ಹಾರ್ಮುಜ್ ಜಲಸಂಧಿ ಬಂದ್; ಬಿಕ್ಕಟ್ಟಿನಲ್ಲೂ ಭಾರತಕ್ಕೆ ಬಂತು ಗ್ಯಾಸ್! ಎರಡು ಎಲ್​ಪಿಜಿ ಹಡಗುಗಳನ್ನು ಬಿಟ್ಟ ಇರಾನ್ | LPG ships

ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇರಾನ್ ಮೇಲೆ ಬಾಂಬ್ ಮಳೆ ಸುರಿಸುತ್ತಿರುವ ಹಿನ್ನೆಲೆಯಲ್ಲಿ, ಇರಾನ್ ತನ್ನ ಕರಾವಳಿ ತೀರದಲ್ಲಿರುವ ಹಾರ್ಮುಜ್ ಜಲಸಂಧಿಯನ್ನು ಸಂಪೂರ್ಣವಾಗಿ ಬಂದ್ ಮಾಡಿದೆ. ಜಗತ್ತಿನ ಶೇ.20 ರಷ್ಟು ತೈಲ ಮತ್ತು ಗ್ಯಾಸ್ ಪೂರೈಕೆಯಾಗುವ ಈ ಮಾರ್ಗವನ್ನು ಇರಾನ್ ತಡೆಹಿಡಿದಿರುವುದರಿಂದ ವಿಶ್ವದಾದ್ಯಂತ ಇಂಧನ ಹಾಹಾಕಾರ ಶುರುವಾಗಿದೆ. ಆದರೆ, ಭಾರತ ಮತ್ತು ಇರಾನ್ ನಡುವಿನ ಸುದೀರ್ಘ ಸ್ನೇಹ ಸಂಬಂಧ ಮತ್ತು ರಾಜತಾಂತ್ರಿಕ ಮಾತುಕತೆಗಳ ಫಲವಾಗಿ ಭಾರತದ ಎರಡು ಹಡಗುಗಳಾದ ಶಿವಾಲಿಕ್ ಮತ್ತು ನಂದಾ ದೇವಿಗೆ ಹಸಿರು ನಿಶಾನೆ ಸಿಕ್ಕಿದೆ.

ಶಿಪ್ಪಿಂಗ್ ಕಾರ್ಪೊರೇಷನ್ ಆಫ್ ಇಂಡಿಯಾ (SCI) ಮಾಲೀಕತ್ವದ ಶಿವಾಲಿಕ್ ಹಡಗು ಭಾರತೀಯ ನೌಕಾಪಡೆಯ ಭದ್ರತೆಯೊಂದಿಗೆ ಹಾರ್ಮುಜ್ ಜಲಸಂಧಿಯನ್ನು ಯಶಸ್ವಿಯಾಗಿ ದಾಟಿದೆ. ಇನ್ನು ಕೆಲವು ಗಂಟೆಗಳಲ್ಲಿ ನಂದಾ ದೇವಿ ಹಡಗು ಕೂಡ ಗಡಿ ದಾಟುವ ನಿರೀಕ್ಷೆಯಿದೆ. ಫೆಬ್ರವರಿ ಕೊನೆಯ ವಾರದಿಂದ ಈ ಹಡಗುಗಳು ಕತಾರ್ ಮತ್ತು ಯುಎಇ ಸಮುದ್ರದ ನಡುವೆ ಸಿಲುಕಿಕೊಂಡಿದ್ದವು. ಯುದ್ಧದ ಭೀತಿಯಿಂದಾಗಿ ಇಲ್ಲಿ ಸಂಚಾರ ಮಾಡುವುದು ಸಾವಿನೊಂದಿಗೆ ಆಟವಾಡಿದಂತೆ ಇತ್ತು.

ಭಾರತವು ಈ ಸಂಕಷ್ಟದ ಸಮಯದಲ್ಲಿ ಇರಾನ್‌ಗೆ ಮಾನವೀಯತೆಯ ದೃಷ್ಟಿಯಿಂದ ಸಹಾಯ ಹಸ್ತ ಚಾಚಿದೆ. ಯುದ್ಧದ ಸಮಯದಲ್ಲಿ ಭಾರತಕ್ಕೆ ಬಂದಿಳಿದಿದ್ದ ಇರಾನ್‌ನ ಒಂದು ಹಡಗಿನಲ್ಲಿದ್ದ 183 ನಾವಿಕರಿಗೆ ಭಾರತವು ಸುರಕ್ಷಿತ ಆಶ್ರಯ ನೀಡಿದೆ. ಶ್ರೀಲಂಕಾ ಕರಾವಳಿಯ ಬಳಿ ಅಮೆರಿಕದ ಟಾರ್ಪಿಡೊ ದಾಳಿಗೆ ಇರಾನ್‌ನ ಒಂದು ಹಡಗು ಮುಳುಗಿದ ನಂತರ, ಭಾರತವು ಇರಾನ್ ನಾವಿಕರನ್ನು ರಕ್ಷಿಸಿರುವುದು ಉಭಯ ದೇಶಗಳ ಸ್ನೇಹಕ್ಕೆ ಹೊಸ ಅರ್ಥ ನೀಡಿದೆ.

