1983ರಲ್ಲಿ ಭಾರತ ಮೊದಲ ಸಲ ವಿಶ್ವಕಪ್ ಕಪ್ ಎತ್ತಿ ಹಿಡಿದಿತ್ತು. ಆ ಗೆಲುವಿನ ಹಿಂದಿನ ಕಾಣದ ಕಥೆ ಸಿನಿಮಾ ರೂಪದಲ್ಲಿ ತೆರೆಗೆ ಬರಲಿದೆ ಎಂದಾಗಲೇ ಎಲ್ಲರಿಗೂ ಅಚ್ಚರಿ ಜತೆಗೆ ಕುತೂಹಲವಿತ್ತು. ರಣವೀರ್ ಸಿಂಗ್ ನಟನೆಯ ‘83’ ಚಿತ್ರದ ಟ್ರೇಲರ್ ಬಿಡುಗಡೆಯಾದಾಗ ಮೆಚ್ಚಿ ಕೊಂಡಾಡಿದವರೇ ಹೆಚ್ಚು. ಆದರೆ, ಸಿನಿಮಾ ಬಿಡುಗಡೆ ಆದ ಮೇಲೆ ಗಳಿಕೆಯಲ್ಲಿ ಸೋತು, ದಶಕದ ಫ್ಲಾಪ್ ಸಿನಿಮಾಗಳ ಪಟ್ಟಿಗೆ ಸೇರಿದೆ ಎಂದರೆ ನೀವು ನಂಬಲೇಬೇಕು! ಕಬೀರ್ ಖಾನ್ ನಿರ್ದೇಶನದಲ್ಲಿ ಮೂಡಿಬಂದಿರುವ ‘83’ ಚಿತ್ರಕ್ಕೆ ದೀಪಿಕಾ ಪಡುಕೋಣೆ ಸೇರಿ ಹಲವರು ಜಂಟಿಯಾಗಿ ಹೂಡಿಕೆ ಮಾಡಿದ್ದರು. ಒಟ್ಟು 260 ಕೋಟಿ ರೂ. ವೆಚ್ಚದಲ್ಲಿ ಸಿದ್ಧವಾಗಿದ್ದ ಈ ಸಿನಿಮಾ, ಡಿ. 24ರಂದು ವಿಶ್ವದಾದ್ಯಂತ ತೆರೆಕಂಡಿತ್ತು. ಅಲ್ಲಿಂದ ಇಲ್ಲಿಯವರೆಗೂ 100 ಕೋಟಿ ಗಳಿಸಲಷ್ಟೇ ಈ ಚಿತ್ರ ಶಕ್ತವಾಗಿದೆ. ಒಟಿಟಿ ಮತ್ತು ಸ್ಯಾಟಲೈಟ್ ಸೇರಿ ಹಲವು ಹಕ್ಕುಗಳಿಂದ 80 ಕೋಟಿ ಬಂದಿದೆಯಾದರೂ, ಬರೋಬ್ಬರಿ 70 ಕೋಟಿ ಕಳೆದುಕೊಂಡು ಗಳಿಕೆಯಲ್ಲಿ ಫ್ಲಾಪ್ ಆಗಿದೆ. ಬಿಡುಗಡೆಗೂ ಮುನ್ನ ಸಿನಿಮಾ ಮಂದಿಯ ಜತೆಗೆ ದಿಗ್ಗಜ ಮಾಜಿ ಕ್ರಿಕೆಟ್ ದಂತಕತೆಗಳೇ ಪ್ರಚಾರ ಕಣಕ್ಕೆ ಧುಮುಕಿದರೂ, ಚಿತ್ರ ಗಳಿಕೆ ವಿಚಾರದಲ್ಲಿ ಮೋಡಿ ಮಾಡಲೇ ಇಲ್ಲ. -ಏಜೆನ್ಸೀಸ್
