ದೀಪ್ತಿ ಬದಲು ಮಿಷಾ: ಸಿನಿ ಲೆಗಸಿಗೆ ಮತ್ತೊಬ್ಬ ಬೆಡಗಿ

ಬೆಂಗಳೂರು: ಪರಭಾಷಾ ಚಿತ್ರರಂಗದಿಂದ ಕನ್ನಡ ಸಿನಿಮಾಲೋಕಕ್ಕೆ ನಟಿಯರನ್ನು ಕರೆತರುವ ಪರಂಪರೆ ಸ್ಯಾಂಡಲ್​ವುಡ್​ಗೆ ಹೊಸದೇನಲ್ಲ. ಈಗ ಅಂಥದ್ದೊಂದು ‘ಲೆಗಸಿ’ಗೆ ಪರಭಾಷಾ ನಟಿ ಮಿಷಾ ನಾರಂಗ್ ನಾಯಕಿ ಆಗಿದ್ದಾರೆ. ಅಂದರೆ ಎಂ. ಸುಭಾಷ್​ಚಂದ್ರ ಅವರ ಚೊಚ್ಚಲ ನಿರ್ದೇಶನದಲ್ಲಿ ನಟ ವಿಹಾನ್ ನಾಯಕರಾಗಿ ಅಭಿನಯಿಸುತ್ತಿರುವ ‘ಲೆಗಸಿ’ ಸಿನಿಮಾಗೆ ಮುಂಬೈ ಬೆಡಗಿ ಮಿಷಾ ನಾರಂಗ್ ನಾಯಕಿ ಆಗಿ ಆಯ್ಕೆ ಆಗಿದ್ದಾರೆ. ಆ ಮೂಲಕ ‘ಜಾಗ್ವಾರ್’ ಬೆಡಗಿ ದೀಪ್ತಿ ಸತಿ ಮಾಡಬೇಕಿದ್ದ ಪಾತ್ರ ಮಿಷಾ ಪಾಲಾಗಿದೆ. ಈ ಚಿತ್ರಕ್ಕೆ ದೀಪ್ತಿ ಸತಿಯನ್ನು ನಾಯಕಿ ಆಗಿಸುವ ಬಗ್ಗೆ ಚಿತ್ರತಂಡ ಈ ಹಿಂದೆ ಯೋಜನೆ ಹಾಕಿಕೊಂಡಿತ್ತು. ಆದರೆ ಡೇಟ್ಸ್ ಹೊಂದಾಣಿಕೆ ಆಗದ ಕಾರಣ ಈಗ ಸ್ಯಾಂಡಲ್​ವುಡ್​ಗೆ ಹೊಸ ಪ್ರತಿಭೆಯೊಬ್ಬರ ಪದಾರ್ಪಣೆ ಆಗಿದೆ.

‘ಮಿಷಾ ಮುಂಬೈನ ಮಾಡೆಲ್. ಈಗಾಗಲೇ ತೆಲುಗು ಸಿನಿಮಾವೊಂದಕ್ಕೆ ನಾಯಕಿ ಆಗಿರುವುದರಿಂದ ಅವರ ಬಗ್ಗೆ ತಿಳಿಯಿತು. ಜತೆಗೆ ತಮಿಳು ಚಿತ್ರವೊಂದಕ್ಕೂ ನಾಯಕಿ ಆಗಿ ಆಯ್ಕೆ ಆಗಿದ್ದಾರೆ. ನಮ್ಮ ಸಿನಿಮಾದ 2ನೇ ಶೆಡ್ಯೂಲ್​ನಲ್ಲಿ ಅವರು ತಂಡಕ್ಕೆ ಸೇರಿಕೊಳ್ಳಲಿದ್ದಾರೆ. ಮಾ. 9ರಿಂದ ಎರಡನೇ ಹಂತದ ಚಿತ್ರೀಕರಣ ಆರಂಭವಾಗಲಿದೆ. ಒಟ್ಟು 3 ಹಂತಗಳಲ್ಲಿ ಶೂಟಿಂಗ್ ನಡೆಯಲಿದ್ದು, ಏ.15ರಂದು ಚಿತ್ರೀಕರಣ ಮುಗಿಯಲಿದೆ. ಜುಲೈನಲ್ಲಿ ಸಿನಿಮಾ ಬಿಡುಗಡೆ ಮಾಡುವ ಗುರಿ ಇರಿಸಿಕೊಳ್ಳಲಾಗಿದೆ’ ಎಂಬ ಮಾಹಿತಿ ನೀಡಿದ್ದಾರೆ ನಿರ್ದೇಶಕ

