ಸಂಜು ಸಿಡಿಲಬ್ಬರದ ಬ್ಯಾಟಿಂಗ್​ಗೆ ಕ್ರಿಕೆಟ್​ ದಂತಕತೆ ಸಚಿನ್​ ನೀಡಿದ ಆ ಒಂದು ಟಿಪ್ಸೇ ಕಾರಣ: ಏನದು? Sanju Samson

ಅಹಮದಾಬಾದ್: ಭಾರತ ಮತ್ತು ಶ್ರೀಲಂಕಾ ಜಂಟಿಯಾಗಿ ಆಯೋಜನೆ ಮಾಡಿದ ಟಿ20 ವಿಶ್ವಕಪ್​-2026ರ ಟೂರ್ನಿಯಲ್ಲಿ ಭಾರತವೇ ಟ್ರೋಫಿ ಗೆದ್ದಿದೆ. ನಿನ್ನೆ (ಮಾರ್ಚ್​ 08) ನ್ಯೂಜಿಲೆಂಡ್​ ವಿರುದ್ಧ ನಡೆದ ಫೈನಲ್​ ಪಂದ್ಯದಲ್ಲಿ ಅಬ್ಬರಿಸಿ ಬೊಬ್ಬರಿದ ಭಾರತ, ವಿಜಯ ಪತಾಕೆ ಹಾರಿಸುವ ಮೂಲಕ ಮೂರನೇ ಬಾರಿಗೆ ಟಿ20 ವಿಶ್ವಕಪ್​ ಎತ್ತಿಹಿಡಿಯಿತು. ಈ ಟೂರ್ನಿಯಲ್ಲಿ ಭಾರತದ ಪಾಲಿಗೆ ಆಪತ್ಭಾಂದವನಾದ ಸಂಜು ಸ್ಯಾಮ್ಸನ್ ( Sanju Samson ), ಪಂದ್ಯಾವಳಿಯ ಅತ್ಯುತ್ತಮ ಆಟಗಾರ ಪ್ರಶಸ್ತಿಗೆ ಭಾಜನರಾದರು.

ವಿಶ್ವಕಪ್ ಆರಂಭದಲ್ಲಿ ಆಡುವ ಹನ್ನೊಂದರ ಬಳಗದಲ್ಲಿ ಅವಕಾಶ ಸಿಗದೇ ತುಂಬಾ ಚಿಂತೆಯಲ್ಲಿ ಮುಳುಗಿದ್ದ ಸಂಜು, ಅಂತಿಮವಾಗಿ ಸಿಕ್ಕ ಅವಕಾಶವನ್ನು ಸದುಪಯೋಗಪಡಿಸಿಕೊಂಡು ಸರಣಿ ಶ್ರೇಷ್ಠ ಪ್ರಶಸ್ತಿ ಪಡೆದರು. ಅಚ್ಚರಿಯ ಸಂಗತಿ ಏನೆಂದರೆ, ವಿಶ್ವಕಪ್‌ಗೂ ಮೊದಲು ನ್ಯೂಜಿಲೆಂಡ್ ವಿರುದ್ಧ ನಡೆದ ಟಿ20 ಸರಣಿಯ ಎಲ್ಲಾ ಐದು ಪಂದ್ಯಗಳಲ್ಲಿಯೂ ಸಂಜುಗೆ ಅವಕಾಶ ಸಿಕ್ಕಿತು. ಆದರೆ, ಬ್ಯಾಟಿಂಗ್​ನಲ್ಲಿ ಸತತ ವೈಫಲ್ಯ ಅನುಭವಿಸಿದ ಸಂಜು, ಐದು ಪಂದ್ಯಗಳಿಂದ ಕೇವಲ 46 ರನ್ ಗಳಿಸುವಲ್ಲಿ ಮಾತ್ರ ಯಶಸ್ವಿಯಾದರು. ಹೀಗಾಗಿ, ಅವರನ್ನು ಟಿ20 ವಿಶ್ವಕಪ್​ನಲ್ಲಿ ಆರಂಭಿಕ ಪಂದ್ಯಗಳಲ್ಲಿ ಅವಕಾಶ ನೀಡಲಿಲ್ಲ.

