ಕರೊನಾದಿಂದ ಇಡೀ ದೇಶವೇ ಲಾಕ್ಡೌನ್ ಆಗಿದ್ದ ಕಾಲ. ಇಂತಹ ಸಂದರ್ಭದಲ್ಲಿ ಕೆಲಸ ಕಳೆದುಕೊಂಡ ನಾಲ್ವರು, ಜೀವನ ನಡೆಸುವುದಕ್ಕೆ ದರೋಡೆಗೆ ಇಳಿಯುತ್ತಾರೆ. ಒಂಟಿಯಾಗಿ ಓಡಾಡುತ್ತಿರುವವರ ಮೊಬೈಲ್, ಪರ್ಸ್ ಕದ್ದು ಅದರಿಂದ ಜೀವನ ಮಾಡುತ್ತಿರುತ್ತಾರೆ. ಇನ್ನೆಷ್ಟು ದಿನ ಇದೇ ರೀತಿ ಬದುಕುವುದು? ಈ ಪ್ರಶ್ನೆ ಬಂದಾಗ ಅವರೊಂದು ಸ್ಕೆಚ್ ಹಾಕುತ್ತಾರೆ. ಒಬ್ಬ ಗಣಿಧಣಿಯ ಮಗಳನ್ನು ಕಿಡ್ನಾಪ್ ಮಾಡಿ, 10 ಕೋಟಿ ರೂ ಬೇಡಿಕೆ ಇಟ್ಟು, ಅದರಿಂದ ಬರುವ ಹಣವನ್ನು ಹಂಚಿಕೊಂಡು ನೆಮ್ಮದಿಯಾಗಿ ಜೀವನ ಮಾಡುವುದಕ್ಕೆ ತೀರ್ವನಿಸುತ್ತಾರೆ. ಮಾಸ್ಟರ್ ಪ್ಲಾನ್ ಹಾಕಿ, ಆ ಹುಡುಗಿಯನ್ನು ಕಿಡ್ನಾಪ್ ಸಹ ಮಾಡುತ್ತಾರೆ. ನಿಗೂಢವಾದ ಸ್ಥಳದಲ್ಲಿ ಅವಳನ್ನೂ ಬಚ್ಚಿಟ್ಟು, ಅವರೂ ಭೂಗತರಾಗುತ್ತಾರೆ. ಅಲ್ಲಿಂದ ಅವರಿಗೆ ಚಿತ್ರವಿಚಿತ್ರ ಅನುಭವಗಳಾಗುವುದಕ್ಕೆ ಶುರುವಾಗುತ್ತದೆ. ಇಷ್ಟಕ್ಕೂ ಕಿಡ್ನಾಪ್ ಆದ ಯುವತಿ ಯಾರು?
