ಬದುಕಿದರೆ ಸಾಕು ಎಂಬ ಮನೋಭಾವ ಘನವಾಗುತ್ತ ಹೋಗುತ್ತದೆ. ಬದುಕುಳಿದರೆ ತಾನೇ ಸೌಕರ್ಯಗಳು, ಸುಖ, ಸಂತೋಷ, ನೆಮ್ಮದಿಯ ಮಾರ್ಗಗಳು ಬೇಕಾಗುವುದು. ಇಂದು ನಾವು ಇದೇ ಕಾಲಘಟ್ಟದಲ್ಲಿದ್ದೇವೆ. ಹಾಗಿದ್ದರೆ ರೋಗದಿಂದ ದೂರವಿರಲು ದಾರಿ ಯಾವುದೆಂಬ ಚಿಂತನೆಯ ಸಂದರ್ಭದಲ್ಲಿ ರೋಗನಿರೋಧಕ ಶಕ್ತಿ ಹೆಚ್ಚಿಸುವ ಹೆಸರುಗಳಲ್ಲಿ ನೆನಪಾಗುವುದು ಆಯುರ್ವೇದದ ಚ್ಯವನಪ್ರಾಶ ಲೇಹ್ಯ. ಇದರ ಹಿಂದಿನ ಕಥೆ ಸ್ವಾರಸ್ಯಕರವಾಗಿದೆ. ಚ್ಯವನಪ್ರಾಶ ಎಂಬುದು ಆಯುರ್ವೇದ ಗ್ರಂಥಗಳಲ್ಲಿ ವಿವರಿಸಲ್ಪಟ್ಟ ಅನೇಕ ಲೇಹ್ಯಗಳಲ್ಲಿ ರುಚಿಕರ ಹಾಗೂ ಪ್ರಖ್ಯಾತ ಔಷಧ. ಲೇಹ್ಯವೆಂದರೆ ನೆಕ್ಕಿ ತಿನ್ನುವಂಥದ್ದು ಎಂದರ್ಥ. ನೆಲ್ಲಿಕಾಯಿಯೇ ಪ್ರಮುಖ ಘಟಕವಾಗಿರುವುದರಿಂದ ಶರೀರದ ಜೀವಕೋಶಗಳನ್ನು ನವೀಕರಣಗೊಳಿಸಿ ಬಲ ತುಂಬುವ ಪ್ರಬಲ ರಸಾಯನವಾಗಿ ಪರಿಗಣಿತವಾಗಿದೆ. ರೋಗನಿರೋಧಕ ಶಕ್ತಿ ಹೆಚ್ಚಿಸಲು ವಿಟಮಿನ್ ಸಿ ಸೇವಿಸಿ ಎನ್ನುವುದಕ್ಕಿಂತ ಸಾವಿರಾರು ವರ್ಷ ಮೊದಲೇ ಇಂಥ ಜ್ಞಾನವನ್ನೊದಗಿಸಿದ ಕೀರ್ತಿ ಆಯುರ್ವೆದದ್ದು.
