ಶರಣ್ ಹೊಸ ಅವತಾರ: ಪಾತ್ರವೂ ಹೊಸದು, ಬಜೆಟ್ ಸಹ ದೊಡ್ಡದು..

ಬೆಂಗಳೂರು: ‘ಮತ್ತೆ ಹೊಸದಾಗಿ ಬರುತ್ತಿದ್ದೇನೆ. ಮೊದಲ ಸಿನಿಮಾ ಬಿಡುಗಡೆ ಆಗುತ್ತಿದೆಯೆನೋ ಎಂಬ ಭಾವ ನನ್ನನ್ನು ಕಾಡುತ್ತಿದೆ. ಕಳೆದ ಎರಡು ವರ್ಷಗಳಿಂದ ಸಿನಿಮಾ ಕ್ಷೇತ್ರವೇ ಬಂದ್ ಆಗಿತ್ತು. ಹಾಗಾಗಿ, ಹೊಸಬನ ಥರ ಎಂಟ್ರಿ ಆಗುತ್ತಿದ್ದೇನೆ ಎಂದೆನಿಸುತ್ತಿದೆ’- ಹೀಗೆ ಎರಡು ವರ್ಷದ ಬಳಿಕ ಮೊದಲ ಪತ್ರಿಕಾಗೋಷ್ಠಿಯಲ್ಲಿ ನಿರರ್ಗಳವಾಗಿ ಮಾತನಾಡಿದರು ನಟ ಶರಣ್.

ಅವರ ಈ ಆಗಮನಕ್ಕೆ ಕಾರಣ ‘ಅವತಾರ ಪುರುಷ’. ಡಿ. 10ಕ್ಕೆ ಈ ಸಿನಿಮಾ ಬಿಡುಗಡೆ ಆಗುತ್ತಿದೆ. ಸಿಂಪಲ್ ಸುನಿ, ಪುಷ್ಕರ್ ಮಲ್ಲಿಕಾರ್ಜುನಯ್ಯ ಮತ್ತು ಶರಣ್ ಕಾಂಬಿನೇಷನ್​ನ ಮೊದಲ ಸಿನಿಮಾ ಇದು. ಪೋಸ್ಟರ್, ಟೀಸರ್ ಮೂಲಕವೇ ಈಗಾಗಲೇ ಗಮನ ಸೆಳೆದಿದ್ದ ‘ಅವತಾರ ಪುರುಷ’ ಚಿತ್ರ, ಇನ್ನೇನು ಕೆಲವೇ ದಿನಗಳಲ್ಲಿ ತನ್ನ ಹತ್ತು ಹಲವು ಅವತಾರವನ್ನು ಪ್ರೇಕ್ಷಕರಿಗೆ ತೋರಿಸಲಿದೆ.

ನನಗಿಲ್ಲಿ ಎಲ್ಲವೂ ಹೊಸತೇ: ‘ಸುನಿ ನಿರ್ದೇಶನದಲ್ಲಿ ನನ್ನದು ಮೊದಲ ಸಿನಿಮಾ. ಪುಷ್ಕರ್ ಅವರ ಬ್ಯಾನರ್​ನಲ್ಲಿಯೂ ಮೊದಲ ಸಿನಿಮಾ. ಈ ತರಹದ ಚಿತ್ರವೂ ನನಗೆ ಹೊಸದು. ನನ್ನ ವೃತ್ತಿ ಜೀವನದಲ್ಲಿಯೂ ದೊಡ್ಡ ಬಜೆಟ್​ನ ಚಿತ್ರವೂ ಇದೇ ಆಗಿದೆ. ಈ ಚಿತ್ರದಲ್ಲಿ ನನಗೆ ಸಿಕ್ಕ ಹತ್ತು ಹಲವು ಪಾತ್ರವೂ ಇದೇ ಮೊದಲು. ಹೀಗೆ ಹಲವು ಹೊಸತುಗಳಿಗೆ ‘ಅವತಾರ ಪುರುಷ’ ಸಾಕ್ಷಿಯಾಗಿದೆ. ನನ್ನೊಳಗಿನ ನಟನನ್ನು ಈ ಚಿತ್ರ ಮತ್ತಷ್ಟು ಸಾಣೆ ಹಿಡಿಸಿದೆ’ ಎಂಬುದು ಶರಣ್ ಮಾತು. ಅರ್ಜುನ್ ಜನ್ಯ ಸಂಗೀತ ಸಂಯೋಜಿಸಿರುವ ಈ ಚಿತ್ರಕ್ಕೆ ವಿಲಿಯಮ್ ಡೇವಿಡ್ ಛಾಯಾಗ್ರಹಣ ಮಾಡಿದ್ದಾರೆ.

101 ದಿನಕ್ಕೆ ಭಾಗ-2: ‘ಅವತಾರ ಪುರುಷ’ ಚಿತ್ರ ಎರಡು ಭಾಗಗಳಲ್ಲಿ ಮೂಡಿಬಂದಿದೆ. ಮೊದಲ ಭಾಗ ಡಿ. 10ಕ್ಕೆ ಬಂದರೆ, ಎರಡನೇ ಭಾಗದ ಬಿಡುಗಡೆ ಯಾವಾಗ? ಈ ಪ್ರಶ್ನೆಗೂ ಉತ್ತರ ಲಭ್ಯವಾಗಿದೆ. ಮೊದಲ ಚಿತ್ರ ಬಿಡುಗಡೆಯಾಗಿ 101ನೇ ದಿನಕ್ಕೆ 2ನೇ ಭಾಗ ತೆರೆಗೆ ಬರಲಿದೆ ಎಂದು ನಿರ್ವಪಕ ಪುಷ್ಕರ್ ತಿಳಿಸಿದ್ದಾರೆ.

https://www.vijayavani.net/daughter-gave-supari-to-lover-for-killing-her-father/

https://www.vijayavani.net/wife-died-at-bathroom-parents-having-doubt-about-death/