ದೆಹಲಿಯಲ್ಲಿ ಏರಿಕೆಯಾದ ಬಸಿಲಿನ ತಾಪ: ಸ್ಕೂಟರ್ ಮೇಲೆ ಐಸ್​ಬ್ಲಾಕ್​ ಇಟ್ಟುಕೊಂಡು ಸವಾರಿ; ವಿಡಿಯೋ ವೈರಲ್​! Viral Video

ನವದೆಹಲಿ:  ಭಾರತದಲ್ಲಿ ದಿನ ಕಳೆದಂತೆ ಬೀಸಿಲಿನ ತಾಪ ಏರುತ್ತಲೇ ಹೋಗುತ್ತಿದೆ. ಎನ್​-ನಿನೋ ಪರಿಣಾಮದಿಂದಾಗಿ ಏಷ್ಯಾ ಖಂಡದಲ್ಲಿ ಉಷ್ಣಾಂಶ ಏರಿಕೆ ಕಾಣುತ್ತಿದೆ ಎನ್ನುವುದು ವಿಜ್ಞಾನಿಗಳ ವಾದವಾಗಿದೆ. ಕೆಲ ದಿನಗಳ ಹಿಂದೆ ವಿಶ್ವದ ಅತ್ಯಂತ ಉಷ್ಣಾಂಶ ಹೊಂದಿರುವ ನೂರು ನಗರಗಳ ಪಟ್ಟಿಯಲ್ಲಿ ಭಾರತದ ಸುಮಾರು 95 ನಗರಗಳಿರುವುದು ಆತಂಕದ ಸಂಗತಿಯಾಗಿದೆ.

ಈ ಬಿಸಿಲನ್ನು ಹೇಗೆ ಎದುರಿಸುವುದು? ಈ ಬಿಸಿನಲ್ಲಿ ಹೇಗಪ್ಪಾ ಕೆಲಸಕ್ಕೆ ಹೋಗುವುದು ಎಂದು ಜನ ಯೋಚಿಸುತ್ತಿದ್ದರೆ, ಇಲ್ಲೊಬ್ಬ ಹುಡುಗ ಐಸ್​ಬ್ಲಾಕ್​ಗಳನ್ನು ತನ್ನ ಸ್ಕೂಟಿ ಮೇಲೆ ಇಟ್ಟುಕೊಂಡು ಚಲಾಯಿಸುತ್ತಿರುವ ವಿಡಿಯೋ ಸೋಷಿಯಲ್​ ಮೀಡಿಯಾನಲ್ಲಿ ಸಖತ್​ ವೈರಲ್ (Viral Video)​ ಆಗುತ್ತಿದೆ.

ದೆಹಲಿಯಲ್ಲಿ ಸೆರೆಹಿಡಿಯಲಾಗಿದೆ ಎಂದು ಹೇಳಲಾಗುತ್ತಿರುವ ಈ ವೈರಲ್​ ವಿಡಿಯೋನಲ್ಲಿ ಸುಮಾರು 18-20 ವರ್ಷದ ಹುಡುಗನೊಬ್ಬ ತಮ್ಮ ಕಪ್ಪು ಬಣ್ಣದ ಸ್ಕೂಟಿಯಲ್ಲಿ ಸುಮಾರು 4-5 ದೊಡ್ಡ ಐಸ್​ಬ್ಲಾಕ್​ಗಳನ್ನು ಇಟ್ಟುಕೊಂಡು ವಾಹನವನ್ನು ಚಲಾಯಿಸಿದ್ದಾನೆ.

ಆದರೆ ಐಸ್​ಬ್ಲಾಕ್​ಗಳ ಗಾತ್ರ ದೊಡ್ಡದಿದ್ದ ಕಾರಣ ಹುಡುಗನಿಗೆ ಕುಳಿತುಕೊಳ್ಳಲು ಸೀಟ್​ ಇಲ್ಲದೆ ಅರ್ಧ ಸೀಟ್​ನಲ್ಲಿ ಕುಳಿತು, ಹೆಲ್ಮೆಟ್​ ಧರಿಸದೆ ವಾಹನ ಚಲಾಯಿಸಿರುವುದು ಜನರ ಆಕ್ರೋಶಕ್ಕೆ ಕಾರಣವಾಗಿದೆ. 

ಈ ವಿಡಿಯೋ ಸೋಷಿಯಲ್​ ಮೀಡಿಯಾನಲ್ಲಿ ವೈರಲ್​ ಆಗುತ್ತಿದ್ದಂತೆ ನೆಟ್ಟಿಗರು ಕಮೆಂಟ್ ಬಾಕ್ಸ್​ನ್ನು ತುಂಬಿಸುವ ಕೆಲಸಕ್ಕೆ ಇಳಿದಿದ್ದಾರೆ. ಈ ವಿಡಿಯೋ ನೋಡಲು ಮಜವಾಗಿದೆ ಎನ್ನಿಸಿದರೂ ತುಂಬಾ ಅಪಾಯಕಾರಿ ಎಂದು ಒಬ್ಬ ಬಳಕೆದಾರರು ಕಮೆಂಟ್​ ಮಾಡಿದ್ದಾರೆ.

ನನಗ್ಯಾಕೋ ಈ ಹುಡುಗ 18 ವರ್ಷ ಮೇಲ್ಪಟ್ಟಿದ್ದಾನೆ ಅನ್ನಿಸುತ್ತಿಲ್ಲ, ಪೊಲೀಸ್​ ವಿಚಾರಣೆ ನಡೆಸುವುದು ಉತ್ತಮ ಎಂದು ಇನ್ನೊಬ್ಬರು ಅನುಮಾನ ವ್ಯಕ್ತ ಪಡಿಸಿದ್ದಾರೆ. ದೆಹಲಿಯ ಸೆಖೆಯನ್ನು ಮೀರಿಸಲು ಹುಡುಗ ಮಾಡಿರುವುದರಲ್ಲಿ ತಪ್ಪೇನಿಲ್ಲ ಬಿಡಿ ಎಂದು ಮತ್ತೊಬ್ಬರು ಹುಡುಗನ ಕೆಲಸಕ್ಕೆ ಸಮರ್ಥನೆ ನೀಡಿದ್ದಾರೆ,(ಏಜನ್ಸೀಸ್​).