ಮಮತಾರ ಭವಾನಿಪುರ ಕೋಟೆಗೆ ಲಗ್ಗೆ ಇಡ್ತಾರಾ ಸುವೇಂದು! ಬಂಗಾಳದ ಬಲಿಷ್ಠ ಕೋಟೆಯಲ್ಲಿ ಬಿರುಕು: ದೀದಿ ಮಗ್ಗಲು ಮುಳ್ಳಾದರೇ ಹಳೇ ಶಿಷ್ಯ..? Bhabanipur Election

ಈ ಬಾರಿಯ ಕಣ ರಂಗೇರಲು ಮುಖ್ಯ ಕಾರಣ ಸುವೇಂದು ಅಧಿಕಾರಿ. ಒಂದು ಕಾಲದಲ್ಲಿ ಮಮತಾ ಅವರ ಬಲಗೈ ಬಂಟನಾಗಿದ್ದ ಸುವೇಂದು, ಈಗ ಬಂಗಾಳದ ವಿರೋಧ ಪಕ್ಷದ ನಾಯಕರಾಗಿ ಮಮತಾ ಅವರಿಗೆ ಅವರದ್ದೇ ನೆಲದಲ್ಲಿ ಸವಾಲು ಹಾಕುತ್ತಿದ್ದಾರೆ. 2021ರ ನಂದಿಗ್ರಾಮ ಚುನಾವಣೆಯಲ್ಲಿ ಮಮತಾ ಅವರನ್ನು 1,900 ಮತಗಳ ಅಲ್ಪ ಅಂತರದಿಂದ ಸೋಲಿಸಿದ್ದ ಸುವೇಂದು, ಈಗ ಭವಾನಿಪುರದಲ್ಲೂ ಅಂತಹದ್ದೇ ಪವಾಡ ಮಾಡಲು ಸಜ್ಜಾಗಿದ್ದಾರೆ.

ಬಳಿಕ ನಡೆದ ಉಪಚುನಾವಣೆಯಲ್ಲಿ ಮಮತಾ 58,835 ಮತಗಳ ಬೃಹತ್ ಅಂತರದಿಂದ ಗೆದ್ದಿದ್ದರೂ, 2024ರ ಲೋಕಸಭಾ ಚುನಾವಣೆಯ ಅಂಕಿ-ಅಂಶಗಳು ಬೇರೆಯದ್ದೇ ಕಥೆ ಹೇಳುತ್ತಿವೆ. ಲೋಕಸಭೆ ಚುನಾವಣೆಯಲ್ಲಿ ಭವಾನಿಪುರ ವ್ಯಾಪ್ತಿಯಲ್ಲಿ ಟಿಎಂಸಿ ಮುನ್ನಡೆ ಕೇವಲ 8,297 ಮತಗಳಿಗೆ ಕುಸಿದಿದೆ. ಇದು ಬಿಜೆಪಿಯ ಆಕ್ರಮಣಕಾರಿ ಬೆಳವಣಿಗೆಯನ್ನು ಎತ್ತಿ ತೋರಿಸುತ್ತಿದೆ.

ಭವಾನಿಪುರವನ್ನು ಮಮತಾ ಬ್ಯಾನರ್ಜಿ ಅವರಿಂದ ಕಿತ್ತುಕೊಳ್ಳಲು ಬಿಜೆಪಿ ತನ್ನ ಸರ್ವಶಕ್ತಿಯನ್ನು ಧಾರೆ ಎರೆದಿದೆ. ಪ್ರಧಾನಿ ನರೇಂದ್ರ ಮೋದಿ ಮತ್ತು ಕೇಂದ್ರ ಗೃಹ ಸಚಿವ ಅಮಿತ್ ಷಾ ಅವರು ಇಲ್ಲಿ ಭರ್ಜರಿ ಪ್ರಚಾರ ನಡೆಸಿದ್ದಾರೆ. ಇದಕ್ಕೆ ಪ್ರತಿಯಾಗಿ ಮಮತಾ ಬ್ಯಾನರ್ಜಿ ಕೂಡ ಕ್ಷೇತ್ರವನ್ನು ಹಗುರವಾಗಿ ಪರಿಗಣಿಸಿಲ್ಲ. ರಾಜ್ಯಾದ್ಯಂತ ಪ್ರಚಾರದ ಜವಾಬ್ದಾರಿ ಇದ್ದರೂ, ಭವಾನಿಪುರದ ಗಲ್ಲಿ ಗಲ್ಲಿಗಳಲ್ಲಿ ಪಾದಯಾತ್ರೆ ಮತ್ತು ತಡರಾತ್ರಿಯವರೆಗೆ ಸಭೆಗಳನ್ನು ನಡೆಸುತ್ತಿದ್ದಾರೆ.

ಏಪ್ರಿಲ್ 26ರಂದು ಚಕ್ರಬೇರಿಯಾದಲ್ಲಿ ನಡೆದ ಸಭೆಯಲ್ಲಿ ಉಂಟಾದ ಗದ್ದಲ ಮಮತಾ ಅವರನ್ನು ಕೆರಳಿಸಿತ್ತು. ಬಿಜೆಪಿ ಕಾರ್ಯಕರ್ತರ ಘೋಷಣೆಯಿಂದಾಗಿ ಸಭೆಯನ್ನು ಅರ್ಧಕ್ಕೇ ಮೊಟಕುಗೊಳಿಸಿದ ದೀದಿ, ಇದು ನನಗೆ ಮಾಡುತ್ತಿರುವ ಅವಮಾನ. ನಾನು ನಾಳೆ ಮತ್ತೆ ಬರುತ್ತೇನೆ, ನನಗಾಗಿ ಮತ ನೀಡಿ ಎಂದು ಭಾವುಕರಾಗಿ ಮನವಿ ಮಾಡಿದ್ದು ಕ್ಷೇತ್ರದ ಬಿಗುವಿನ ವಾತಾವರಣಕ್ಕೆ ಸಾಕ್ಷಿಯಾಗಿದೆ.