ಸುಭಾಷ್​ಚಂದ್ರ. ‘ಇದು ಫ್ಯಾಮಿಲಿ ಸೆಂಟಿಮೆಂಟ್ ಇರುವ ಆಕ್ಷನ್-ಥ್ರಿಲ್ಲರ್ ಸಿನಿಮಾ. 1990ರಲ್ಲಿನ ಒಬ್ಬ ದೊಡ್ಡ ಲೇಖಕನಿಂದ ಶುರುವಾಗುವ ಕಥೆ ಬಳಿಕ ಅವನ ಮಗನ ಸುತ್ತ ಅಂದರೆ 2020ರವರೆಗೂ ಸಾಗಲಿದೆ. ಇದರಲ್ಲಿ ಮಿಷಾ ಕಾಲೇಜು ವಿದ್ಯಾರ್ಥಿನಿ ಹಾಗೂ ಸಿನಿಮಾ ಸ್ಕ್ರಿಪ್ಟ್ ರೈಟರ್ ಆಗಿ 2 ಶೇಡ್​ನಲ್ಲಿ ಕಾಣಿಸಲಿದ್ದಾರೆ. ಮತ್ತೊಂದೆಡೆ ನಾಯಕ ವಿಹಾನ್ 3 ಶೇಡ್​ಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ’ ಎನ್ನುತ್ತಾರೆ ನಿರ್ದೇಶಕರು.

ಸುಭಾಷ್ ಈ ಹಿಂದೆ ‘ಮುನಿರತ್ನ ಕುರುಕ್ಷೇತ್ರ’ ಸಿನಿಮಾಗೆ ಅಸೋಸಿಯೇಟ್ ಡೈರೆಕ್ಟರ್ ಆಗಿ ಕೆಲಸ ಮಾಡಿದ್ದರು. ಗೆಳೆಯರೊಂದಿಗೆ ಸೇರಿ ‘ಗ್ರೇಟ್ ಬ್ರೋಸ್ ಪಿಕ್ಚರ್ಸ್’ ಎಂಬ ಸಂಸ್ಥೆ ಸ್ಥಾಪಿಸಿರುವ ಅವರು ಅದೇ ಬ್ಯಾನರ್​ನಲ್ಲಿ ನಿರ್ವಪಕರಲ್ಲಿ ಒಬ್ಬರಾಗಿ ಈ ಚಿತ್ರ ನಿರ್ಮಾಣ ಮಾಡುತ್ತಿದ್ದಾರೆ. ಭಾನುವಾರ ಈ ಚಿತ್ರದಲ್ಲಿನ ವಿಹಾನ್ ಫಸ್ಟ್​ಲುಕ್ ಬಿಡುಗಡೆ ಆಗಿದ್ದು ಉತ್ತಮ ಪ್ರತಿಕ್ರಿಯೆ ಗಿಟ್ಟಿಸಿಕೊಳ್ಳುತ್ತಿದೆ. ವಿಹಾನ್ ಇದರಲ್ಲಿ ಪಿಸ್ತೂಲ್ ಹಿಡಿದು ಆಂಗ್ರಿ ಲುಕ್​ನಲ್ಲಿ ಕಾಣಿಸಿಕೊಂಡಿದ್ದಾರೆ. ಚೆನ್ನೈನ ಸುಂದರ್ ಪಾಂಡ್ಯನ್ ಛಾಯಾಗ್ರಹಣ, ‘ಬಾಹುಬಲಿ’ ಸಿನಿಮಾಗೆ ಕೆಲಸ ಮಾಡಿದ್ದ ಶಿವಪ್ರೇಮ್ ಅವರ ಸಾಹಸ ಸಂಯೋಜನೆ ಈ ಸಿನಿಮಾಗಿದೆ.