ಆರು ವರ್ಷದ ಬಳಿಕ ಮತ್ತೆ ವಾಪಸ್ಸಾದ ಶಾರುಖ್​ ಖಾನ್​ ಹೀರೋಯಿನ್​!

"ದಿಲ್​ ಸೇ' ಚಿತ್ರದ ಮೂಲಕ 1998ರಲ್ಲಿ ಬಾಲಿವುಡ್​ ಡೆಬ್ಯೂ ಮಾಡಿದ ನಟಿ ಪ್ರೀತಿ ಜಿಂಟಾ. ಬಳಿಕ "ಸೋಲ್ಜರ್​', "ಮಿಷನ್​ ಕಾಶ್ಮೀರ್​', "ಕ್ಯಾ ಕೆಹ್ನಾ', "ಕೋಯಿ ಮಿಲ್​ ಗಯಾ', "ವೀರ್​ ಜಾರಾ' ಸೇರಿ 35ಕ್ಕೂ ಅಧಿಕ ಸಿನಿಮಾಗಳಲ್ಲಿ ಮಿಂಚಿದ್ದಾರೆ. ಇಂತಹ ಪ್ರೀತಿ 2008ರಲ್ಲಿ ಐಪಿಎಲ್​ನ ಕಿಂಗ್ಸ್​ 11 ಪಂಜಾಬ್​ ತಂಡ ಖರೀದಿಸಿದ ಬಳಿಕ ಚಿತ್ರರಂಗದಲ್ಲಿ ಅಷ್ಟು ಬಿಜಿಯಾಗಿಲ್ಲ.

ಆಗೊಂದು ಈಗೊಂದು ಚಿತ್ರಗಳಲ್ಲಿ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದ ಅವರು, 2013ರಲ್ಲಿ "ಇಷ್ಕ್​ ಇನ್​ ಪ್ಯಾರಿಸ್​' ಮತ್ತು 2018ರಲ್ಲಿ "ಭಯ್ಯಾಜಿ ಸೂಪರ್​ಹಿಟ್​' ಚಿತ್ರಗಳಲ್ಲಷ್ಟೇ ನಾಯಕಿಯಾಗಿ ನಟಿಸಿದರು. ಅದರ ನಡುವೆ 2016ರಲ್ಲಿ ಅಮೆರಿಕ ಮೂಲದ ಜೀನ್​ ಗುಡೆನಾಫ್​ ಜತೆ ಮದುವೆಯಾದ ಪ್ರೀತಿ, ಚಿತ್ರರಂಗದಿಂದ ಮತ್ತಷ್ಟು ಅಂತರ ಕಾಪಾಡಿಕೊಂಡಿದ್ದರು. 2022ರಲ್ಲಿ ಮುದ್ದಾದ ಅವಳಿ ಮಕ್ಕಳಿಗೆ ಜನ್ಮ ನೀಡಿದ ಪ್ರೀತಿ, ಮತ್ತೆ ಬಾಲಿವುಡ್​ಗೆ ಬರುವುದಿಲ್ಲ ಎಂದೇ ಅವರ ಅಭಿಮಾನಿಗಳು ತೀರ್ಮಾನಿಸಿದ್ದರು.

ಆದರೆ, ಆರು ವರ್ಷಗಳ ಗ್ಯಾಪ್​ನ ಬಳಿಕ 49 ವರ್ಷದ ಪ್ರೀತಿ ಜಿಂಟಾ, ಮತ್ತೆ ಬಾಲಿವುಡ್​ಗೆ ಕಮ್​ಬ್ಯಾಕ್​ ಮಾಡಿದ್ದಾರೆ. ರಾಜಕುಮಾರ್​ ಸಂತೋಷಿ ನಿರ್ದೇಶಿಸುತ್ತಿರುವ "ಲಾಹೋರ್​ 1947' ಚಿತ್ರದ ಮೂಲಕ ಪ್ರೀತಿ ಚಿತ್ರರಂಗಕ್ಕೆ ವಾಪಸ್ಸಾಗಿದ್ದಾರೆ. ಸದ್ಯ "ಗದರ್​ 2' ಯಶಸ್ಸಿನ ಅಲೆಯಲ್ಲಿ ತೇಲುತ್ತಿರುವ ನಟ ಸನ್ನಿ ಡಿಯೋಲ್​ಗೆ ಪ್ರೀತಿ ಜೋಡಿಯಾಗಲಿದ್ದು, ಇತ್ತೀಚೆಗಷ್ಟೇ ಚಿತ್ರದ ಮುಹೂರ್ತ ನೆರವೇರಿದೆ.