ಚುನಾವಣಾ ಆಯೋಗದ 'ವಿಶೇಷ ತೀವ್ರ ಪರಿಷ್ಕರಣೆ' (SIR) ಪ್ರಕ್ರಿಯೆಯು ಈ ಕ್ಷೇತ್ರದಲ್ಲಿ ದೊಡ್ಡ ಚರ್ಚೆಗೆ ಗ್ರಾಸವಾಗಿದೆ. ಭವಾನಿಪುರದ ಒಟ್ಟು ಮತದಾರರಲ್ಲಿ ಸುಮಾರು ಶೇ.21 (51,000 ಹೆಸರುಗಳು) ಮತದಾರರ ಪಟ್ಟಿಯಿಂದ ಹೊರಬಿದ್ದಿವೆ. ಇದರಲ್ಲಿ ಮುಸ್ಲಿಂ ಮತದಾರರ ಹೆಸರುಗಳು ಹೆಚ್ಚಿನ ಸಂಖ್ಯೆಯಲ್ಲಿವೆ ಎಂಬ ಆರೋಪ ಕೇಳಿಬಂದಿದೆ. ಮುಸ್ಲಿಂ ಮತದಾರರು ಟಿಎಂಸಿಯ ಭದ್ರ ಬುನಾದಿಯಾಗಿದ್ದು, ಈ ಡಿಲೀಟ್ ಪ್ರಕ್ರಿಯೆಯು ಚುನಾವಣಾ ಫಲಿತಾಂಶದ ಮೇಲೆ ಯಾವ ರೀತಿ ಪರಿಣಾಮ ಬೀರಲಿದೆ ಎಂಬುದು ಕುತೂಹಲ ಮೂಡಿಸಿದೆ.

ಕ್ಷೇತ್ರದ ಮತದಾರರ ನಾಡಿಮಿಡಿತ ಅರಿಯುವುದು ಈ ಬಾರಿ ಸುಲಭವಿಲ್ಲ. ಸ್ಥಳೀಯರೊಬ್ಬರ ಪ್ರಕಾರ, ಇಲ್ಲಿ ಪ್ರತಿಯೊಂದು ಸಮುದಾಯಕ್ಕೂ ತನ್ನದೇ ಆದ ಧ್ವನಿಯಿದೆ, ಹಾಗಾಗಿ ಮತದಾನದ ಮಾದರಿಯನ್ನು ಊಹಿಸುವುದು ಕಷ್ಟವಾಗಿದೆ.

ಟಿಎಂಸಿ: ಮುಖ್ಯಮಂತ್ರಿಗಳು ನಮ್ಮ ಕ್ಷೇತ್ರವನ್ನು ಪ್ರತಿನಿಧಿಸುವುದು ನಮಗೆ ಹೆಮ್ಮೆಯಾಗಿದೆ. ಅಭಿವೃದ್ಧಿ ಕೆಲಸಗಳು ನಮ್ಮ ಕೈಹಿಡಿಯಲಿವೆ.

ಬಿಜೆಪಿ: ಮಮತಾ ಇಲ್ಲಿ 15 ವರ್ಷಗಳಿಂದ ಶಾಸಕಿಯಾಗಿದ್ದರೂ ಏನೂ ಮಾಡಿಲ್ಲ. ಟಿಎಂಸಿ ಮನೆ ಮನೆಗೆ ಪ್ರಚಾರ ಮಾಡುತ್ತಿರುವುದೇ ಅವರ ಸೋಲಿನ ಭೀತಿಗೆ ಸಾಕ್ಷಿ ಎಂದು ಬಿಜೆಪಿ ನಾಯಕ ಇಂದ್ರಜಿತ್ ಖಾತಿಕ್ ಟೀಕಿಸಿದ್ದಾರೆ.

ಭವಾನಿಪುರ ಕೇವಲ ಒಂದು ಕ್ಷೇತ್ರವಲ್ಲ, ಇದು ಮಮತಾ ಬ್ಯಾನರ್ಜಿ ಅವರ ನಾಯಕತ್ವಕ್ಕೆ ಒಡ್ಡಿದ ಸವಾಲಾಗಿದೆ. ಗೆಲುವಿನ ಅಂತರ ಮತ್ತಷ್ಟು ಕುಸಿಯುತ್ತದೆಯೇ ಅಥವಾ ಮಮತಾ ತನ್ನ ಅಧಿಪತ್ಯವನ್ನು ಉಳಿಸಿಕೊಳ್ಳುತ್ತಾರೆಯೇ ಎಂಬ ಪ್ರಶ್ನೆ ಎದ್ದಿದೆ. ಬಿಜೆಪಿ ಈ ಭದ್ರಕೋಟೆಯನ್ನು ಭೇದಿಸುತ್ತದೆಯೇ ಈ ಎಲ್ಲಾ ಪ್ರಶ್ನೆಗಳಿಗೆ ಮತಪೆಟ್ಟಿಗೆಯೇ ಉತ್ತರ ನೀಡಬೇಕಿದೆ,(ಏಜೆನ್ಸೀಸ್).