ಹೀಗೆ ರೋಚಕವಾಗಿ ಶುರುವಾಗುತ್ತದೆ ಧನಂಜಯ್ ಅಭಿನಯದ ‘21 ಅವರ್ಸ್’. ಹೀಗೆ ಶುರುವಾಗುವ ಚಿತ್ರವು, ಕ್ರಮೇಣ ಆ ಹುಡುಗಿ ಯಾರು, ಆಕೆಯ ಕಥೆಯೇನು, ಕಳೆದು ಹೋಗುವ ಮುನ್ನ ಏನೆಲ್ಲಾ ಆಗಿತ್ತು ಎಂಬ ವಿಷಯಗಳು ಬೇರೆಯವರ ಮೂಲಕ ತೆರೆದುಕೊಳ್ಳುತ್ತಾ ಹೋಗುತ್ತದೆ. ಆಕೆ ನಾಪತ್ತೆಯಾಗಿರುವುದರ ಹಿಂದೆ ಆಕೆಯ ಪತಿ, ಬಾಯ್ಫ್ರೆಂಡ್, ಮಲತಂದೆ ಅಥವಾ ಬೇರೆಯವರ ಕೈವಾಡ ಇರಬಹುದಾ ಎಂಬ ಸಂಶಯ ಬರುವಂತೆ ತೋರಿಸಲಾಗುತ್ತದೆ. ಆದರೆ, ನಿಜಕ್ಕೂ ಆಕೆಯ ಕಣ್ಮರೆಯ ಹಿಂದೆ ಯಾರ ಕೈವಾಡವಿದೆ? ಎಂದು ಗೊತ್ತಾಗಬೇಕಿದ್ದರೆ ಚಿತ್ರ ನೋಡಬೇಕು. ಕಥೆ ಕೇಳುವುದಕ್ಕೇನೋ ಚೆನ್ನಾಗಿದೆ. ಆದರೆ, ನಿಜಕ್ಕೂ ಅದೇ ಕುತೂಹಲ ಕಾಯ್ದುಕೊಂಡು, ಅಷ್ಟೇ ರೋಚಕವಾಗಿ ಮುಗಿ ಯುತ್ತದೆ ಎಂದು ಹೇಳುವುದು ಕಷ್ಟ. ಮೊದಲಾರ್ಧ ಕುತೂಹಲ ಉಳಿಸಿಕೊಳ್ಳುವ ಚಿತ್ರವು, ಕ್ರಮೇಣ ಸಡಿಲವಾಗುತ್ತಾ ಹೋಗುತ್ತದೆ. ಕೊನೆಗೆ, ಇಷ್ಟೇನಾ ಎನ್ನುವಂತೆ ಮುಗಿಯುತ್ತದೆ.
