಾಟ ಇದೆ. ನಾನು ಅಣ್ಣಾವ್ರ ಅಪ್ಪಟ ಅಭಿಮಾನಿ. ಈ ಹಿಂದೆ ರಾಜಕುಮಾರ್ ಅವರ ಚಿತ್ರಗಳನ್ನು ಮರುಬಿಡುಗಡೆ ಮಾಡಿ ಲಾಭ ನೋಡಿದ್ದೆ. ಈಗ ‘ಭಾಗ್ಯವಂತರು’ 150 ಚಿತ್ರಮಂದಿರಗಳಲ್ಲಿ ಬಿಡುಗಡೆ ಮಾಡುತ್ತಿದ್ದೇನೆ’ ಎನ್ನುತ್ತಾರೆ ಮುನಿರಾಜು.

https://www.vijayavani.net/95-of-people-in-the-country-dont-need-petrol/

https://www.vijayavani.net/youth-fought-for-a-girl-and-stabbed-a-student-police-arrested-2-accused/