ಚಿಕ್ಕಂದಿನಿಂದಲೂ ನಾನು ಆಚರಿಸಿಕೊಂಡು ಬಂದ ಅಚ್ಚುಮೆಚ್ಚಿನ ಹಬ್ಬಗಳಲ್ಲಿ ಗೌರಿ-ಗಣೇಶ ಹಬ್ಬವೂ ಒಂದು. ಇದೀಗ ಕರೊನಾ ಹಿನ್ನೆಲೆಯಲ್ಲಿ ಅದ್ದೂರಿತನಕ್ಕೆ ಕೊಂಚ ಬ್ರೇಕ್ ಬಿದ್ದಿದೆ. ಮನೆಯಲ್ಲಿ ಮಾತ್ರ ಅದೇ ಸಂಭ್ರಮಾಚರಣೆ ಇರಲಿದೆ. ಗೌರಿಗಾಗಿಯೇ ವಿಶೇಷ ಪೂಜೆ, ಗೌರಿಗಾಗಿ ವಿಶೇಷ ನೈವೇದ್ಯ, ವಿಶೇಷ ಅಲಂಕಾರವನ್ನೂ ಮಾಡಲಾಗುತ್ತದೆ. ಆದರೆ, ಈ ಎಲ್ಲ ಆಚರಣೆ ನಮ್ಮ ಮನೆಯಲ್ಲಿ ಇರುವುದಿಲ್ಲ, ಬದಲಿಗೆ ನಮ್ಮ ಅಜ್ಜಿಯ ಮನೆಯಲ್ಲಿ ಈ ಹಬ್ಬವನ್ನು ಕುಟುಂಬದವರೆಲ್ಲ ಸೇರಿಕೊಂಡು ಆಚರಣೆ ಮಾಡುತ್ತೇವೆ. ಎಲ್ಲರೂ ಒಂದೆಡೆ ಕೂಡುವುದೇ ದೊಡ್ಡ ಸಂಭ್ರಮ. ಗರಿಕೆಗಳಿಂದಲೇ ಮಂಟಪ ಸಿದ್ಧಪಡಿಸಿ, ಹೂಗಳಿಂದ ಅಲಂಕಾರ ಮಾಡಿ ಗೌರಿಯನ್ನು ಪೂಜಿಸುತ್ತೇವೆ. ಮನೆಮಂದಿಯೆಲ್ಲ ಹೊಸ ಬಟ್ಟೆ ತೊಡುತ್ತೇವೆ. ಕರೊನಾ ಹಿನ್ನೆಲೆಯಲ್ಲಿ ವಿಡಿಯೋ ಕಾಲ್ ಮೂಲಕವೇ ಶುಭಾಶಯ ವಿನಿಮಯ ಮಾಡಿಕೊಳ್ಳುತ್ತೇವೆ.