ಆದರೆ, ಟಿ20 ವಿಶ್ವಕಪ್​ ಮಧ್ಯದಲ್ಲಿ ಟೀಮ್​ ಇಂಡಿಯಾದ 11ರ ಬಳಗದಲ್ಲಿ ಸೇರಿಕೊಂಡ ಸಂಜು, ಯಶಸ್ಸಿನ ಅಲೆಯಲ್ಲೇ ತೇಲಿದರು. ವೆಸ್ಟ್​ ಇಂಡೀಸ್ ವಿರುದ್ಧ ನಡೆದ​ ಸೂಪರ್​ 8ರ ನಿರ್ಣಾಯಕ ಪಂದ್ಯದಲ್ಲಿ ಕೊನೆಯವರೆಗೂ ಕ್ರೀಸ್​ನಲ್ಲಿ ಗಟ್ಟಿಯಾಗಿ ನಿಂತು, ಅಜೇಯ 97 ರನ್​ ಗಳಿಸುವ ಮೂಲಕ ಟೀಮ್​ ಇಂಡಿಯಾ ಸೆಮಿಫೈನಲ್​ಗೆ ಬರಲು ಕಾರಣರಾದರು. ಇದಾದ ಬಳಿಕ ಇಂಗ್ಲೆಂಡ್​ ವಿರುದ್ಧ ನಡೆದ ಸೆಮಿಫೈನಲ್​ ಪಂದ್ಯದಲ್ಲೂ ಅಬ್ಬರಿಸಿ ಬೊಬ್ಬರಿದ ಸಂಜು, 89 ರನ್​ ಗಳಿಸಿ, ಟೀಮ್​ ಇಂಡಿಯಾ ಬೃಹತ್​ ರನ್​ ಪೇರಿಸುವಲ್ಲಿ ಅಡಿಪಾಯ ಹಾಕಿದರು. ಬಳಿಕ ನಿನ್ನೆ ನಡೆದ ಫೈನಲ್​ ಪಂದ್ಯದಲ್ಲೂ ಕೇವಲ 46 ಎಸೆತಗಳಲ್ಲಿ 5 ಬೌಂಡರಿ ಮತ್ತು 8 ಸಿಕ್ಸರ್​ ನೆರವಿನಿಂದ 89 ರನ್​ ಗಳಿಸಿ, ಟೀಮ್​ ಇಂಡಿಯಾ ಬೃಹತ್​ ಮೊತ್ತ ಕಲೆಹಾಕುವಲ್ಲಿ ನೆರವಾದರು.

ಒಂದು ಹಂತದಲ್ಲಿ ತಂಡಕ್ಕೆ ಬೇಡವಾಗಿದ್ದ ಸಂಜು, ಇದೀಗ ಬ್ಯಾಕ್​ ಟು ಬ್ಯಾಕ್​ ಒಳ್ಳೆಯ ಇನ್ನಿಂಗ್ಸ್​ ಆಡಿದ್ದಕ್ಕೆ ಕಾರಣ ಏನು ಅನ್ನೋದನ್ನು ತಿಳಿಸಿದ್ದಾರೆ. ಫೈನಲ್​ ಪಂದ್ಯದ ಬಳಿಕ ಮಾತನಾಡಿದ ಸಂಜು, ನ್ಯೂಜಿಲೆಂಡ್ ವಿರುದ್ಧದ ಸರಣಿಯಲ್ಲಿ ಕಳಪೆ ಪ್ರದರ್ಶನದ ನಂತರ ನಾನು ಮಾನಸಿಕವಾಗಿ ಕುಸಿದುಬಿದ್ದೆ ಮತ್ತು ನನ್ನ ಕನಸುಗಳು ನನಸಾಗುವುದಿಲ್ಲ ಎಂದು ಭಾವಿಸಿದ್ದೆ. ಆ ಸಮಯದಲ್ಲಿ ನನಗೆ ಏನು ಮಾಡಬೇಕೆಂದು ತೋಚಲೇ ಇಲ್ಲ. ಅದೇ ಸಂದೇಹದೊಂದಿಗೆ ನಾನು ಸಚಿನ್ ತೆಂಡೂಲ್ಕರ್ ಅವರನ್ನು ಸಂಪರ್ಕಿಸಿದೆ ಎಂದು ಹೇಳಿದರು.

ಸಚಿನ ಅವರಂತಹ ದಿಗ್ಗಜ ವ್ಯಕ್ತಿಯನ್ನು ಸಂಪರ್ಕಿಸಿ ಸಲಹೆ ಪಡೆಯುವುದಕ್ಕಿಂತ ದೊಡ್ಡದು ಇನ್ನೇನು ಸಾಧ್ಯ? ಎಂದ ಸಂಜು, ನಾನು ಅವರೊಂದಿಗೆ ದೀರ್ಘಕಾಲದವರೆಗೆ ಮಾತುಕತೆ ನಡೆಸಿದೆ. ಅವರು ನೀಡಿದ ಸಲಹೆಗಳು ಮುಖ್ಯವಾಗಿ ಮಾನಸಿಕ ಸ್ಪಷ್ಟತೆ, ಆಟದ ಸಿದ್ಧತೆ, ಆಟದ ಮೇಲಿನ ಜಾಗೃತಿ ಮತ್ತು ಆಟದ ಮೇಲಿನ ತಿಳುವಳಿಕೆ ಕುರಿತಾಗಿದ್ದವು. ಈ ಒಂದು ಮಾರ್ಗದರ್ಶನವೇ ನನಗೆ ಮರಳಿ ನನ್ನ ಫಾರ್ಮ್​ ಕಂಡುಕೊಳ್ಳಲು ಸಹಾಯವಾಯಿತು ಎಂದರು.

ಅಲ್ಲದೆ, ತನ್ನನ್ನು ಬೆಂಬಲಿಸಿದ ಎಲ್ಲರಿಗೂ ಸಂಜು ಧನ್ಯವಾದ ಅರ್ಪಿಸಿದರು ಮತ್ತು ಈಗ ತನಗೆ ಸಿಕ್ಕಿರುವುದು ಒಂದು ದೊಡ್ಡ ಪ್ರಶಸ್ತಿಯಾಗಿದ್ದು, ಈ ಸಂಭ್ರಮಾಚರಣೆಯ ನಂತರ ತಮ್ಮ ಭವಿಷ್ಯದ ಯೋಜನೆಗಳನ್ನು ನಿರ್ಧರಿಸುವುದಾಗಿ ಸಂಜು ಹೇಳಿದರು, (ಏಜೆನ್ಸೀಸ್​).