ಭಾರತವು ಕಳೆದ ಕೆಲವು ದಶಕಗಳಲ್ಲೇ ಕಾಣದಂತಹ ತೀವ್ರ ಇಂಧನ ಬಿಕ್ಕಟ್ಟನ್ನು ಎದುರಿಸುತ್ತಿದೆ. ದೇಶದ ಗೃಹಬಳಕೆಯ ಸಿಲಿಂಡರ್ ಪೂರೈಕೆಯಲ್ಲಿ ಕೊರತೆಯಾಗಬಾರದು ಎಂಬ ಕಾರಣಕ್ಕೆ ಸರ್ಕಾರವು ಕೈಗಾರಿಕೆಗಳಿಗೆ ನೀಡುವ ಅನಿಲ ಪೂರೈಕೆಯನ್ನು ಈಗಾಗಲೇ ಕಡಿತಗೊಳಿಸಿದೆ. ಭಾರತವು ವರ್ಷಕ್ಕೆ ಸುಮಾರು 33 ಮಿಲಿಯನ್ ಮೆಟ್ರಿಕ್ ಟನ್ ಎಲ್‌ಪಿಜಿಯನ್ನು ಬಳಸುತ್ತದೆ, ಅದರಲ್ಲಿ ಶೇ.60 ರಷ್ಟು ಆಮದು ಮಾಡಿಕೊಳ್ಳಲಾಗುತ್ತದೆ. ಈ ಆಮದಿನ ಶೇ.90 ಭಾಗ ಮಧ್ಯಪ್ರಾಚ್ಯದ ಮೂಲಕವೇ ಬರುತ್ತದೆ.

ಶನಿವಾರ ಸೌದಿ ಅರೇಬಿಯಾದ ತೈಲವನ್ನು ಹೊತ್ತ ಮತ್ತೊಂದು ಹಡಗು ಸ್ಮಿರ್ನಿ ಭಾರತಕ್ಕೆ ತಲುಪುವ ನಿರೀಕ್ಷೆಯಿದೆ. ಈ ಮೂಲಕ ದೇಶದಲ್ಲಿ ಉಂಟಾಗಿರುವ ಪೆಟ್ರೋಲಿಯಂ ಕೊರತೆಯನ್ನು ನೀಗಿಸಲು ಕೇಂದ್ರ ಸರ್ಕಾರ ಹರಸಾಹಸ ಪಡುತ್ತಿದೆ.

ಹಾರ್ಮುಜ್ ಜಲಸಂಧಿಯಲ್ಲಿ ಭಾರತದ ಹಡಗುಗಳಿಗೆ ರಿಯಾಯಿತಿ ಸಿಕ್ಕಿದ್ದರೂ, ಇನ್ನೂ ಸುಮಾರು 24 ಭಾರತೀಯ ಧ್ವಜವಿರುವ ಹಡಗುಗಳು ಗಲ್ಫ್ ವಲಯದಲ್ಲಿ ಸಿಲುಕಿಕೊಂಡಿವೆ ಎಂದು ವಿದೇಶಾಂಗ ಇಲಾಖೆ ತಿಳಿಸಿದೆ. ಇವುಗಳನ್ನೂ ಸುರಕ್ಷಿತವಾಗಿ ಭಾರತಕ್ಕೆ ತರುವ ಪ್ರಯತ್ನಗಳು ನಡೆಯುತ್ತಿವೆ.

ಇರಾನ್‌ನ ಈ ನಿರ್ಧಾರವು ಅಮೆರಿಕದ ಮಿತ್ರರಾಷ್ಟ್ರಗಳಿಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ. ಅಮೆರಿಕದ ದಾಳಿಯ ನಡುವೆಯೂ ಭಾರತದೊಂದಿಗಿನ ಸ್ನೇಹವನ್ನು ಎತ್ತಿ ಹಿಡಿದಿರುವ ಇರಾನ್, ಜಾಗತಿಕ ರಾಜಕೀಯದಲ್ಲಿ ಭಾರತದ ಪ್ರಭಾವವನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ,(ಏಜೆನ್ಸೀಸ್).