ಬೆಂಗಳೂರು: ಲಾಕ್ಡೌನ್ ಸಮಯದಲ್ಲಿ ಸಿನಿಮಾ ಕಲಾವಿದರೆಲ್ಲಾ ಓದು, ಸಿನಿಮಾ ವೀಕ್ಷಣೆ ಮತ್ತು ಮನೆ ಕೆಲಸ ಮಾಡುವುದರಲ್ಲಿ ತೊಡಗಿಸಿಕೊಂಡರೆ, ಉಪೇಂದ್ರ ಮಾತ್ರ ಸೀದಾ ತಮ್ಮ ತೋಟಕ್ಕೆ ಹೋಗಿ ಸಾವಯವ ಕೃಷಿಯಲ್ಲಿ ತೊಡಗಿಸಿಕೊಂಡಿದ್ದರು. ಮೂರು ತಿಂಗಳ ನಂತರ ಹೂವು ಮತ್ತು ತರಕಾರಿ ಬೆಳೆದಿರುವ ಉಪೇಂದ್ರ, ಆ ವಿಡಿಯೋವನ್ನು ಸಾಮಾಜಿಕ ಜಾಲತಾಣಗಳ ಮೂಲಕ ಹಂಚಿಕೊಂಡಿದ್ದಾರೆ. ಬೇರೆಲ್ಲಾ ಕ್ಷೇತ್ರಗಳಿಗೆ ಲಾಕ್ಡೌನ್ ಅನ್ವಯವಾದರೂ, ಕೃಷಿ ಕ್ಷೇತ್ರಕ್ಕೆ ಅನ್ವಯವಾಗಿರಲಿಲ್ಲ. ಇದನ್ನು ಸದುಪಯೋಗ ಪಡಿಸಿಕೊಂಡ ಉಪೇಂದ್ರ ಅವರು ತಮ್ಮ ತೋಟಕ್ಕೆ ಹೋಗಿ ಸಾವಯವ ಕೃಷಿಯಲ್ಲಿ ತೊಡಗಿಸಿಕೊಂಡಿದ್ದರು. ಕ್ರಿಮಿನಾಶಕ, ರಸಗೊಬ್ಬರ ಯಾವುದನ್ನೂ ಬಳಸದೆ ಸೌತೆಕಾಯಿ, ಬದನೆಕಾಯಿ, ಚೆಂಡು ಹೂ ಬೆಳೆದಿದ್ದಾರೆ. ಇದನ್ನು ನೈಸರ್ಗಿಕ ಕೃಷಿ ಎನ್ನುವ ಅವರು, ಕಡಿಮೆ ವೆಚ್ಚದಲ್ಲಿ ಬೆಳೆಯಬಹುದು ಎಂದು ಬೆಳೆದು ತೋರಿಸಿದ್ದಾರೆ.
